KO E SAAME 22
22
Ko e Tangi Mamahi mo e Hiva Fakafeta‘i
(Ki he Pule ‘o e Hiva. Ke fai‘aki ‘a e fasi ko e “Tia ‘o e Pongipongi.” Ko e Saame ‘a Tēvita.)
1‘E HOKU ‘Otua, ‘e hoku ‘Otua, ko e hā kuo ke li‘aki ai au?#Māt 27.46; Ma‘ake 15.34
‘O fakamama‘o mei hoku tokoni; mei he le‘o ‘o ‘eku kavekalanga atu?
2‘E hoku ‘Otua, ‘oku ou tangi ‘aho, ka ‘oku ‘ikai ha‘o tali;
Pea u fai po‘uli, ‘o ‘ikai te u tuku ha taimi.
3Ka ‘oku ke mā‘oni‘oni,
‘A e ‘Afiona ‘oku ke nofo‘ia ‘a e ngaahi fakamālō ‘a ‘Isileli,
4Na‘e falala ‘emau ngaahi tamai kiate koe:
Na‘a nau falala, pea na‘a ke fakamo‘ui pē.
5Ko koe na‘e fai ki ai ‘enau kalanga, pea nau ‘atā:
Ko koe na‘e fai ki ai ‘enau falala, pea na‘e ‘ikai te nau mā.
6Ka ko au ko e kelemutu ‘o ‘ikai ko e tangata;
Ko e manuki‘anga ‘o e kakai, pea ta‘etoka‘i ‘e he fonua.
7‘Ilonga ha taha ‘oku sio mai ‘oku ne luma kiate au:#Māt 27.39; Ma‘ake 15.29; Luk 23.35
‘Oku nau fakatōtao honau ngutu, ‘oku nau kalokalo ‘a e ‘ulu.
8“Tekaki kia Sihova#Māt 27.43 –
Ke ne fakahaofi ia;
Ke ne hamusi ia, he ko hono mamana.”
9Kae fēfē, he ko koe na‘a ke to‘o au mei he manava;
‘I he‘eku ‘i he huhu ‘o ‘eku fa‘ē na‘a ke ngaohi au ke u falala.
10Na‘e lī atu au mei he manava ko ho‘o kavenga pē:
Ko hoku ‘Otua ai pē koe mei he fatu ‘o ‘eku fa‘ē.
11‘Oua te ke mama‘o meiate au, he ko e faingata‘a ‘oku ofi;
Pea ‘oku ‘ikai ha tokoni.
12Na‘e kāpui au ‘e he fanga pulu tokolahi;
Na‘e ha‘o au ‘e he ha‘a kaukaua ‘o Pēsani.
13‘Oku nau fakamanga honau ngutu kiate au,
Ko e laione tofu pē ‘oku kokohi mo kālou.
14Kuo u malingi hangē ha vai,
Pea ‘oku ngatōtō hoku ngaahi hui:
Kuo hangē ha uakisi hoku loto ia,
Kuo vaia ‘i hoku loto to‘oto‘onga.
15Kuo maha hoku ivi#22.15 hoku iví; Ko hono faka-Hepeluú ia, ka ‘oku ngali tonu hono hiki ‘o: hoku voló. ‘o hangē ko ha konga ipu kelekele;
Pea ‘oku piki hoku ‘elelo ki hoku kaungao ē;
Pea te ke ‘ai au ki he efu ‘o e mate.
16He ‘oku kāpui au ‘e he fanga kulī:
Kuo ha‘o au ‘e he fakataha ‘o e kau faikovi;
Ko hoku nima mo hoku va‘e na‘a nau vili.#22.16 vili; ‘Oku fihi hono faka-Hepeluú. ‘Oku ngali tonu hono hiki ‘o: halu‘i; pea ‘oku pehē pē ‘a e ngaahi hiki fuoloa ‘e ni‘ihi. Ka ‘oku pehē ‘i he ni‘ihi ia, ha‘i.
17‘Oku ou malau hoku ngaahi hui kotoa;
‘Oku sio fakamama‘u ‘e kinautolu na,
‘Oku nau siofia kita.
18‘Oku nau tufa fakaekinautolu hoku ‘ū kofu,
Pea ko hoku sote ‘oku nau talotalo ki hano ma‘u.#Māt 27.35; Ma‘ake 15.24; Luk 23.34; Sioné 19.24
19Kae‘oua te ke mama‘o koe, ‘Eiki:
‘E hoku Mālohinga, vave mai ke tokoni.
20Hāmusi mei he heletā ‘eku mo‘ui;
Si‘eku me‘a pē taha mei he fa‘iteliha ‘a e kulī.
21Fakahaofi au mei he ngutu ‘o e laione,
Pea mei he nifo ‘o e fanga pufaloe–
Tā kuo ke tali pē!#22.21 Tā kuo ke tali pē! Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘Oku ‘ikai haku tokoni.
22Ko ia ai, te u ‘a‘au ho hingoa ki hoku kāinga:#Hep 2.12
Te u fakamālō kiate koe ‘i he lotolotonga ‘o e fakataha.
23“A e kau ‘apasia kia Sihova, mou fakamālō kiate ia:
‘A e hako fuli pē ‘o Sēkope, mou fakahīkihiki‘i ia;
‘Io, pea mou ‘apasia kiate ia, ‘a ha‘a ‘Isileli kotoa.
24He na‘e ‘ikai te ne ta‘etoka‘i, pea na‘e ‘ikai te ne fakalili‘a
He mamahi ‘a si‘i fakamālohi;
Pea na‘e ‘ikai te ne hanga kehe meiate ia;
Pea ‘i he‘ene tangi ange na‘a ne talia.”
25Ko ‘eku fakamālō ‘i he fakataha lahi ‘oku mei he ‘Afiona:
Te u fai ‘eku tukumo‘ui ‘i he ‘ao ‘o e kakai ‘oku lotu kiate ia.
26‘E kai ‘e si‘i ta‘ali‘ekina, ‘o mākona:
‘E fakamālō kia Sihova ‘e ha‘a kumi kiate ia.
Ke mo‘ui homou loto ‘o ta‘engata!
27‘E manatu mo tafoki ki he ‘Eiki
‘a e ngaahi ngata‘anga ‘o māmani:
Pea ‘e hū ‘i he ‘ao ‘o e ‘Afiona
‘a e matakali fuli pē ‘o e tukui pule‘anga.
28He ko e pule ‘oku ‘ia Sihova;
Pea ‘oku ne tāfataha ‘i he ngaahi pule‘anga.
29‘E kai mo lotu ‘a e fa‘ahinga sino ‘o māmani:#22.29 ‘E kai… māmani; ‘Oku ngali tonu hono hiki ‘o: ‘E kai mo punou ki ai ‘a e kakai hīkisia kotoa pē.
Ko kinautolu kuo mei ‘alu hifo ki he efu te nau tū‘ulutui ki ai,
Mo ia ‘oku ‘ikai lava ke ta‘ofi hono laumālie ke mo‘ui.
30‘E ai ha hako te nau tauhi ki ai;
Pea ‘e fakahā ki he to‘utangata ko ē ‘a e me‘a ‘oku kau kia ‘Ātonai.
31Te nau ha‘u ‘o fakahā ‘ene mā‘oni‘oni;
Te nau tala ki ha kakai ka toki fanau‘i, “Kuo ne fai.”
Currently Selected:
KO E SAAME 22: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
