KO E SAAME 147
147
Ko e Himi Fakahīkihiki‘i ‘o e ‘Otua Māfimafí
1HALELU‘IA!
He ‘oku lelei ke tā ha‘ape ki hotau ‘Otua;
‘Io, ‘oku sai: ‘oku matamatalelei ‘a e hiva halelu‘ia.
2He ‘oku langa ‘a Selusalema ‘e he ‘Eiki;
‘Oku ne tānaki ‘a e fakahee‘i ‘o ‘Isileli,
3He ko e loto mafesi ‘oku ne faito‘o,
Pea ‘oku ne ha‘iha‘i honau ngaahi kafo.
4‘A ‘ene ‘Afio ‘oku ne lau ‘a e ngaahi fetu‘u pe ‘oku fiha;
‘Oku ne fakahingoa honau kotoa.
5‘Oku lahi hotau ‘Eiki, pea fu‘u kaukaua;
Pea ko ‘ene ‘ilo ‘oku ta‘emalaua.
6Ko e taha ‘a Sihova ‘oku ne puke hake ‘a e ngaohikovia:
Ka ne tulaki ki he kelekele ‘a e kau angahala.
7Tali ‘aki ‘a e fakafeta‘i kia Sihova;
Tā ha‘ape ki hotau ‘Otua:
8‘A ‘ene ‘Afio ‘oku ne ‘ufi‘ufi ‘aki ‘a e langi ‘a e ngaahi ‘ao na,
‘Oku ne teuteu ma‘a e kelekele ‘a e ‘uha,
‘Oku ne ngaohi ‘a e mohuku ke tupu ‘i he ngaahi mo‘unga.
9‘Oku ne ‘ange ki he monumanu ‘enau me‘akai,
Ki he fanga ki‘i lēvani ‘i he‘enau tangi.
10Tala‘ehai ‘oku ne sai‘ia ‘i he ngū ‘o e hoosi:
Tala‘ehai ko e ongo va‘e ‘o e tangata ‘oku ne mahu‘inga‘ia ai.
11‘Oku mahu‘inga‘ia ‘a e ‘Eiki ‘i he kakai ‘oku ‘apasia kiate ia,
‘A e fa‘ahinga ‘oku nofo‘aki tali ki he‘ene ‘ofa.
12‘E Selusalema, ha‘aki ‘a e fakafeta‘i kia Sihova:
‘E Saione, fakamālō‘ia ho ‘Otua.
13He kuo ne fakama‘u he ngaahi matanikolo hono songo;
Kuo ne tāpuaki‘i ho‘o fānau ‘i loto kolo.
14‘Oku ne ngaohi ho kau‘ā ko e koto melino pē;
‘Oku ne fakamākona ‘aki koe ‘a e ‘elito‘i uite.
15‘Oku ne tuku atu ‘ene fekau ki Maama;
‘Oku lele vave ‘aupito ‘ene folofola.
16‘Oku ne ‘ange ‘a e sinou hangē ko e vavae;
‘Oku ne tūtuu‘i ‘a e hahau maka hangē ha efu valevale.
17‘Oku ne laku atu ‘ene ‘aisi hangē ni momo‘i mā:
Ko hai ‘e matu‘uaki ‘ene momoko fakamohe me‘a?
18‘Oku ne tuku atu ‘ene folofola, pea nau ‘ā ai:
‘Oku ne fakaangi ‘ene matangi, pea tafe ‘a e ngaahi vai.
19‘Oku ne fakahā ‘ene folofola ki ha‘a Sēkope,
‘Oku ne fakahā ki ‘Isileli ‘ene ngaahi fekau mo konisitūtone.
20Tala‘ehai kuo ne fai pehē ki ha kakai ‘e taha:
Pea ko e me‘a ki he‘ene konisitūtone kuo ‘ikai te nau ‘ilo ia.
HALELU‘IA!
Currently Selected:
KO E SAAME 147: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
