KO E SAAME 102
102
Ko e Lotu ‘a e Talavou Mo‘ui Faingata‘a‘ia
(Ko e Lotu ‘a si‘i ngaohikovia ‘i he‘ene vaivai maha, ‘o lilingi ‘i he ‘ao ‘o Sihova ‘ene mamahi)
1FANONGO ki he‘eku lotu, ‘e Sihova,
Pea ke a‘u ki ho ‘ao ‘eku kalanga.
2‘Oua te ke hanga kehe ‘oka ai ha mamahi ‘iate au:
Ofe‘i mai ho fofonga, ‘oka u ka tautapa atu;
Ke vave ho‘o tali au.
3He ko hoku ngaahi ‘aho ko e koto kohu pē,
Pea ‘oku ‘afu vela hoku ngaahi hui ‘o hangē ha va‘a fefie.
4Kuo taa‘i hoku loto hangē ha musie, pea ‘oku mae:
Seuke, na‘a mo e fai ‘eku kai ‘oku ngalo pē. 5Ko e me‘a ‘i he he‘aki ‘eku tauto‘e
‘Oku piki hoku hui ki hoku kanomate.
6‘Oku ou tatau mo ha pelikani he toafa;
Kuo u hoko ko e lulu tofu pē ‘i he ngaahi potu lala.
7‘Oku ou le‘o tu‘u, ‘o ‘ā pē:
‘Io, ‘oku ou hangē ko ha fuleheu toko tefua ha tu‘a fale.
8Ko e ‘aho kotoa mo e fai ‘e hoku ngaahi fili ‘enau manukia:
Ko kinautolu ‘oku vale he ‘ita mai,
Ka kole mala, ‘oku nau tauange ke hangē ko kita.
9He Kuo u me‘akai ‘aki ‘a e efuefu,
Pea kuo hu‘i lo‘imata hoku inu.
10Koe‘uhi ko ho houhau mo ho tuputāmaki;
He kuo ke to‘o hake au, ‘o li‘aki.
11Ko hoku ngaahi ‘aho ‘oku hangē ha ‘ata ‘oku pale;
Pea Kuo u mae hangē ha musie.
12Ka ko koe, ‘e Sihova, ‘oku ‘afio ‘o ta‘engata;
Pea ko ho‘o fotu ‘oku laui to‘utangata.
13Te ke tu‘u hake ‘e koe:
Te ke faka‘atu‘i ‘a Saione;
He ko e kuonga eni ke fai ‘ofa,
‘Io, kuo hokosia hono taimi kotofa;
14He ko ho‘o kau tamaio‘eiki ‘oku lata ki hono ngaahi maka;
Pea ‘oku nau ‘ofa ki he efu ‘o‘ona.
15Pea ‘e ‘apasia ‘a e ngaahi kakai ki he huafa ‘o Sihova,
Mo e ngaahi tu‘i ‘o māmani ki ho kolōlia:
16Koe‘uhi ko e langa ‘a Saione ‘e Sihova,
Mo ‘ene hā mai ‘i hono kolōlia.
17Na‘a ne hāngai fofonga ki he lotu ‘a e telefua ‘atā,
Pea na‘e ‘ikai te ne fakasīkaka‘i ‘enau lotu ko ia.
18‘E tohi ia ma‘a ha to‘utangata kaha‘u:
Pea ‘e fakamālō‘ia ‘a
IAA ‘e he fa‘ahinga ka toki fakatupu.
19He kuo hanga hifo ‘a Sihova mei hono mā‘olunga tāpuhā:
Kuo ne fakasio mei langi ki he fonua.
20Ke fakaongo ki he to‘e ‘a si‘i pōpula;
Ke vete ange ‘a e kakai kuo tuku ke ‘auha;
21Ke ‘a‘au ‘i Saione ‘a e huafa ‘o Sihova,
Pea mo hono fakamālō‘ia ‘i Selusalema.
22‘Oka tānaki fakataha ‘a e ngaahi fa‘ahinga
Mo e ngaahi pule‘anga ke tauhi ‘a Sihova.
23Kuo ne fakavaivai‘i he fononga hoku ivi;
Kuo ne kosi hoku taimi.
24Pea u pehē, “E ‘Otua, ‘oua ‘e ‘ave au ‘i he vaeua hoku taimi:
Ko ho ngaahi ta‘u ‘o‘ou ‘e a‘u ki he ngaahi to‘utangata ta‘ehili.”
25‘I he kamata‘anga na‘a ke tanupou ‘a māmani;#Hep 1.10-12
Pea ko e ngāue ‘a ho nima ‘a e ngaahi langi.
26Ko kinautolu ‘e ‘auha,
Kae tu‘u ai pē ‘a e ‘Afiona:
‘Io, te nau faka‘au kotoa ke motu‘a hangē ko e kofu;
Pea te ke fetongi ia hangē ha pulupulu:
‘Io, ‘e fetongi pē kinautolu.
27Ka ka pehepehē ai pē ‘a e ‘Afiona,
Pea ko ho ngaahi ta‘u ‘e ‘ikai ngata.
28Ko e fānau ‘a ho‘o kau tamaio‘eiki ‘e tolonga,
Pea ko honau hako ‘e ma‘u ‘enau fe‘ao mo e ‘Afiona.
Currently Selected:
KO E SAAME 102: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
