KO E SAAME 34
34
(Ko e me‘a ‘a Tēvita ‘i he‘ene liliu hono anga ‘i he ‘ao ‘o ‘Apimeleki ‘a ia na‘a ne kapusi ia, pea ne ‘alu.)#‘Ulu‘i Me‘a: 1 Sām 21.13-15
1KE U fakafeta‘i kia Sihova ‘i he taimi kotoa pē:
Ko hono fakamālō ‘e ‘i hoku ngutu ma‘u pē.
2‘E pōlepole hoku laumālie ‘ia Sihova:
‘E fanongo ki ai ‘a e kau tu‘utāmaki, pea te nau fiefia.
3Mou kau mo au ke viki ‘a Sihova,
Pea tau hākeaki‘i hono huafa fakataha.
4Na‘a ku ha‘ao ki he ‘Eiki, pea ne talia;
Pea ne hamusi au mei he‘eku ‘ū ilifia.
5Na‘a nau hanga kiate ia, pea nau maama leva:
Pea na‘e ‘ikai peko honau mata.
6Si‘i tu‘utāmaki ko ē na‘e tautapa, pea na‘e ongo‘i ‘e Sihova,
Pea ne fakahaofi mei hono faingata‘a kotoa.
7‘Oku ‘apitanga ‘a e ‘āngelo ‘a Sihova takatakai ki he‘ene kau ‘apasia,
Ke fai honau fakahaofia.
8Mou kamata ki he ‘Eiki,#1 Pit 2.3 ‘o ‘ilo ‘oku sai:
Monū‘ia ā ka ko e to‘a ‘oku hūfanga ki ai.
9Mou ‘apasia kia Sihova ‘a e kau lotu ‘a‘ana:
He ‘oku ‘ikai ha masiva ‘a e kau ‘apasia kiate ia.
10‘Oku ‘alefa pē ‘a e fanga laione#34.10 fanga laione: ‘I he tohi Sāmé ‘oku fa‘a faka‘ilonga‘i ‘aki ‘a e fanga manu fekaí ‘a e ngaahi fili ‘o e ‘Otuá. talavou, mo nau fiekakai:
Ka ko ha‘a kumi ki he ‘Eiki ‘e ‘ikai te nau masiva ha me‘a ‘e taha ‘oku lelei.
11Ha‘u ā, fānau, ‘o fanongo mai:
Ka u ako kiate kimoutolu ‘a e ‘apasia ki he ‘Eiki.
12Ko hai tū ha tangata ‘oku fie mo‘ui?#1 Pit 3.10-12
‘Oku manako ‘aho lahi ke ne sio ki ha lelei?
13Lama ho ‘elelo mei he kovi,
Mo ho loungutu mei he lea loi.
14Afe mei he kovi, ‘o fai lelei;
Kumi ki he melino, ‘o tuli ki ai.
15Ko e fofonga ‘o Sihova ‘oku lalama ki he kau mā‘oni‘oni,
Pea ‘oku ne fakaongo ke ma‘u ‘enau tangi.
16Ko e fōtunga ‘o e ‘Eiki ‘oku fe‘ao mo e kau faikovi,
Ke tu‘usi ‘a e manatu ki ai ‘a māmani.
17Na‘e tangi hake ‘a e fa‘ahinga ko ē, pea fanongo ‘e Sihova,
‘O ne hamusi mei honau faingata‘a kotoa.
18He ko e loto lavea ‘oku ofi ki ai ‘a e ‘Eiki,
Pea ‘oku ne fakamo‘ui ‘a kinautolu ‘oku laumālie mafesi.
19Ko e angatonu ‘oku lahi ‘ene ngaahi mamahi:
Ka ‘oku hamusi ia mei ai kotoa ‘e he ‘Eiki.
20‘Oku ne tauhi hono ngaahi hui kotoa:#Sioné 19.36
‘Oku ‘ikai fasi hanau taha.
21‘E tāmate‘i ‘a e angahala ‘e he kovi:
Pea ko kinautolu ‘oku fehi‘a ki he kau angatonu ‘e taute‘i.
22‘Oku huhu‘i ‘e he ‘Eiki ‘a e mo‘ui ‘a e kau tamaio‘eiki ‘a‘ana:
Pea ‘ilonga ha falala kiate ia ‘e ‘ikai fakahalaia.
Currently Selected:
KO E SAAME 34: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
