KO E SAAME 104
104
1FAKAFETA‘I kia Sihova ē,
‘A hoku laumālie.
Sihova ko hoku ‘Otua, ‘oku ke mā‘olunga faufau;
Ko e ngeia mo e lāngilangi ‘a ho kofu.
2‘A ‘ene ‘Afio ‘oku ne ‘ai ‘a e maama hangē ha pulupulu;
Ho‘o folahi ‘a e langi hangē ha tatau:
3‘Oku ne fa‘u hono ngaahi loki ‘olunga ‘i he vai;#104.3 ngaahi loki ‘olunga ‘i he vai; pe ‘apí ‘i he fukahi vai ‘i ‘olungá. Ko e lau eni ki he vai na‘e tui ‘a e kakai ‘i ono‘ahó ‘oku nofo ‘i he tu‘a vavaá (vakai kia Sēn 1.6-7).
Ko e ngaahi ‘ao ‘oku ne sāliote ‘aki;
‘Oku ne hā‘ele ‘i he ngaahi kapakau ‘o e matangi:
4‘Oku ne ngaohi ‘ene kau talafekau ko e ngaahi matangi;#Hep 1.7
Mo ‘ene kau ngāue ko e ulo‘i afi.#104.4 ‘Oku ne ngaohi… ulo‘i afi; pe ‘Okú ne talafekau ‘aki ‘a e ngaahi matangi. ‘Oku ne ngāue ‘aki ‘a e ulo‘i afi.
5Na‘a ne fakama‘u ‘a e fonua ki hono ngaahi tu‘unga,
Ke ‘oua na‘a ue‘i ‘o lauikuonga pea ta‘engata.
6Hangē ha kofu na‘a ke ‘ufi‘ufi ‘aki ‘a e loloto;
Na‘e ‘i ‘olunga ‘a e vai, ka ko e ngaahi mo‘unga ‘i lalo.
7‘I he fai ho‘o valoki na‘a nau hola;
Na‘a nau ‘ohovale ‘i he ongo mai ho‘o mana.
8Na‘a nau hake he ngaahi mo‘unga, na‘a nau hifo he ngaahi vanu,
Ki he potu ko ē na‘a ke tokonaki ma‘anautolu.
9Kuo ke ‘ai honau kau‘ā ke ‘oua te nau laka ai;
Ke ‘oua te nau foki ke ‘ufi‘ufi ‘a māmani.
10‘a e ‘Afio ‘oku ne tuku matavai atu ‘i he ngaahi tele‘a;
‘Oku nau tafe ‘i he ngaahi vaha‘a mo‘unga;
11‘Oku nau fakainu ‘a e manu kotoa pē ‘o e vao;
Ko e fanga ‘asi hehengi ‘oku nau inu ke topono.
12Mei ‘olunga ‘oku ma‘u nofo‘anga ‘e he manu ‘o e ‘atā,
‘Oku nau ‘ai atu ‘enau hiva ‘i he ngaahi taunga va‘a.
13‘A ‘ene ‘Afio, si‘ene fakainu ‘a e ngaahi mo‘unga mei hono ngaahi loki ‘i ‘olunga:
‘Ā, ‘oku topono ‘a e fonua ē
‘I he fua ho‘o ngāue.
14Si‘ene fakatupu musie ma‘a e tākanga.
Mo e mohuku ke ngoue‘i ‘e he tangata;
Ke fakatupu me‘akai mei he fonua.
15‘Io, ‘a e uaine ‘oku ne fakafiefia ‘a e loto ‘o si‘i vaivai,
‘O ngingila vave hono mata ‘i hono takai: Mo e mā ‘oku mālohi ai ‘a e loto ‘o e ngaluvai.#104.15 Ko e potu ko eni ‘oku fihi.
16Na‘a mo e ngaahi ‘akau ‘a e ‘Eiki ‘oku topono;
‘A e ngaahi sita ‘o Lepanoni ‘a ia kuo ne tō.
17‘A ia ‘oku ngaohi ai ‘e he fanga manu honau pununga:
Ka ko e sitoaki ‘oku ‘i he paini hono nofo‘anga.
18Kuo tuku ki he kosi hehengi ‘a e ngaahi mo‘unga mā‘olunga;
Ko e fanga safana ‘oku hūfanga ki he lilifa.
19Na‘a ne ngaohi ‘a e māhina ke lau kuonga:
‘Oku ‘ilo ‘e he la‘ā hono tō‘anga.
20‘Oku ke ngaohi po‘uli, pea pō;
Ngatolo mai ai ‘a e fanga manu ‘o e vao.
21‘Oku kō si‘i laione mui he‘ene ‘a‘alu,
‘O ne kumi meia ‘Ela ha me‘a ke ne lamu.
22‘Oku hopo ‘a e la‘ā–‘oku nau moulu atu,
Pea nau tākoto ‘i honau ngaahi tafu.
23‘Alu atu ‘a e tangata ki he ngāue ‘oku ne fai,
Mo hono fatongia ‘o a‘u ki he efiafi.
24Hono ‘ikai ko e fu‘ufu‘unga me‘a ho‘o ngaahi ngāue, ‘e Sihova!
Pea ko e poto kuo ke ngaohi ‘aki hono kotoa:
‘Oku fonu ‘a māmani ‘i ho‘o koloa.
25Ko e tahi ena,
Lahi mo fu‘u mafola,
Ta‘emalaua ‘a e me‘a ‘oku ngaue ai,
‘A e manu iiki fakataha mo e fu‘u lalahi.
26‘I ai ‘a e ngaahi vaka ‘oku fefolau‘aki;
Ko e levaiatani ena kuo ke ngaohi ke fakavā ai.#104.26 ke fakavā ai; pe ke ke lōlōfia aí. #Siope 41.1; Saame 74.14; ‘Ais 27.1
27‘Oku nau sio hake kotoa ki he ‘Afiona,
Ke ke ‘ange ‘enau me‘akai hono kuonga.
28Ko e me‘a ‘oku ke ‘ange ki ai ‘oku nau tufi;
Ko e mafola leva ho nima ‘oku nau mākona ‘i he lelei.
29‘Oku ke hanga kehe–pea nau puputu‘u;
‘Oku ke tānaki mai honau mānava–
pea nau mate ‘o foki ki honau efu.
30‘Oku ke fekau atu ho Laumālie#104.30 ‘Oku… Laumālie; pe ‘Okú ke tuku atu ho mānava. –‘oku nau tupu ai;
Pea ‘oku ke fakafo‘ou ‘a e funga ‘o māmani.
31Ke tu‘u ‘o ta‘engata ‘a e lāngilangi ‘o Sihova;
Ke fiefia ‘a Sihova ‘i he ngaahi ngāue ‘a‘ana.
32‘A ‘ene ‘Afio ‘oku ne hila ki he fonua, pea ‘oku ngalulu;
‘Oku ne ala ki he ngaahi mo‘unga, pea nau kohu.
33Ka u hiva kia Sihova ke ‘osi ‘eku mo‘ui:
Ka u tā ha‘ape ki he ‘Otua lolotonga ‘eku ‘i ai.
34Ko ‘eku fakalaulauloto, ‘ofa ke mālie‘ia ai ‘a e ‘Afiona:
Ko au te u fiefia ‘ia Sihova.
35Ke faka‘auha ‘a e kau angahala mei māmani,
Pea ke ‘oua na‘a kei ‘i ai ‘a e angakovi.
Hoku laumālie, ke ke fakafeta‘i kia Sihova.
Halelu‘ia!
Currently Selected:
KO E SAAME 104: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
