KO E SAAME 7
7
Ko e Lotu ke Fakamāu‘i Hoto Fili
(Ko e Saame faka-loto-manafa ‘a Tēvita ‘a ia na‘a ne hiva‘aki kia Sihova koe‘uhi ko e ngaahi lea ‘a Kusa ko e tama Penisimani.)
1‘E Sihova ko hoku ‘Otua, ko koe Kuo u hūfanga ki ai:
Fakamo‘ui au meiate kinautolu kotoa pē ‘oku tuli mai,
Pea ke hamusi au.
2Telia na‘a ne hae hangē ha laione ‘eku mo‘ui,
Fakaikiiki pē, ko e ‘ikai ha hamusi.
3‘E Sihova ko hoku ‘Otua,
Kapau Kuo u fai ‘a e me‘a ni;
Kapau ‘oku ‘i ai ha kovi ‘i hoku nima ni;
4Kapau na‘a ma vālelei mo ha taha, ka u ngaohikovia;#7.3-4 Kapau… ngaohikovia; pe Kapau na‘á ku ‘ofa ki ha taha na‘e faihala kiate au.
(‘Ā, na‘a ku tukuange ha taha kuo fili ‘aki au ta‘ehano ‘uhinga)
5Ke toki tuli hoku laumālie ‘e he fili, ‘o ma‘u;
‘Io, ke ne malaki ‘eku mo‘ui ki he kelekele,
Pea ngaohi hoku lāngilangi ke nofo ‘i he efu. (Sila)
6Tu‘u hake, ‘e Sihova, ‘i ho‘o lili,
Fakamā‘olunga koe telia ‘a e fai fielahi ‘a hoku ngaahi fili;
‘Io, ke ke ‘ā ma‘aku;
Kuo ke tu‘utu‘uni ‘a e fakamaau.
7Pea tuku ‘a e fakataha ‘a e ngaahi kakai ke kāpui ‘a e ‘Afiona;
Pea ‘i honau funga ke ke foki ki ho potu mā‘olunga.#7.7 ‘i honau… mā‘olungá; Ko hono faka-Hepeluú ia, ka ‘oku ngali tonu hono hiki ‘o pule‘i kinautolu mei ‘olunga.
8“Oku fai ‘e Sihova ‘a e fakamaau ki he ngaahi kakai!”
Fakamaau kita, ‘Eiki;
Kae fai kiate au ‘o fakatatau ki he‘eku totonu mo ‘eku mā‘oni‘oni.
9Fakangatangata ā ‘a e kovi ‘o e kau faikovi;
Ka ke fokotu‘u ma‘u ‘a e mā‘oni‘oni:
He ko ia ‘oku sivi ‘a e ngaahi loto mo e ngaahi kofuua
Ko e ‘Otua Fai totonu ia.#Fkhā 2.23
10Ko hoku pā ‘oku ‘i he ‘Otua,
‘A ia ‘oku ne fakahaofi ‘a e loto-totonua.
11Ko e Fakamaau Fai totonu ‘a e ‘Otua,
‘Io, ko e ‘Otua ‘oku houhau ‘i he ngaahi ‘aho kotoa.
12Kapau ‘e ‘ikai fai ha liliu, te ne faka‘alo ‘ene heletā;
Kuo ne teke ‘ene kaufana, ‘o ‘osi teuteua.
13‘Io, kuo ne teuteu ‘a e ngaahi me‘a tāmate ki he toko taha ko ia;
‘Oku ne ngaohi ‘ene ngaahi ngahau ke vela.
14Vakai! ‘oku ne fā‘ele‘i ‘a e kovi!
‘Io, na‘a ne feitama ‘i he fakamamahi, ‘o ne fanau‘i ‘a e loi!
15Na‘a ne keli ha luo, pea fakalekeleke foki:
Pea kuo ne tō ki he luo ne ne ngaohi.
16‘E foki ki hono ‘ulu ‘o‘ona ‘a ‘ene fakamamahi,
Pea tō ‘ene fakamālohi ki ho‘ona tumu‘aki.
17‘Ē, ke u fakafeta‘i kia Sihova ke hoa mo ‘ene faitotonu:
Ka u hiva fakamālō ki he huafa ‘o e ‘Eiki Taupotu.
Currently Selected:
KO E SAAME 7: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
