KO E SAAME 33
33
Hiva Fakamālō kia Sihova!
1MAVAVA ‘i he ‘Eiki, ‘a e kau mā‘oni‘oni:
Ko e me‘a tu‘utai ki he angatonu ‘a e fakafeta‘i.
2Fai ‘aki ‘a e ha‘ape ho‘omou fakamālō kia Sihova:
‘Aki ‘a e helefilo tu‘o hongofulu, tā ki he ‘Afiona.
3Hiva kiate ia ‘aki ‘a e hiva fo‘ou;
Tā ke mālie, pea ‘ai ke ongo atu.
4He ko e totonu ‘a e folofola ‘a e ‘Eiki;
Pea ko ‘ene ngaahi ngāue ‘oku fai ‘i mo‘oni.
5‘Oku ne manako ki he totonu, mo e fakamaau lelei:
‘Oku fonu ‘a māmani ‘i he ‘ofa ‘a e ‘Eiki.
6Na‘e ngaohi ‘a e ngaahi langi ‘aki ‘a e folofola ‘a Sihova;
‘Io, ko honau hōsitē kotoa ‘aki ‘a e mānava ‘o hono fofonga.
7‘Oku ne fokotu‘u ‘esi ‘a e tahi;
‘Oku ne fa‘oaki feleoko ‘a ngātai.
8Ke manavahē ‘a e fonua kotoa kia Sihova:
Ke teki ‘iate ia ‘a e nofo māmani kotoa.
9He na‘e folofola ia, pea ‘i ai leva;
Na‘a ne fekau, pea ma‘uma‘uluta.
10Ko Sihova ‘oku ne fakaiku noa ‘a e tu‘utu‘uni ‘a e ngaahi pule‘anga:
Ko e fakakaukau ‘a e ngaahi kakai ‘oku ne ta‘ofia.
11Ko e tu‘utu‘uni ‘a Sihova ‘e tu‘u ‘o ta‘engata,
Ko e ngaahi fakakaukau ‘a hono finangalo ‘e laui to‘utangata.
12Monū‘ia ā ka ko e pule‘anga ‘oku ‘otua ‘aki ‘a Sihova;
‘A e kakai kuo ne fili mōno tofi‘a.
13‘Oku hila hifo mei langi ‘a Sihova;
‘Oku ne māta‘i ‘a e hako‘i tangata kotoa;
14Mei hono potu ‘afio‘anga ‘oku ne fakasio mai
Ki he nofo kotoa ‘i māmani;
15‘A ‘Ene ‘Afio ‘oku ne ngaohi tāutaha ‘a honau loto kotoa pē,
‘A ‘Ene ‘Afio ‘oku ne sivi ‘enau ngaahi ngāue.
16‘Oku ‘ikai ha tu‘i ‘e tu‘umālie ko e tokolahi hono kakai:
‘Oku ‘ikai hao ha to‘a ko e lahi hono ivi.
17Ko e launoa ‘a e hoosi ke fakahaofi kita:
‘Io, neongo hono ngū lahi ‘e ‘ikai te ne hola takitaha.
18Vakai, ‘oku hila ‘a e fofonga ‘o Sihova kiate kinautolu ‘oku ‘apasia kiate ia,
Ki ha‘a matatali ki he‘ene ‘ofa;
19Ke hamusi honau laumālie mei he mate,
Pea ke fakamo‘ui kinautolu mei he honge.
20Kuo nofo‘aki tali hotau laumālie kia Sihova:
Ko hotau tokoni ia mo hotau pā.
21Seuke, ‘e fiefia hotau loto ‘i he ‘Afiona,
He kuo tau falala ki hono huafa tāpuhā.
22‘Eiki, ke hā kiate kimautolu ho‘o ‘ofa,
‘O taau mo ‘emau tatali ki he ‘Afiona.
Currently Selected:
KO E SAAME 33: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
