KO E SAAME 66
66
Ko e Hiva Fakahīkihiki mo e Fakafeta‘I
(Ki he Pule ‘o e Hiva. Ko e Hiva-Saame.)
1MAVAVA ki he ‘Otua, ‘a Maama kātoa:
2Hiva‘aki ‘a e ongoongo ‘o hono hingoa:
Fakalāngilangi‘i hono fakamālooa.
3Fakatau folofola kia ‘Elohimi, ‘o pehē,
Hono ‘ikai ngei ho‘o ngaahi ngāue!
Ko e me‘a ‘i he lahi ‘o ho ivi
‘E fakavaivai kiate koe ‘e ho ngaahi fili.
4‘E punou kiate koe ‘a māmani kotoa,
Pea te nau hiva ki he ‘Afiona:
Te nau hiva‘aki ho hingoa. (Sila)
5Mou omi ‘o vakai ‘a e ngaahi ngāue ‘a e ‘Otua;
‘Oku fakailifia ‘ene tō‘onga ki he hako ‘o ‘Ātama.
6Na‘a ne liliu ‘a e tahi ko e kelekele:#‘Eki 14.21; Sios 3.14-17
‘I he vaitafe na‘a nau ‘alu ‘aki honau va‘e;
Tau viki kiate ia ‘i he potu ko ē.
7He pule ta‘engata ia ‘i he‘ene māfimafi;
Ko hono ongo fo‘i fofonga ‘oku na vakai‘i ‘a e ngaahi kakai:
Ko e me‘a ki he kau angatu‘u,
Ke ‘oua te nau hiki honau ‘ulu. (Sila)
8Mou fakafeta‘i ki homau ‘Otua, ‘a e ngaahi kakai na,
Pea ‘ai ke maongo ‘a e le‘o ‘oku fakamālō kiate ia:
9‘A ia ‘oku ta‘ofi ki he mo‘ui hotau laumālie,
‘O ‘ikai te ne tuku homau va‘e ke ngāue.
10He kuo ke ‘ahi‘ahi‘i kimautolu, ‘e ‘Otua:
Kuo ke sivi kimautolu ‘o hangē ko e sivi ‘o e siliva.
11Na‘a ke fakahū kimautolu ki he kupenga:
Na‘a ke ‘ai ki homau tu‘a ha fu‘u kavenga.
12Na‘a ke tuku ha kakai ke fakateka atu
‘Enau sāliote ‘i homau funga ‘ulu;
Na‘a mau ‘alu ‘i he afi mo e vai:
Ka na‘a ke fakahao mai kimautolu ki he potu mahu lahi.#66.12 mahu lahi; ‘Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: malu.
13Te u hū ki ho fale mo e ngaahi feilaulau tutu,
Te u fai kiate koe ‘eku tukumo‘ui.
14‘A ia na‘e pu‘aki ‘e hoku loungutu,
‘O lea‘aki ‘e hoku ngutu ‘i he falala mai ‘a e mamahi.
15Te u kumi manu ngako ki he feilaulau tutu,
‘O ‘oatu mo e kohu ‘o e fanga sipi tangata:
Te u fai‘aki ‘a e fanga pulu,
‘O ‘ai moni kosi tangata. (Sila)
16Ha‘u ‘o fanongo, ‘a e kau ‘apasia kia ‘Elohimi,
Ka u ‘a‘au ‘a e ngaahi me‘a kuo ne fai ma‘a hoku laumālie ni.
17Ko ia ia na‘e tautapa ki ai hoku le‘o,
Pea ko hono fakamālō na‘e nofo ‘i hoku lalo ‘elelo.
18Ka ne u mo‘usioa ha kovi ‘i hoku ‘atamai,
‘E ‘ikai ongo‘i au ‘e ‘Ātonai.
19Ka ko eni kuo ongo‘i ‘e he ‘Otua;
Kuo ne fofonga ki he le‘o ‘o ‘eku hūfia.
20Mālō mu‘a mo e ‘Otua, ‘a ia na‘e ‘ikai te ne ta‘ofia
‘a e lotu na‘a ku fai ki he ‘Afiona,
Pe ko e ō mo au ‘a ‘ene ‘alo‘ofa.
Currently Selected:
KO E SAAME 66: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
