KO E SAAME 31
31
Ko e Lotu he Falala ki he ‘Otuá
(Ki he Pule ‘o e Hiva. Ko e Saame ‘a Tēvita.)
1‘EIKI, Kuo u hūfanga ki he ‘Afiona:
‘Oua te ke tuku au ke u mā ‘o ta‘engata:
Ka ‘i ho‘o totonu ke ke fakahaofi kita.
2Fakaongo hifo ho fofonga;
Vave mai ke hamusi kita:
Ke ke hoko kiate au ko hoku fale toinga,
Ko e koto fale tau ke fakahaofi kita.
3He ko hoku mo‘unga mo ‘eku holo ‘a e ‘Afiona;
Pea te ke tauhi mo taki au koe‘uhi ko ho huafa.
4Hu‘ihu‘i au mei he kupenga na
Kuo nau tu‘u fufū kia kita;
He ko koe ko hoku hao‘anga.
5‘Oku ou tuku hoku laumālie ki ho nima:#Luk 23.46
Kuo ke huhu‘i au, Sihova, ‘a e ‘Otua Mo‘onia.
6‘Oku ou fehi‘a kiate kinautolu ‘oku tauhi ‘a e ngaahi muna launoa:
Ka ko au ‘oku ou falala kia Sihova.
7Ka u hākahaka mo fakafiefia ‘i ho‘o meesi;
He kuo ke hanga ki he‘eku tu‘utāmaki;
Kuo ke ‘ilo ‘a e ngaahi faingata‘a ‘o ‘eku mo‘ui:
8Pea kuo ‘ikai te ke loki au ki he nima ‘o e fili;
Kuo ke fokotu‘u hoku va‘e ki ha potu fālahi.
9‘Ofa mai, ‘Eiki, he ‘oku ‘iate au ha faingata‘a:
Kuo ‘osi‘osi hoku mata ‘i he hoha‘a;
Pehē hoku loto mo hoku manava.
10Kuo ‘osi ‘eku mo‘ui ‘i he fakamamahi,
Mo hoku ngaahi ta‘u ‘i he māpuhoi:
Kuo ka‘anga hoku ivi, pea ‘osi‘osi hoku hui
Koe‘uhi ko ‘eku kovi.#31.10 kovi; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ngaahi faingata‘a‘ia.
11Ko e me‘a ‘i hoku ‘ū fili Kuo u hoko ko e ‘ita‘anga,
Pea ko e kavenga ki hoku kau nofo‘anga,
Pea ki hoku kau fe‘iloaki ko e ilifia‘anga:
Ka sio ha taha kiate au ‘i he hala, pea hola.
12Kuo ngalo au hangē ha pekia, mei he ‘atamai:
Kuo u hangē ha ipu li‘aki.
13He ne u fanongo ki he muhumuhu ‘a e tokolahi–
Ko e ilifia na‘e takatakai–
‘Enau puleaki‘i fakataha mai,
Na‘a nau fakakaukau ke ‘ave ‘eku mo‘ui.
14Ka ko au Kuo u falala kiate koe, ‘e Sihova:
Ne u pehē, Ko hoku ‘Otua ‘a e ‘Afiona.
15Ko hoku ngaahi taimi ‘oku ‘i ho nima:
Hāmusi au mei he nima ‘o hoku ngaahi fili, mo hoku kau fakatanga.
16Ke fakaulo mai ho fofonga ki ho‘o tamaio‘eiki:
Fakamo‘ui au ‘i ho‘o meesi.
17‘Eiki, ‘oua na‘a tuku au ke u mā;
He Kuo u tautapa ki he ‘Afiona:
Ko e kau angahala pē ‘e mā;
Te nau fakalongo pē ‘i lolofonua.
18Ke noa ‘a e loungutu loi,
‘Oku lau‘i ta‘emālū‘ia ‘a e mā‘oni‘oni,
He fielahi mo e ta‘etoka‘i.
19Hono ‘ikai lahi ho‘o koto lelei na,
‘A ia kuo ke fa‘o ma‘a e kau ‘apasia ki he ‘Afiona,
Pea ‘oku ke fai ma‘anautolu ‘oku unga ki he ‘Afiona
‘I he ‘ao ‘o e hako‘i tangata!
20‘Oku ke ‘ufi‘ufi kinautolu ‘i he toitoi‘anga ‘o ho fōtunga
Mei he ngaahi fa‘ahi ‘a e kakai;
‘Oku ke fufū kinautolu ‘i ho malu
Mei he ngaahi ‘elelo felau‘aki.
21Ke mālō‘ia mu‘a ‘a Sihova:
‘Ene fakato‘omata‘u ‘ene ‘ofa;
Kuo u ‘i ha kolo pā.
22Ka ko au–ne u lau ‘i he‘eku hoha‘a,
Kuo tu‘usi au mei he vakai ‘a ho fofonga:
Ka tā na‘a ke ongo‘i ‘a e le‘o ‘o ‘eku tautapa
‘I he‘eku tangi tokoni ki he ‘Afiona.
23‘Ē, mou ‘ofa kia Sihova, ‘ene kau lotu na:
‘Oku lehilehi‘i ‘e Sihova ‘ene kau tōnunga.
Ka ki he fielahi ‘oku ne totongi ‘aufua.
24Mou lototo‘a, ‘o tu‘u kalikali,
‘A ha‘a tatali ki he ‘Eiki.
Currently Selected:
KO E SAAME 31: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
