PALŌVEPI 8
8
Ko e Fakahīkihiki‘i ‘o e Potó
1‘IKAI ‘oku kalanga ‘a Poto,#Pal 1.20-21
Pea tuku hake ‘e ‘Atamai hono le‘o?
2‘I he funga ‘o e ngaahi malele ki hala lahi,
‘I he loto hala kehekehe,
Kuo ne tu‘u atu;
3‘I he tafa‘aki matanikolo,
‘I he potu ‘oku ‘alu ai ki tua‘ā,
Pea ‘i he hū‘anga mai ki kolo,
‘Oku fai ‘ene fanongonongo.
4‘Oku ou ui kiate kimoutolu, hou‘eiki:
Pea ‘oku fai ‘eku lea ki he kainanga ‘o e fonua.
5‘a e kau hehemangofua, mou ‘ilo pe ko e hā ‘a e fakapotopoto;
Pea ko e kau sesele, ke mou ‘ilo ‘a e anga ‘o e ‘atamai.
6Fanongo, he te u ‘a‘au ‘a e ngaahi me‘a faka‘ei‘eiki;
Pea ko e mafa‘a hoku ngutu ko e koto totonu ia.
7He ko e me‘a ‘oku tōtō mai mei hoku ‘ao‘ingutu ko e mo‘oni pē;
Pea ‘oku fakalili‘a ‘e hoku loungutu ki he me‘a hala.
8‘Oku fou ‘i totonu ‘a e ngaahi lea ‘oku ou pu‘aki;
‘Oku ‘ikai ha me‘a ‘i ai ‘oku mio‘i pe fakakehe;
9Ko e koto ‘au‘autotonu ‘i he vakai ‘a e kau poto,
Pea toka totonu ki he kakai kuo a‘usia ‘a e ‘ilo.
10To‘o ‘eku akonaki, kae tuku ‘a e siliva;
‘Io, to‘o mu‘a ‘a e ‘ilo ‘i he koula kuo sivi.
11He ‘oku lelei hake ‘a e poto ‘i he makakula koloa;
Pea neongo pe ko e hā ho manako ‘e ‘ikai ala fakatatau ki ai.
12Ko au Poto ‘oku ou fale ‘aki ‘a e fakapotopoto,
Pea ko e ‘ilo fakakaukau ko hoku faiva ia.
13Ko e ‘apasia kia Sihova ko e fehi‘a ki he kovi;
Ko e lotohiki mo e fie‘eiki,
Mo e ‘alunga kovi,
Pea mo e ngutu mamio ‘oku ou fehi‘a ki ai.
14‘Oku ‘a‘aku ‘a e fale‘i,
Mo e tu‘utu‘uni poto;
Ko ‘Ilo au,
‘Oku ‘a‘aku ‘a Ivi.
15‘Oku tu‘i ‘a e ngaahi tu‘i ko au,
Pea fai ‘e he ngaahi kōvana ‘enau pule totonu;
16‘Oku pule ‘a e kau pule mo e hou‘eiki ko au,
‘A e kau fakamaau kotoa pē ‘o māmani.
17‘Oku ou ‘ofa kiate kinautolu ‘oku ‘ofa kiate au;
Pea ko kinautolu ‘oku kumi hengihengi kiate au te nau ma‘u au.
18Ko e koloa mo e ongoongo ‘oku fe‘ao mo au,
Ko e koloa tukufakaholo mo e ‘atu hono taau;
19‘Oku lelei ‘eku fua ‘i he koula kuo sivi mo fakama‘a;
Mo e foha hoku ta‘u ‘i he siliva fungani.
20Ko e hala ‘o e faitotonu ‘oku ou ha‘ele ai,
Ko e loto hala ‘o e fakakonisitūtone;
21Ke ‘ange ha tofi‘a mo‘oni kiate kinautolu ‘oku ‘ofa kiate au,
Pea ke fakafonu ‘enau fale koloa.
22Na‘e ma‘u au ‘e Sihova ko e kamata ‘o ‘ene fai atu,#Fkhā 3.14
Ko e mu‘aki ‘o ‘ene ngaahi ngāue talu mei tuai.
23Na‘e fokotu‘u au talu ‘ītāniti,
Talu ‘a e kamata‘anga,
Talu e ngaahi mu‘aki taimi ‘o māmani.
24‘I he te‘eki ai ha ngaahi loloto, na‘e fanau‘i au,
‘I he te‘eki ai ha ngaahi fauniteni fonu vai,
25Te‘eki ke tanu ‘uhu‘i ‘a e ngaahi mo‘unga,
Ki mu‘a atu ‘i he ngaahi mā‘olunga na‘e fanau‘i au:
26Kuo ‘ikai te ne ngaohi ‘a e fonua,
Mo e ngaahi feitu‘u ‘i tu‘a,
Mo e ‘uluaki ‘o e ngaahi funga ‘o māmani.
27‘I he‘ene teu ‘a e ngaahi langi na‘a ku ‘i ai:
‘I he‘ene ‘ai ha aku ki he funga ‘o e loloto;
28‘I he‘ene ‘ai ke ma‘u ‘a e ‘atānoa mei ‘olunga;
He taimi na‘e fai mālohi ai ‘a e ngaahi fauniteni ‘o e loloto:
29‘I he‘ene ‘ai ki he ‘ōseni ‘ene tu‘utu‘uni,
Pea ki he tahi, ke ‘oua te nau laka ‘i he me‘a kuo ne fekau.
‘I he‘ene ‘ange ‘a e ngaahi tu‘unga ‘o māmani,
30Ko e taimi ko ia na‘a ku ‘i hono tafa‘aki,
Ko e tufunga lahi,#8.30 tufunga lahi; pe ki‘i tamasi‘i.
‘O u hākailangitau he ‘aho kotoa pē;
‘O u fiefia ‘i hono ‘ao he taimi kotoa pē;
31‘O u lata ki he ngaahi potu ‘o hono māmani na‘e nofo‘anga kakai;
‘Io, ko ‘eku neka na‘e ‘i he hako ‘o ‘Ātama.
32Pea ko ‘eni, kau tama, mou fanongo kiate au:
He monū‘ia ā ka ko kinautolu ‘oku tauhi hoku ngaahi ‘alunga.
33Tali ‘a e akonaki, ka mou poto;
Pea ‘oua ‘e hiki mei ai.
34Monū‘ia ā ka ko e tangata ‘oku fanongo kiate au,
He le‘o hoku ngaahi matapā he ‘aho hokohoko,
Nofo‘aki tali ‘i he ngaahi pou ‘o hoku matafale.
35He ka ta‘imālie ha taha, ‘o ma‘u au,
‘Oku ne ma‘u mo‘ui
Pea kuo ne lavengamālie ‘i he ‘ofa meia Sihova;
36Ka ko ia ‘oku ne tovale mo au,
Ko e tamakitangata ‘oku ne fai;
Ko ia fua pē ‘oku fehi‘a kiate au
‘Oku ne ‘ofa ki he mate.
Currently Selected:
PALŌVEPI 8: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
