KO E SAAME 36
36
Ko e Angahala‘ia ‘a e Tangatá mo e ‘Ofa ‘a e ‘Otuá
(Ki he Pule ‘o e Hiva. Ko e me‘a ‘a Tēvita ko e sevāniti ‘a Sihova.)
1‘OKU ai ha sikaina ‘o maumau lao
‘Oku nofo ‘i he angahala, ‘i hono tefito‘i loto;
‘Oku ‘ikai ha manavahē ki he ‘Otua#Lom 3.18
Ke fai ha ta‘ofi mei mu‘a.
2Koe‘uhi kuo ne ‘ai ke hā molemole ia ‘i he‘ene vakai,
‘I he mei ‘ilo ‘ene angahala ‘o ne fehi‘a ki ai.
3Ko e lau ‘a hono ngutu ko e kovi mo e kākā:
Ko e fakapotopoto mo e fai lelei kuo tuku ia.
4Ko ha kovi pē ‘oku ne fakakaukau‘i ‘i hono mohenga;
Ko e hala ‘oku ‘ikai lelei ‘oku ne hanga ‘o foua;
‘Oku ‘ikai te ne fakalili‘a ki he me‘a hala.
5‘E Sihova, ‘oku ‘asi ‘i he ngaahi langi ‘a ho‘o ‘alo‘ofa;
‘Oku a‘u ho‘o fai mo‘oni ki he ngaahi ‘ao na.
6‘Oku hangē ko e ngaahi mo‘unga-‘a-‘Otua ‘a ho‘o faitotonu;
Ko ho‘o ngaahi fakamaau ko ha moana hauhau:
‘E ‘Eiki, kuo ke fakamo‘ui mai ‘a e tangata mo e manu.
7Hono ‘ikai mahu‘inga ho‘o ‘ofa, ‘e ‘Otua!
Ko ia ko e fānau ‘a e kakai ‘oku hūfanga ki he malu ‘o ho kapakau na.
8‘Oku nau fu‘u mākona ‘i he ngako ‘o ho fale;
Pea ‘oku ke fakainu kinautolu ki he vaitafe ‘o ho ngaahi mālie.
9He ko e matavai ‘o e mo‘ui ‘oku ‘i he ‘Afiona:
‘I ho‘o maama te mau sio maama.
10Ke holo ange mu‘a ho‘o ‘ofa ki ha‘a ‘ilo ki he ‘Afiona;
Mo ho‘o faitotonu ki ha‘a loto totonua.
11‘Oua na‘a tu‘u kiate au ‘a e va‘e ‘oku laukau,
Pea ko e nima ‘o ha‘a faikovi, ke ‘oua te ne fakahee‘i au.
12Ko e hā kuo tō ai ‘a e kau ngāue hala:
Kuo ha‘aki kinautolu, pea ‘oku ‘ikai te nau lava ke langa.
Currently Selected:
KO E SAAME 36: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
