KO E SAAME 38
38
Ko e Lotu he Faingata‘a‘ia
(Ko e Saame ‘a Tēvita: ko e me‘a fakamanatu)
1‘EIKI, ‘oua te ke valoki au ‘i ho‘o houhau;
Pea ‘oua na‘a fai ‘i he tuputāmaki ho‘o tautea au.
2He ko ho‘o ngaahi ngahau ‘oku o‘o ‘ia kita,
Pea ‘oku mōia au ‘e ho nima.
3‘Oku ‘ikai ha ‘ila ‘e toe ‘i hoku kakano, koe‘uhi ko ho‘o mamahi na;
‘Oku ‘ikai ha mo‘ui ‘i hoku ngaahi hui koe‘uhi ko ‘eku hia.
4He ko ‘eku ngaahi kovi kuo nau lōmaki‘i hoku ‘ulu:
Hangē ha kavenga mamafa kuo nau ta‘omi au.
5Ko hoku ngaahi kafo ‘oku namua‘a, ‘o pala pē,
Ko e ‘ātunga ‘o ‘eku vale.
6Kuo kulukia au: ‘oku ou fu‘u hanoku pē;
Hangē ha tēngihia ‘eku ‘alu ma‘u pē.
7He ko e koto vela hoku kongaloto:
Pea ‘oku ‘ikai ha ‘ila ‘e toe ‘i hoku kakano.
8Ko e koto ‘anga‘anga pē au, ko e koto laiki:
Ne u kaila ‘i he to‘e ‘a hoku ‘atamai:
9‘E ‘Ātonai, ‘oku fe‘ao mo koe ‘eku fu‘u holi;
Pea ‘oku ‘ikai puli mei he ‘Afiona ‘eku māpuhoi.
10‘Oku tatū hoku mafu,
Kuo li‘aki au ‘e hoku ngū:
‘Io, na‘a mo e maama ‘o hoku mata ‘oku ‘ikai kei ‘iate au.
11Ko hoku ngaahi ‘ofa‘anga mo kaume‘a,
‘Oku nau faka‘ehi‘ehi mei hoku mala:
‘Oku fakamama‘o mo hoku kāinga.
12Pea ko kinautolu ‘oku kumi ki he‘eku mo‘ui ‘oku nau fanga tauhele,
Pea ko kinautolu ‘oku feinga haku kovi ‘oku nau lau fakapō ai pē,
Pea nau fakakaukau kākā ‘i he ‘aho kotoa pē.
13Ka ko au na‘a ku hangē ha tuli ‘eku ta‘eongona:
‘Ou hangē ha noa ‘oku ‘ikai mafa‘a hono fofonga.
14‘Io, na‘a ku hangē ha tangata ‘oku ta‘etokanga,
Ha taha ‘oku ‘ikai ha‘ane fakamatala.
15He ko koe, Sihova, na‘a ku tu‘a ki ai:
Ko koe te ke tali ma‘aku, ‘e hoku ‘Otua ko ‘Ātonai.
16He na‘a ku pehē–Na‘a ai ha‘aku me‘a ke nau kakae,
Na‘a nau hīkisia ‘i he heke hoku va‘e.
17He ko au ‘oku ou meimei humu ai pē,
Pea ko hoku hūkia ‘oku fe‘ao mo au ma‘u pē.
18He na‘e pau ke u fakahā ‘eku kovi;
Ko ‘eku hia ‘oku ou vaivai ai.
19Pea ko hoku ngaahi fili ‘oku mo‘ui, pea ‘oku nau mālohi;
Pea ko kinautolu ‘oku fehi‘a tu‘unga‘a pē kiate au ‘oku tokolahi.
20Ko honau anga foki ke totongi ‘a e lelei ‘aki ‘a e kovi.
Ko ia, ‘i he‘eku tuli ki he lelei na‘a nau fai hoku talatalaaki.
21‘Oua te ke li‘aki au, ‘e Sihova:
‘Oua te ke hiki ‘o mama‘o meiate au, ‘e hoku ‘Otua.
22Vave mai ke tokonia,
‘E ‘Ātonai ko hoku fakamo‘ui‘anga.
Currently Selected:
KO E SAAME 38: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
