KO E SAAME 18
18
Ko e Hiva Ma‘alai ‘a Tēvita
Ki he Pule ‘o e Hiva. Ko e me‘a ‘a Tēvita ko e Tamaio‘eiki ‘a Sihova, pea na‘a ne fai ki he ‘Eiki ‘a e ngaahi lea ‘o e ta‘anga ni ‘i he ‘aho na‘e fakahaofi ai ia ‘e Sihova mei he nima ‘o hono fili fua pē, Kae‘uma‘ā mei he nima ‘o Saula; pea ne lau ‘o pehē (2 Sām 22.1-51):
1‘OKU OU hau‘alofa‘ia ki he ‘Afiona,
‘A hoku mālohinga ko Sihova.
2Ko hoku mo‘unga ‘a Sihova, mo ‘eku kolo, mo hoku hao‘anga;
Ko hoku ‘Otua ko hoku makatu‘u ia, ‘a ia ‘oku fai ki ai ‘eku hūfanga:
Ko ‘eku pā, mo hoku nifo fakamo‘ui: ko hoku fu‘u taua.
3Ko e Fakamālō‘ia ‘oku fai ki ai ‘a ‘eku tautapa, ‘a e ‘Eiki:
Ko ia ai, ‘oku fakahaofi au mei hoku ngaahi fili.
4Na‘e ha‘o au ‘e he ngaahi kafa ‘a Mate;
Ko e ngaahi vaifā ‘o e pau‘u na‘e fakatupu ‘eku manavahē.
5Na‘e takai au ‘e he ngaahi kafa ‘a Hētesi:
Ko e ngaahi tauhele ‘a Mate na‘e fakafetaulaki mai.
6‘I he fa‘aki mai ‘a e faingata‘a na‘a ku tautapa kia Sihova,
‘Io, na‘a ku kavekalanga ki hoku ‘Otua–
Na‘a ne ongona hoku le‘o mei hono temipale na:
‘Io, na‘e a‘u ki hono ‘ao ‘eku kalanga–
Na‘e tau ki hono fofonga.
7Ngaue ai leva mo ngalulu ‘a e fonua,
Pea ngatōtō ‘a e ngaahi tefito‘i mo‘unga;
‘Io, nau ngaueue, he kuo ne ‘ita.
8Na‘e ‘alu hake ha kohu mei hono ihu,
Pea keina atu ‘e ha afi mei hono ngutu:
Na‘e tutu ‘aki hani maka ‘afu.
9Na‘a ne ofe‘i foki ‘a e langi, ‘o ne ha‘anu hifo,
Pea na‘e ‘i hono lalo va‘e ‘a e ‘ao fatu.
10Pea ne heka selupimi,#18.10 selupimi; Vakai ki he “Ngaahi Huluhulu”. ‘o ne puna mai:
‘Io, na‘a ne tatele ‘aki ‘a e kapakau ‘o e matangi.
11Na‘a ne ngaohi ‘a e fakapo‘uli ko hono potu lilo, ko hono tēniti takatakai;
Ko e fakapo‘uli ‘o e ‘ao vai, ko e ngaahi ‘ao matolu ‘o langi.
12Mei he maama na‘e mu‘omu‘a ‘iate ia
Na‘e ‘asi mai ‘i hono ngaahi ‘ao matolu na
‘a e ‘uha maka mo e maka kuo vela.
13Na‘e mana foki ‘i he langi ‘a Sihova;
Pea ‘ai atu ‘e ‘Elioni ‘ene lea:
‘Uhamaka ai mo e maka vela.#18.13 Pea ‘ai… maka vela; Ko hono faka-Hepeluú ia, ka ‘oku pehē he hiki fuoloa ‘e taha: pea fanongoa ‘a e le‘o ‘o ‘Elioní (pea vakai kia 2 Sām 22.14).
14Pea ne ‘ai atu ‘ene ngaahi ngahau, ‘o veteki kinautolu;
Mo e ngaahi ‘uhila lahi, ‘o nuiki kinautolu.
15Toki hā ai ‘a e ngaahi kilisi vai,
Pea tatala ‘a e takele ‘o māmani,
‘I ho‘o fai ho‘o valoki, ‘e Sihova,
‘I he māfulu ‘a e mānava ‘o ho fofonga.
16Na‘a ne mafao hifo mei ‘olunga, ‘o puke mai:
Pea ne toho au mei he ngaahi vai lahi.
17Na‘a ne fakahaofi au mei hoku fili fu‘u mamalu
‘Io, meiate kinautolu na‘e fehi‘a kiate au,
He na‘a nau mālohi fau.
18Na‘a nau fakafetaulaki mai ‘i he taimi ‘o ‘eku ‘efitu‘ua;
Ka na‘e ‘i ai ‘a Sihova mōku pāletu‘a.
19Pea na‘a ne fakahū mai au ki he potu ‘atā fau;
Na‘a ne huhu‘i au, koe‘uhiā na‘a ne mamana kiate au.
20Kuo fai ‘e Sihova kiate au ke hoa mo e totonu ‘o ‘eku fai anga;
Kuo ne totongi kiate au ‘o taau mo e ma‘a ‘o hoku nima.
21He Kuo u tauhi ‘a e ngaahi ‘alunga ‘o Sihova,
Pea kuo te‘eki te u hiki kovi mei hoku ‘Otua.
22He ko ‘ene konisitūtone kotoa na‘e feangai mo au,
Pea ko ‘ene ngaahi lao–‘oku ‘ikai te u teke‘i atu.
23Kuo ta‘emele foki ‘eku fakafe‘ao kiate ia,
Pea Kuo u mata‘ofi au mei ha‘aku ni hia.
