KO E SAAME 25
25
Ko e lotu Kole Fale‘i mo e Malu‘i
(Ko e me‘a ‘a Tēvita)
1‘E Sihova,
‘Oku ou hapai hake hoku laumālie kiate koe.
2‘E ‘Otua, Kuo u falala ki he ‘Afiona;
Ke ‘oua ā na‘a ku mā:
‘Oua ‘e pole ‘iate au hoku ngaahi fili na.
3‘Āua! ko e kau matatali ki he ‘Afiona ‘e ‘ikai fakamā;
‘E fakamā pē ‘a kinautolu ‘oku fai kākā tu‘unga‘a.
4‘Eiki, faka‘ilo mai ho ngaahi founga;
Ako kiate au ho ngaahi ‘alunga.
5Tataki au ‘i ho‘o mo‘oni, pea ako kita;
He ko koe hoku ‘Otua Fakamo‘ui‘anga;
Ko koe ‘oku ou ‘amanaki ki ai he ‘aho kotoa.
6Manatu, ‘Eiki, ki ho‘o faka‘atu‘i mo e fai ‘ofa;
He ‘oku talu mei tuai ia.
7Ko e ngaahi hia ‘o ‘ete talavou, mo ‘eku ngaahi angahala, ‘oua ‘e manatua:
Ko ho‘o manatu mai ke taau mo ho‘o ‘ofa,
Koe‘uhi ā, ‘Eiki, ko e lelei ‘o e ‘Afiona.
8‘Oku lelei mo angatonu ‘a Sihova,
Ko ia ai, ‘oku ne hulu ‘a e hala ki he kau hē na.
9Ko e anga vaivai te ne tataki ‘i he me‘a ‘oku ngofua:
‘Io, ko e anga vaivai te ne ako ki ai hono hala ‘o‘ona.
10Ko e ngaahi hala kotoa ‘o e ‘Eiki ko e koto ‘ofa mo e mo‘oni
Kiate kinautolu ‘oku tauhi ‘ene fuakava, mo ‘ene ngaahi fakamo‘oni.
11Koe‘uhi ko ho huafa, ‘Eiki–
Pe‘i fakamolemole ‘a ‘eku kovi, he ko e me‘a lahi.
12Ko e fe‘ia ‘a e tangata ‘oku ‘apasia ki he ‘Eiki?
Te ne hulu ia ki he hala ‘e fili ki ai.#25.12 ki… ai; pe ki he hala fungani.
13‘E ‘apitanga ‘i he monū hono loto;
Pea ‘e ma‘u ‘a e fonua ‘e hono hako.
14Ko e talanoa fufū mo Sihova ‘oku ma‘a e kakai ‘oku ‘apasia kiate ia,
Pea ko ‘ene fuakavá, ko e fakahinohino me‘a.#25.14 Pea ko… me‘a; pe Te ne faka‘ilo ki ai ‘ene faukavá.
15‘Oku hanga ma‘u pē hoku mata kia Sihova;
He ko ia ia te ne fakahao mai hoku va‘e mei he kupenga.
16Hanga kiate au, pea ke ‘alo‘ofa mai,
He Kuo u toko taha, pea tu‘utāmaki.
17Ko e ‘efihia hoku loto ke ke faka‘ata‘atā;
Pea fakahao mai au mei hoku ngaahi faingata‘a.
18Me‘a mai ki he‘eku mamahi, mo ‘eku ongosia;
Pea ‘ave kotoa ‘eku ngaahi hia.
19Me‘a ki hoku ngaahi fili he ‘oku nau tokolahi;
Pea ko ‘enau fehi‘a kiate au ko e fehi‘a fakafāsifasi.
20Tauhi ‘eku mo‘ui, ‘o hamusi kita;
Ke ‘oua na‘a ku mā, he Kuo u hūfanga ki he ‘Afiona.
21Ke male‘ohi au ‘e he haohaoa mo e loto totonua;
He ‘oku ou nofo ‘o sio ki he ‘Afiona.
22Vete ‘a ‘Isileli, ‘Otua ē
Mei he‘ene mamahi fua pē.
Currently Selected:
KO E SAAME 25: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
