KO E SAAME 65
65
Ko e Fakahīkihiki mo e Fakafeta‘i
(Ki he Pule ‘o e Hiva, Ko e Saame ‘a Tēvita. Ko e ta‘anga.)
1‘OKU nofo‘aki tali atu ‘a e fakamālō ‘i Saione, ‘e ‘Otua:
Pea ‘e fakaai ‘a e tukumo‘ui ki he ‘Afiona.
2Ko e tali lotu ‘a e ‘Afiona,
Ko ia, ‘e ‘alu atu ai kiate koe ‘a e kakano kotoa.
3Kuo ha‘aki au ‘e he ngaahi kovi:#65.3 au; Ko hono faka-Hepeluú ia, ka ‘oku pehē he hiki fuoloa ‘e taha: kimautolu.
Ko e me‘a ki he‘etau ngaahi hia ko e ‘Afiona kuo ne ‘ufi‘ufi.
4Monū‘ia ā ka ko e toko taha kuo ke filia,
‘O ke fakaofi mai ke nofo ho ngaahi loto‘ā:
‘Ē, tau topono mu‘a he lelei ‘o ho fale,
‘A e me‘a tapu ‘o ho temipale.
5Me‘a fakailifia kae tefito ki ho‘o faitotonu
‘Oku ke tali ‘aki kimautolu,
‘A e ‘Otua ko homau mo‘ui‘anga;
‘A e pāletu‘a ‘o e ngaahi ngata‘anga ‘o e fonua,
Mo e tahi ‘o e kakai mama‘o na:
6‘a e ‘Afio ‘oku ne ‘ai ma‘u ‘a e ngaahi mo‘unga ‘aki hono ivi;
Hono kuo no‘o ‘aki ‘a e mālohi:
7Ko e ‘u‘ulu ‘o e ngaahi tahi ‘oku ne fakanonga,
Ko e ‘u‘ulu ‘o ‘enau peau na,
‘Io, ‘a e longoa‘a ‘o e ngaahi fa‘ahinga.
8Ko ia ai, ‘oku manavahē ‘i ho ngaahi faka‘ilonga
‘a e nofo ‘i he ngaahi ngata‘anga na:
‘Oku ke ‘ai ke hiki mavava ‘a e hopo mo tō‘anga la‘ā.
9Kuo ke ‘a‘ahi ‘a e fonua,
‘Oku ke ‘ai ke fonu mahua;
‘Oku ke fu‘u fakakoloa lahi,
‘Aki ‘a e tafenga vai ‘a ‘Elohimi,
‘A ia ko e fu‘ufu‘unga vai;
‘Oku ke teu ‘enau uite,
Ho‘o teu pehē ‘a e kelekele.
10‘Oku ke mātu‘aki fakavai ‘a e ngaahi potu ‘oku keli,
Pea ko e ngaahi kauefu ‘oku ke fakatokalelei;
‘Oku ke fakamolū ‘aki ‘a e toutou ‘uha,
‘Oku ke tāpuaki ‘ene tupu na.
11Ko e koto ‘ofa ‘a e ta‘u ni,
Pea kuo ke toe fakakalauni; pea ko ho hā‘ele‘anga ‘oku fetafei
‘I he ngako ‘o e me‘a lelei.
12‘Oku fetafei ai he kaikai‘anga he toafa,
Pea ‘oku no‘o fiefia ‘a e ngaahi mo‘unga.
13Hangē kuo kofu sipi ‘a e fanga-manu‘anga;
Hangē kuo pulupulu uite ‘a e ngaahi lautoka:
‘Oku nau veipā ‘i he mavava,
‘Ā, ‘oku nau mātu‘aki hiva.
Currently Selected:
KO E SAAME 65: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