24Ko ia kuo totongi mai ‘e Sihova ke hoa mo e totonu ‘o ‘eku fai anga
Ke tuha mo e ma‘a ‘a hoku nima ‘i he‘ene vakai ‘a‘ana.
25‘I he fai mo e kakai lelei te ke takataka failelei;
‘I he fai mo ha fita ta‘emele te ke takataka ta‘emele;
26‘I he fai mo e ha‘a ta‘efioa te ke takataka ta‘efioa;
Pea ka fai mo ha fa‘ahinga mamio te ke tau‘aki fangatua.
27He ko koe ‘oku ke fakamo‘ui ha‘a ta‘ali‘ekina;
Ka ko e matahihiki ‘oku fakatōkilalo‘i ‘e he ‘Afiona.
28He ko koe ‘oku ke fakaulo ‘eku maama:
‘Oku huluhulu ‘eku po‘uli ‘e Sihova ko hoku ‘Otua.
29Seuke te u ‘ohofia ha kongakau ‘i he ‘Afiona,
Te u hopokia#18.29 te u ‘ohofia… hopokia; ‘Oku hiki ‘e he ni‘ihi: ‘Oku ou ‘ohofia… ‘Oku ou hopokia; ka ko e ni‘ihi, Kuo u ‘ohofia… Kuo u hopokia. ha puke ‘i he kau ‘a hoku ‘Otua.
30Ko e me‘a ki he ‘Otua–ko hono ‘alunga ‘oku haohaoa:
Ko e folofola ‘a e ‘Eiki kuo ‘osi-‘a-sivi ia;
Ko e fakaū ia ki he kakai ‘oku hūfanga kiate ia.
31He ko hai ha ‘Otua, ‘oka tuku ‘a Sihova?
Pea ko hai ha mo‘unga, ‘oka ne ta‘e‘oua hotau ‘Otua?
32‘a e ‘Otua ‘oku ne ‘omi ivi mōku no‘o vala,
‘O ne ngaohi hoku ‘alunga ke haohaoa.
33‘A ia ‘oku ne ngaohi hoku va‘e ke hangē ko e motu‘a tia:#Hap 3.19
‘O ne ‘ai ke u matu‘u ‘i hoku ngaahi potu mā‘olunga.
34‘A ia ‘oku ne ako ki he tau ‘a hoku ‘ulu‘ulunima;
Ko ia ai, ‘oku mateke ‘e hoku ongo nima ni ha kaufana ukamea.
35Pea kuo ke ‘omi kiate au ho pā fakamo‘ui:
Pea ko ho nima to‘omata‘u kuo ne poupou mai,
Pea ko ho‘o fakaalaala Kuo u hoko ai ‘o fu‘u lahi.
36Kuo ke fakalaulahi ‘a e potu ‘oku ou laka ai,
Ko ia, kuo ‘ikai ke fengatāliaki ai ‘a hoku tunga‘i va‘e ni.
37Na‘a ku tuli hoku ngaahi fili, ‘o u ma‘u foki:
Pea na‘e ‘ikai te u liu mai kae‘oua ke nau ‘osi.
38Na‘e pehē ‘eku taa‘i kinautolu, na‘e ‘ikai te nau lava ke tu‘u hake;
Kuo nau tō ki hoku lalo va‘e.
39He na‘a ke no‘o ‘aki au ‘a e mālohi ki he tau:
Ko e kakai na‘e tu‘u mai kuo ke lolo ki lalo ‘iate au.
40Ko hoku ngaahi fili foki na‘a ke ‘ai ke nau sītu‘a,
Pea ko kinautolu na‘e fehi‘a kiate au na‘a ku faka‘auha.
41Na‘a nau tautapa ka na‘e ‘ikai ha tokoni;
Na‘a nau fai kia Sihova, ka na‘e ‘ikai te ne tali.
42Pea u toki momosi kinautolu ke ‘ave ‘e he matangi ‘o hangē ko e efu:
Ke hangē ko e pela ‘o e hala ‘i he‘eku hakaluku.
43Kuo ke fakahaofi au mei he ngaahi fakafekāke‘i ‘a e kakai;
Kuo ke ngaohi au ko e ‘ulu ki he tukui pule‘anga muli:
‘Oku nofo kiate au ha kakai ‘oku ‘ikai te u ‘ilo‘i.
44‘I he ongoongo atu au ki honau telinga na‘a nau tali leva ‘eku fekau:
Ko e hako‘i kehe na‘a nau fakamalua kiate au.
45Ko e hako‘i kehe na‘a nau vaivai maha,
Na‘a nau ha‘u tetetete pē mei honau talitau‘anga.
46‘Oku mo‘ui ‘a Sihova;
Pea ‘oku fakamālō‘ia hoku mo‘unga;
Pea ‘oku hākeaki‘i hoku ‘Otua fakamo‘ui‘anga.
47‘a e ‘Otua ‘oku ne fai sauni ma‘aku,
Mo ne fakamo‘ulaloa kakai kiate au.
48‘A ia ‘oku ne fakamo‘ui au mei hoku ngaahi fili:
‘Io, ‘oku ke fakamā‘olunga au ‘i he kakai ‘oku tu‘u mai.
Kuo ke hamusi au mei he tangata fakamālohi.
49Ko ia ai, ‘e Sihova,
Te u fakafeta‘i ki he ‘Afiona,
‘I he ‘ao ‘o e ngaahi pule‘anga:#Lom 15.9
‘Io te u hiva fakamālō ki ho huafa.
50‘a e ‘Afiona ‘oku ne fakato‘omata‘u ‘a e fakamo‘ui ‘o ‘ene tu‘i;
Pea ‘oku ne fai ‘ofa ki he‘ene pani,
Kia Tēvita mo e hako ‘o‘ona,
‘E fai pē ‘o lauikuonga.
Currently Selected:
KO E SAAME 18: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
