KO E SAAME 21
21
(Ki he Pule ‘o e Hiva. Ko e Saame ‘a Tēvita.)
1‘EIKI, ‘e fiefia ‘a e tu‘i ‘i ho ivi tokoni;
Pea hono nifi ‘ene tome‘e ‘i ho‘o fakamo‘ui!
2Ko e faka‘amu ‘a hono loto kuo ke ‘ange kiate ia,
Pea ko e kole ‘a hono loungutu na‘e ‘ikai te ke fakafisinga. (Sila)
3Pea ‘oku ke fakafetaulaki kiate ia mo e ngaahi tāpuaki, ‘a ia ko e koto lelei;
‘Oku ke ‘ai ki hono fofonga ha kalauni koula kuo sivi.
4Na‘a ne kole mo‘ui mei he ‘Afiona–
Na‘a ke ‘ange kiate ia;
Ko e mo‘ui ma‘u ai pē ‘o lauikuonga.
5‘Oku lahi hono ongoongo ‘i ho‘o fakamo‘ui:
‘Oku ke ‘ai kiate ‘ia ‘a e ngeia mo e lāngilangi.
6He ‘oku ke ngaohi ia ko e koto monū‘ia ‘o lauikuonga:
‘Oku ke fakafiefia ia ‘aki ‘a e fiefia ‘oku fe‘ao mo e ‘Afiona.
7He ‘oku falala ‘a e tu‘i kia Sihova,
Pea ‘i he ‘ofa ‘a ‘Elioni ‘e ‘ikai ue‘i ia.
8‘E taea ‘e ho nima ho ngaahi fili fua pē:
Ko ho to‘omata‘u te ne tatae ‘a e kakai ‘oku fehi‘a kiate koe.
9Te ke fai kiate kinautolu ‘o hangē ha ngoto‘umu kakaha
‘I he taimi ‘o ho‘o fakafulofula.
‘E fōngia kinautolu ‘e Sihova ‘i he‘ene tuputāmaki,
Pea ‘e keina kinautolu ‘e ha afi.
10Te ke faka‘auha mei māmani honau fua,
Mo ‘enau fānau mei he hako‘i tangata.
11Na‘a nau teuaki kiate koe ha kovi:
Na‘a nau fakakaukau‘i ha me‘a na‘e ‘ikai te nau lava ke faka‘osi.
12He te ke ngaohi kinautolu ke nau sītu‘a,
Te ke faka‘ata ki honau mata ‘a ho‘o ngaahi uka.
13‘Eiki, ke mā‘olunga ai pē ho‘o māfimafi:
Ka mau hiva mo fakamālō ‘i ho‘o ngāue tu‘utai.
Currently Selected:
KO E SAAME 21: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
