KO E SAAME 62
62
Ko e Tui Falala ki he Malu‘i ‘a e ‘Otuá
(Ki he Pule ‘o e Hiva. Ke fai faka-Situtuni. Ko e Saame ‘a Tēvita.)
1‘Ā! ko e ‘Otua pē ‘oku nofo‘aki tali ki ai hoku laumālie:
Ko hoku fakamo‘ui ‘oku meiate ia pē.
2Ko ia pē hoku makatu‘u mo fakamo‘ui‘anga:
Ko hoku fu‘u taua foki ia; ‘e ‘ikai loko mauea kita.
3‘E tuku ‘afē ho‘omou lolofi mai ki ha fo‘i tangata,
Ho‘omou fu‘u kau ke laiki ia–
Tokua ko e ‘ā maka ‘oku matule, ko e ‘ā ‘oku toe si‘i ke hinga.
4‘Ā! ko e me‘a pē ‘oku alea ki ai ‘a kinautolu na,
Ke tulaki ia mei hono tu‘unga mā‘olunga;
Ko ‘enau manako ‘a e loi:
Ko ngutu ‘oku tāpuaki, ka ko loto ‘oku tuki. (Sila)
5‘Ā! ko e ‘Otua pē ke ke nofo‘aki tali ki ai, ‘e hoku laumālie:
He ko ‘eku ‘amanaki ‘oku meiate ia pē.
6Ko ia pē hoku makatu‘u mo fakamo‘ui‘anga:
Ko hoku fu‘u taua foki; ‘e ‘ikai mauea kita.
7‘Oku hili kia ‘Elohimi hoku fakamo‘ui mo hoku lāngilangi:
Ko hoku makatu‘u-mālohinga mo hoku hūfanga ‘oku ‘ia ‘Elohimi.
8Falala kiate ia he taimi kotoa;
‘A e kakai, mou lilingi homou loto ‘i hono ‘ao na:
Ko e ‘Otua ko e hūfanga mo‘otaua. (Sila)
9Tā ko e kohu pē ‘a lāuvale,
Pea ko ha‘a mā‘olunga ko e muna pē;
Ka ‘ai ki he fuatautau ‘oku nau ‘alu hake:
Ko e koto kohu ‘a kinautolu fua pē.
10‘Oua te mou falala ki ho‘omou fakamālohi na,
Pea ‘oua te mou pupula ‘i ha koloa ma‘u kākā:
Ka tupu ‘a e koloa ‘o lahi,
‘Oua na‘a tuku homou loto ki ai.
11Ko e me‘a ‘e taha ne folofola‘aki ‘e he ‘Otua,
Kuo u fanongo ki he me‘a ni ‘e ua;
Ko e mālohi ko e me‘a ‘a e ‘Otua:
12Pea ‘oku ‘a e ‘Afiona ‘a e meesi, ‘Ātonai ē;#Siope 34.11; Sel 17.10; Māt 16.27; Lom 2.6; Fkhā 2.23
He ‘oku totongi ‘e he ‘Afiona ki he tangata fua pē,
‘O fakatatau ki he‘ene ngāue.
Currently Selected:
KO E SAAME 62: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
