KO E SAAME 37
37
Falala kia Sihova
(Ko e Saame ‘a Tēvita)
1‘OUA te ke ha‘aki hoha‘a koe‘uhi ko e kau faihala,
‘Oua te ke meheka koe‘uhi ko e kakai ‘oku ngāue kākā.
2He vave honau tu‘usi hangē ko e musie,
Pea hangē ko e mohuku mata ‘enau mae.
3Falala koe kia Sihova, ‘o fai lelei,
Nofo ‘i he fonua, ‘o kai ta‘eteki.#37.3 kai ta‘eteki; ‘Oku fihi. ‘Oku hiki ‘e he ni‘ihi: mamahi‘i ‘a e lototoó.
4Tu‘u foki ‘i he ‘Eiki ho‘o manako,
Pea te ne ‘atu ‘a e ngaahi kole ‘a ho loto.
5Tekaki kia Sihova ho ‘alunga;
‘Io, falala ki ai, pea te ne fai ‘e ia.
6‘Io, te ne fakahopo hake ho‘o mā‘oni‘oni hangē ko e maama,
Mo e hā ho tonuhia ‘o hangē ko e ho‘atā.
7Nofo fakalongo koe ki he ‘Eiki, ‘o tatali kiate ia:
‘Oua te ke ha‘aki hoha‘a koe‘uhi ko ha taha ‘oku taka monū‘ia.
Ha tangata ‘oku puleaki‘i me‘a ‘o lava.
8Ma‘u ā ‘a e mamahi, pea tukuange ‘a e ‘ita:
‘Oua ‘e ha‘aki hoha‘a; ‘e iku kovi pē ia.
9He ko e kau ta‘efaitotonu ‘e tu‘usi ia:
Ka ko ha‘a matatali kia Sihova
Ko kinautolu ‘e tō ki ai ‘a e fonua.
10‘Io, ‘oku toe si‘i pea mole ‘a ia ‘oku fai kovi;
‘Io, te ke hakule ‘a e potu na‘e ‘i ai, ka ‘oku ‘ikai.
11Ka ‘e ma‘u ‘a e fonua ‘e he fa‘a kātaki;#Māt 5.5
Pea te nau fefiefia‘i ‘i he melino lahi.
12Ko e faikovi ‘oku ne puleaki‘i me‘a ki he mā‘oni‘oni,
Pea ‘oku ne ‘ūtaki kaunifo ki ai.
13‘Ē, ‘oku kata kiate ia ‘e ‘Ātonai;
He ‘oku ne vakai hono ‘aho ‘oku ‘unu‘unu mai.
14Ko e kau faikovi kuo nau unuhi ‘a e heletā,
Kuo nau teke foki ‘enau kaufana,
Ke tulaki ‘a e ta‘ali‘ekina mo e masiva,
Ke tāmate‘i ‘a kinautolu ‘oku totonu ‘enau laka.
15‘E ulu ‘enau heletā ki ho‘onautolu pē fatafata,
Pea ‘e mafesi ‘enau kaufana.
16‘Oku lelei ‘a e ki‘i me‘a ‘a si‘i mā‘oni‘oni
‘I he fu‘u koloa ‘a e tokolahi faikovi.
17He ‘e mafesi ‘a e nima ‘o e kau faikovi;
Ka ‘oku poupou ai pē ‘e Sihova ‘a e mā‘oni‘oni.
18‘Oku ‘ilo‘i ‘e Sihova ‘a e ngaahi ‘aho ‘o e kau haohaoa,
Pea ko honau tofi‘a ‘e tu‘u ‘o ta‘engata.
19‘I he taimi kovi ‘e ‘ikai te nau ‘amanaki noa,
Pea ‘i he ngaahi ‘aho kovi te nau mākona.
20He ko e kau faikovi ‘e ‘auha,
Pea ko e ngaahi fili ‘o Sihova ‘e hangē ko e teunga ‘o e toafa:
Te nau mole, te nau mole ‘i he kohu na.
