KO E SAAME 64
64
Ko e Lotu Kole Malu‘i
(Ki he Pule ‘o e Hiva. Ko e Saame ‘a Tēvita.)
1ONGO‘I, ‘Elohimi, hoku le‘o ‘i he‘eku mamahi:
Lehilehi‘i ‘eku mo‘ui mei he ngeia ‘o e fili.
2Fufū au mei he fakataha fakalilolilo ‘a e kau maumau lao;
Mei he fononga pau‘u ‘a e kau fai me‘a pango:
3‘A ia kuo nau faka‘alo honau ‘elelo hangē ha heletā,
Kuo nau faka‘ata ‘enau ngahau ko e lea kona:
4Ke fana mei honau toitoi‘anga ki he kakai lelei:
‘Iloange kuo nau fana, ‘o ‘ikai teki.
5‘Oku nau fepukenima‘aki ke tu‘u kaukaua ‘enau lea kovi;
‘Oku nau fa‘ufa‘ufono ‘a e teu fufū ‘enau hele kamosi;
‘Oku nau pehē, Ko hai tū ‘e sio mai?
6‘Oku nau tufi ‘a e ngaahi kovi ke ma‘u ha me‘a;
Ko e fakakaukau kuo nau fakakaukau‘i ‘oku nau tātā ke haohaoa:
Pea ‘oku taumama‘o honau loto mo e ‘atamai takitaha.
7Ka kuo fana ha ngahau kiate kinautolu ‘e he ‘Otua;
‘Iloange ne hoko mai honau lavea.
8Pea kuo ne fakahumu kinautolu: ko honau ‘elelo na‘a nau tu‘utāmaki ai:#64.8 kuo ne… tu‘utāmaki ai; pe Te nau faka‘auha ia, ko honau fakahalaia‘i ‘a e ngaahi lea ko iá; pe Te ne faka‘auha kinautolu koe‘uhí ko e ngaahi lea ko iá.
Kalo ‘ulu kotoa ‘a e kau sio ki ai.
9Pea kuo manavahē ‘a e kakai kotoa;
Pea kuo nau fakamatala ‘a e ngāue ‘a e ‘Otua;
Pea kuo nau fakalaulauloto ki he‘ene fai anga.
10Ko si‘i mā‘oni‘oni te ne fiefia ‘ia Sihova,
Pea te ne hūfanga kiate ia;
Pea ‘e pōlepole ‘a e kau angatonu kotoa.
Currently Selected:
KO E SAAME 64: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
