KO E SAAME 27
27
Ko e Lotu Fakahīkihiki
(Ko e me‘a ‘a Tēvita.)
1KO Sihova ‘a hoku maama mo hoku fakamo‘ui;
Te u manavahē kia hai?
Ko Sihova ‘a e kolo ‘o ‘eku mo‘ui;
Ko hai te u teteki ki ai?
2‘I he ‘unu kiate au ha kau faikovi
Ke kai hoku kakano,
‘A e fai mai hoku kau fakamamahi mo hoku ngaahi fili,
Na‘a nau humu pea tō.
3Neongo ‘e nofo‘i mai ha kongakau,
Ko hoku loto ‘e ‘ikai manavahē:
Neongo ‘e tu‘u kiate au ‘a e tau,
Na‘a mo ia te u falala pē.#27.3 Na‘a… pē; pe ‘E ‘ikai te u lotosi‘i.
4Kuo u kole meia Sihova ha me‘a pē taha,
Ko ia pē te u kumi ki ai;
Ke u nofo ‘i he fale ‘o Sihova
‘I he ‘aho kotoa ‘o ‘eku mo‘ui,
Ke siofi ‘a e faka‘ofo‘ofa ‘o e ‘Eiki,
Mo fakalaulauloto ‘i hono palasi.
5He te ne fufū au ‘i hono malu ‘i he ‘aho ‘o e kovi;
Te ne ‘ufi‘ufi ‘i he toitoi‘anga ‘o hono tēniti;
Ko e maka te ne hiki au ki ai.
6Pea ko eni te u hiki hoku ‘ulu ki hoku ngaahi fili ‘oku kāpui kita;
Pea te u feia ‘i hono tēniti ‘ani feilaulau mavava;
Te u hiva mo tā ha‘ape kia Sihova.
7Fanongo, ‘Eiki, hoku le‘o ‘i he‘eku tautapa atu:
Pea ke ‘ofa mai ‘o tali au.
8 Na‘a ke pehē koā, “Mou kumi ki hoku fōtunga”?
Na‘e tali atu hoku loto, “Ko ho fofonga, ‘Eiki, te u kumia.”
9‘Oua te ke fufū ho fofonga meia kita;
‘Oua te ke teke‘i ho‘o tamaio‘eiki ‘i he ‘ita:
Ko hoku tokoni ‘a e ‘Afiona ‘i mu‘a;
‘Oua ‘e tukuange au, pea ‘oua ‘e li‘ekina,
‘E hoku ‘Otua Fakamo‘ui‘anga.
10Neongo ‘e li‘aki au ‘e he‘eku tamai mo ‘eku fa‘ē,
‘E fakahoko au ‘e Sihova kiate ia pē.
11Huluhulu au ‘i ho hala, ‘Eiki,
Pea tataki au ‘i he hala tokalelei,
Telia ‘a e kakai ‘oku tokamalumu mai.
12‘Oua ‘e tukuange au ke fai ‘a e loto ‘o hoku ngaahi fili:
He kuo tu‘u kiate au ‘a e kau fakamo‘oni loi,
Mo e fa‘ahinga ‘oku hō ‘aki ‘a e fakamālohi.
13Ka ne ta‘e‘oua ‘eku tui
Ke mamata ki he lelei ‘o Sihova ‘i he fonua ‘o e mo‘ui–
14Nofo, ‘o sio ki he ‘Eiki:
Fakato‘oto‘a, pea ke tānaki ‘e ho loto ha ivi;
Tala atu, nofo ‘o sio ki he ‘Eiki.
Currently Selected:
KO E SAAME 27: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
