KO E SAAME 103
103
Ko e ‘Ofa ‘a e ‘Otuá
(Ko e Saame ‘a Tēvita)
1FAKAFETA‘i kia Sihova, ‘a hoku laumālie:
Mo ia kotoa pē ‘oku ‘iate au,
Fakafeta‘i ki hono huafa mā‘oni‘oni ē
2Fakafeta‘i kia Sihova, ‘a hoku laumālie;
Pea ‘oua na‘a ngalo ‘ene me‘a‘ofa fuli pē:
3‘A ia ‘oku ne fakamolemole ho‘o angahala fua pē;
‘A ia ‘oku ne faito‘o ho ngaahi mahaki kotoa pē;
4‘A ia ‘oku ne huhu‘i mei he ‘auha ‘a ho‘o mo‘ui;
‘A ia ‘oku ne fakakalauni ‘aki koe ‘a e ‘ofa mo e fai faka‘atu‘i:
5‘A ia ‘oku ne fakamākona ‘i he lelei ‘a ho‘o a‘ua‘u,#103.5 ‘a ho‘o a‘ua‘u; pe ‘a ho ngutu. ‘Oku ‘ikai ke mahino ‘a hono faka-Hepeluú, ka ‘oku ngali tonu ‘a hono hiki ‘o: ‘a ‘eku mo‘uí.
Tupu fo‘ou hangē ha ‘īkale ho‘o talavou.
6‘Oku fai ‘a e ngaahi totonu ‘e Sihova,
Mo e ngaahi fakamaau ma‘a e kakai ‘oku fakamo‘ulaloa.
7Na‘a ne fakahā hono ngaahi founga kia Mōsese,
Pea ki ha‘a ‘Isileli ‘ene ngaahi ngāue.
8‘Oku manava‘ofa mo angalelei ‘a Sihova!#Sēm 5.11
‘Oku ne tuai ki he houhau, pea mohu ‘alo‘ofa.
9‘E ‘ikai fai ai pē ‘ene tautea,
Pea ‘e ‘ikai te ne tauhi ‘ene ‘ita ‘o ta‘engata.
10Kuo ‘ikai te ne fai kiate kitautolu ‘o fakatatau mo ‘etau ngaahi angahala,
Pe totongi kiate kitautolu ‘o fakatatau mo ‘etau ngaahi hia.
11He hangē ko e mā‘olunga ‘a e langi ki he fonua,
‘Oku pehē ‘a e lahi ‘o ‘ene ‘alo‘ofa
Kiate kinautolu ‘oku ‘apasia kiate ia.
12Hangē ko Hahake mo Hihifo hona vāmama‘o,
‘Oku mama‘o pehē ‘ene ‘ave ‘iate kitaua ‘eta ngaahi maumau lao.
13Hangē ‘oku faka‘atu‘i ‘e ha tamai ‘a e fānau ‘a‘ana,
Pehē ‘oku faka‘atu‘i ‘e Sihova ‘a e kakai ‘oku ‘apasia kiate ia.
14He ‘oku ne ‘ilo ‘e ia hota anga;
‘Oku ne manatu ai pē ko e efu pē kitaua.
15Ko e me‘a vaivai na ko e tangata ‘oku tatau mo e mohuku hono ngaahi fo‘i ‘aho,
Pea ko ‘ene matamatalelei ‘oku tatau mo ha fisi‘i ‘akau vao.
16He ‘oku laka atu ai ‘a e matangi, pea kuo ‘ikai,
Pea ‘oku ‘ikai ke kei ‘ilo‘i ia ‘e he potu na‘a ne ‘i ai.
17Ka ko e ‘ofa ‘a Sihova ‘oku talu mei mu‘a ‘o ta‘engata
Kiate kinautolu ‘oku ‘apasia kiate ia;
Pea ‘oku a‘u ‘ene faitotonu ki he fānau mo e makapuna;
18Kiate kinautolu ‘oku tauhi ‘ene fuakava,
Mo kinautolu ‘oku manatu ‘ene ngaahi fekau ke fai ia.
19Kuo fokotu‘u ‘e Sihova hono taloni ‘i he ngaahi langi na;
Pea ‘oku pule ‘e hono pule‘anga ki he me‘a kotoa.
20Fakafeta‘i kia Sihova, ‘a ‘ene kau ‘āngelo na,
Ha‘a to‘a kaukaua ‘oku fai ‘ene ngaahi lea,
Ho‘omau fanongo tonu ‘ene folofola.
21Fakafeta‘i kia Sihova, ‘a ‘ene ngaahi hōsitē kotoa;
‘A ‘ene kau ngāue ‘oku mou fakahoko hono finangalo na.
22Fakafeta‘i kia Sihova, ‘a ‘ene ngāue fuli pē,
‘I he potu kotoa pē ‘oku kau ki he‘ene pule.
Fakafeta‘i kia Sihova ‘a hoku laumālie.
Currently Selected:
KO E SAAME 103: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
