KO E SAAME 75
75
Ko e ‘Otua ko e Fakamaau
(Ki he Pule ‘o Hiva. Ki he fasi ko “‘Oua ‘e faka‘auha.” Ko e Saame ‘a ‘Ēsafe. Ko e ta‘anga.)
1‘OKU mau fakafeta‘i kiate koe, ‘Elohimi, ‘oku mau fakafeta‘i
He ko ho huafa ‘oku ofi mai:
‘Oku toutou tala ia ‘e ho‘o ngaahi ngāue tu‘utai.#75.1 He… tu‘utai; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘Oku mau tala ‘a e fu‘u mafi ‘o e ‘afió na, mo malanga‘aki e ngaahi me‘a fakaofo kuó ke faí.
2“Ka a‘u ki hoku nima ‘a e taimi kuo kotofa,
Te u fakamaau totonu ‘a e me‘a.
3He ngali mokulu koā ‘a māmani mo hono nofo ‘ona–
‘Ā, ko au na‘a ku fokotu‘u hono pou, ‘o u fua ke fe‘unga.” (Sila)
4Kuo u pehē ki he fakamālohi,
‘Oua te mou fakamālohi pea ki he kau angahala,
‘Oua te mou nifo hihiki:
5‘Oua ‘e hiki homou nifo ki ‘olunga;
‘Oua ‘e lea mei he kia fiematamu‘a.
6He ‘oku ‘ikai ke ha‘u mei he hopo‘anga la‘ā pe mei hono tō‘anga,
‘Io, ‘oku ‘ikai ha‘u hoto hiki mei he toafa.#75.6 ‘Io… toafa; Ko hono faka-Hepeluú ia, ka ‘oku ngali tonu hono hiki ‘o: pe mei he Tokelaú pe ko e tongá.
7He ko eni ia ‘a e fakamaau, ‘a ‘Elohimi:
Ko e taha ko ē ‘oku ne hifo, ko e taha ko ē ‘oku ne hiki.
8He ‘oku ‘i ai ha ipu ‘i he nima ‘o Sihova,
Pea ‘oku sovinivini hono uaine he fonua ‘i he me‘a fakakakala;
Pea ‘oku ne fakatau mei ai ‘e ia:
Tala atu ko hono efe ‘o‘ona
Ko e kau angahala ‘o māmani te nau tatau, ‘o inumia.
9Ka ko au te u fakahā ma‘u pē;
Te u hiva saame ki he ‘Otua ‘o Sēkope.
10Pea ko e ngaahi nifo ‘o e kau angahala te u paki;
Ka ko e nifo ‘o e kau mā‘oni‘oni ‘e mahiki.
Currently Selected:
KO E SAAME 75: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
