KO E SAAME 19
19
Ko e Ngeia ‘o e ‘Otuá ‘oku Hā he Fakatupú
(Ki he Pule ‘o e Hiva. Ko e Saame ‘a Tēvita.)
1KO E ngaahi langi ‘oku nau tala ‘a e nāunau‘ia ‘o e ‘Otua,
Pea ‘oku fakahā ‘e he ‘atā ‘a e ngāue ‘a hono nima.
2Ko e ‘aho ko ē ‘oku ne pu‘aki talanoa ki he ‘aho ko ē:
Pea ko e pō ko ē ‘oku ne fanafana me‘a ki he pō ko ē.
3‘Oku ‘ikai hua‘aki ha le‘o, ‘oku ‘ikai ha ngaahi kupu‘i lea,
Ko honau le‘o ‘oku ta‘efanongoa.
4‘Oku ‘asi atu ‘i he fonua kotoa ‘enau ‘otu tohi,#19.4 ‘enau ‘otu tohi; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: ‘enau afó; pe ‘enau pōpoakí.
Pea a‘u ‘enau ngaahi lea ki he ngata‘anga ‘o māmani.
Ko e tēniti ma‘a e la‘ā kuo ne fokotu‘u ai;
5Pea ‘oku hangē ia ko ha ‘eiki ta‘ane ‘ene ha‘u mei hono loki;
‘Oku ne fiefia ‘o hangē ha teu pue ‘a ha tangata mālohi.
6Mei he taupotu ‘o langi ‘oku fai ‘ene ‘alu atu ‘ana,
Pea ‘oku a‘u ‘ene takai ki he taupotu ‘e taha,
Pea ‘oku ‘ikai ha me‘a ‘e lilo ‘i hono māfana.
7Ko e lao ‘a Sihova ‘oku haohaoa, ‘oku fakafoki ai ‘a e laumālie;
Ko e fakamo‘oni ‘a Sihova ‘oku pau, ‘oku fakapoto ai si‘i ta‘efie vale.
8Ko e ngaahi enginaki ‘a Sihova ‘oku totonu, ‘oku fakatupu loto fiefia:
Ko e tu‘utu‘uni ‘a Sihova ‘oku tafesino‘ivai, ‘oku fakamaama ai ‘a e mata.
9Ko e ngeia ‘o Sihova ‘oku ma‘a, ‘oku tu‘u ma‘u ‘o ta‘engata;
Ko e ngaahi fakamaau ‘a Sihova ko e fo‘i mo‘oni: ko e koto totonu ‘ata‘atā
10Me‘a mahu‘inga ange ia ‘i he koula,
‘Io, ha koula lelei mo lahi;
Me‘a melie ange ‘i he honi, ‘io, ‘a e honi ‘oku to‘i noa mai.
11Kae‘uma‘ā ‘oku hīnoi‘i ai ho‘o tamaio‘eiki,
Pea ‘i hono tauhi ‘oku iku ai ki ha fu‘u totongi.
12Ko e me‘a ki ha‘ate ngaahi hē–ko hai te ne fa‘a ‘ilo?
Ke ke lau au ‘oku ou ‘atā ‘i he ngaahi me‘a lilo.
13Ta‘ofi foki ho‘o tamaio‘eiki mei he ngaahi angahala ‘oku fai pau‘u:
Ke ‘oua na‘a nau pule‘i au:
Te u toki haohaoa ai,
‘O ‘ata‘atā mei he angahala lahi.
14‘E Sihova, ke hoko lelei ki ho ‘ao
‘a e ngaahi lea ‘a hoku ngutu ni,
Mo e fakakaukau ‘a hoku loto,
‘A e ‘Afiona ko hoku
Mo‘unga mo hoku Koeli!
Currently Selected:
KO E SAAME 19: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
