KO E SAAME 73
73
KO HONO TOLU ‘O E PUKá
(Saame 73–89)
Ko e Fakamaau Faitotonu ‘a e ‘Otuá
1TĀ ko e koto lelei ‘a e tō‘onga ‘a e ‘Otua ki ‘Isileli,
Kiate kinautolu ‘oku ma‘a honau ‘atamai.
2Ka ko au na‘e toe si‘i ke humu hoku va‘e;
Ko ‘eku laka na‘e meimei ko e koto tatele.
3He na‘a ku meheka ki he kau fakamālohi,
‘Eku sio ki he tu‘umālie ‘a e ha‘a fai kovi.
4He hangē ‘oku ‘ikai ke ha‘isia kinautolu:
Pea ‘oku fefeka ai pē honau ngū.
5‘Oku ‘ikai te nau mo‘ua ‘i he ongosia ‘o ha‘a vaivai;
Pea ‘oku ‘ikai ke te‘ia kinautolu ‘o hangē ko ha‘a mālohi.
6Ko ia ai, ‘oku nau kahoa ‘aki ‘a e fielahi;
‘Oku nau kofu ‘aki ‘a e fakamālohi.
7Ko honau mata kuo poko he fu‘u sino:#73.7 Ko honau… sino; ‘Oku ‘ikai ke mahino ‘a hono faka-Hepeluú, ka ‘oku pehē ‘i he ngaahi hiki fuoloa ‘e ni‘ihi: ‘Oku taumalingi mai ‘a e koví mei honau lotó.
‘Oku pā ki tu‘a ‘a e fu‘u fakakaukau ‘a honau loto.
8‘Oku nau mata hihiki, ‘oku nau lea kovi,
‘Oku nau futa ‘aki ‘enau mā‘olunga he lau fakamālohi:
9Kuo nau ‘ai honau ngutu ‘i he langi,
Pea hā‘ele atu honau ‘elelo ‘i māmani.
10Ko ia ai, ‘oku tafoki hono kakai ‘o muimui ki ai:
Ko ‘enau fie inu ha vai lahi.#73.10 Ko… lahi; ‘Oku ‘ikai ke mahino ‘a hono faka-Hepeluú, ko hono hiki ‘e taha ko e: mo tui fie tui ki ha me‘a pē ‘okú ne lea‘aki.
11Pea ‘oku nau lau, “‘O ‘ilo fēfē ‘a ‘Ela?
Pea ko ‘Elioni, ‘oku ne mea‘i koā?
12Vakai, ko e kau angahala kinautolu na,
Ka ‘oku nau tu‘umālie ai pē, ‘o fakalahi koloa.”
13Tā ko e kulanoa ‘eku toutou tafi hoku loto ke ma‘a,
Mo ‘eku fanofano hoku nima ‘i he ta‘eangahala;
14He ‘oku fai hoku taa‘i ‘i he ‘aho kotoa,
Pea ko e pongipongi fuli pē ‘oku fai hoku tautea.
15Ka ne u tu‘utu‘uni ke pehē ‘eku lau,
Tā te u fai hala ki he to‘utangata ‘o ho‘o fānau.
16Pea ka u ka fakalaulauloto ke ‘ilo hono ‘uhinga,
Ko e kavenga leva ki hoku mata.
17Kae‘oua Kuo u hū ki he ngaahi potu tapu ‘o ‘Ela,
‘O sio ki honau iku‘anga.
18Tā ‘oku ke ‘ai kinautolu ki he ngaahi potu ‘oku hekengofua:
‘Oku ke tulaki kinautolu ki he fu‘u ‘auha.
19Hono ko e kemo kuo nau hoko ko e koto lusa!
Kuo kai ‘o ‘osi kinautolu ‘e he ‘ū ilifia.
20Hangē ha misi ‘oka ‘ā ha taha,
Pehē, ‘e ‘Ātonai, ‘i ho‘o ofo hake na,
Te ke ta‘etoka‘i kinautolu, he ko e ‘ata‘i me‘a.
21He ko hoku loto na‘e toka konā,
Pea ko hoku kofuua na‘e hangē kuo hoka:
22‘Io, kuo pehē ‘eku vale mo masiva ‘ilo;
Ne u hoko ko e manu tofu pē ‘i ho ‘ao.
23Ka ko e “Ko au” ko ia ‘oku ta fe‘ao ma‘u:
Kuo ke puke hoku to‘omata‘u.
24Te ke fale‘i au, ‘o taki hala,
Pea hili ia te ke tali fakahū au ki he kolōlia.
25Ko hai mo koe ‘oku ou ma‘u ‘i langi?
Pea ‘oku ‘ikai ha‘aku toe manako ‘i māmani.
26Ko hoku kakano mo hoku loto kuo ‘autalua;
Ka ko e ‘Otua ‘a e mālohinga ‘o hoku loto,
Mo hoku tofi‘a ‘o ta‘engata.
27He vakai ‘e mole ‘a kinautolu ‘oku fakamama‘o meiate koe:
Kuo ke faka‘auha ‘a kinautolu ‘oku kumi husepāniti kehe.
28Ka ‘oku lelei kiate au ke fakaofiofi ki he ‘Otua:
Kuo tu‘u ‘eku hūfanga ‘ia ‘Ātonai Sihova,
Ke u ‘a‘au ho‘o ngaahi ngāue kotoa.
Currently Selected:
KO E SAAME 73: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