21‘Oku nō ‘e he faikovi, ‘o ‘ikai totongi;
Ka ‘oku ‘ofa ‘o fai ha foaki ‘e he mā‘oni‘oni.
22He ko ha‘a tāpuekina meiate ia te nau ma‘u ‘a e fonua,
Ka ko ha‘a mala‘ia meiate ia ‘e motuhia.
23‘Oku meia Sihova ‘a e ma‘u ‘o e laka ‘a e tangata;
Pea ‘oku ne ‘ofa ki hono ‘alu‘anga.
24Neongo te ne humu ‘e ‘ikai te ne lafalafa;
He ‘oku pukepuke ‘e Sihova hono nima.
25Na‘a ku talavou, pea Kuo u motu‘a ni:
Ka kuo te‘eki te u mamata ki ha mā‘oni‘oni kuo li‘aki.
Pe ko hono hako ‘oku nofo ke kole me‘akai;
26Ko e kotoa ‘o e ‘aho ‘oku ne nofo ke tali nō;
Pea ‘oku fai tāpuekina ‘a hono hako.
27Hiki mei he kovi ‘o fai lelei;
Pea ‘e ta‘engata ho‘o nofo ai.
28He ‘oku manako ‘e Sihova ki he fakatonutonu me‘a,
Pea ‘e ‘ikai te ne li‘aki hono ‘ofa‘anga;
‘E tauhi kinautolu ‘o ta‘engata:
Kae motuhi ‘a e hako ‘o e faihala.
29Ko ha‘a faitotonu te nau ma‘u ‘a e fonua,
Pea te nau nofo ai ‘o tuputupu‘a.
30Ko e ngutu ‘o faitotonu ‘oku ne pu‘aki me‘a poto,
Pea ko e me‘a kuo ‘osi ‘a sivi ‘oku talanoa ki ai ‘a hono ‘elelo.
31‘Oku ‘i hono loto ‘a e lao ‘o hono ‘Otua:
‘Oku ‘ikai ha‘ane laka ‘e hekea.
32‘Oku tokamalumu ‘e he angakovi ki he fai lelei.
‘O ne kumi tu‘unga ki hano tāmate‘i.
33‘E ‘ikai li‘aki ia ‘e Sihova ki hono nima,
Pea ‘i hono fakamaau ‘e ‘ikai te ne fakahalaia.
34Talitali kia Sihova, pea tauhi hono ‘alunga,
Pea te ne hākeaki‘i koe ke ma‘u ‘a e fonua:
Ka hoko ‘a e motuhi ‘o ha‘a faikovi te ke mātā ia.
35Kuo u mamata ki ha tangata ko e manavahē‘ia,
Pea holofa hangē ha ‘akau mo‘ui kuo te‘eki ue‘ia.#37.35 Pea holofa… ue‘ia; pe Pea tupu ‘āfa‘afa, ‘o hangē ha fu‘u ‘akau ‘i ha kelekele mo‘uí. Ka ‘oku fihi ‘a hono faka-Hepeluú.
36Faifai pea ‘alu ange ai ha taha–uoke! kuo ‘ikai;
Pea u kumikumi kiate ia kae ‘ikai hā mai.
37Tokanga‘i ‘a si‘i haohaoa, pea vakavakai ‘a mā‘oni‘oni ē:
He ko e ‘amui ‘o e tangata ko ia ko e koto tu‘umālie.
38Ka ko e kau faihala ‘e faka‘auha fakataha:
Ko e ‘amui ‘o e kau faihala ‘e motuhia.
39Ka ko e fakamo‘ui ‘o e faitotonu ‘oku meia Sihova,
Ko honau hūfanga ia ‘i he taimi faingata‘a.
40‘Io, ‘oku tokoni‘i kinautolu ‘e Sihova mo fakahaofi:
‘Oku ne fakahaofi kinautolu mei he kau faihala, mo ne fakamo‘ui,
Koe‘uhi ‘oku ‘iate ia ‘enau tui.
Currently Selected:
KO E SAAME 37: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
