PALŌVEPI 7
7
1TAMA, tauhi ‘eku ngaahi lea;
Pea ko ‘eku ngaahi fekau, fa‘o ki he kānokato ke fe‘ao mo koe.
2Tauhi ‘eku ngaahi fekau, pea te ke mo‘ui;
‘Io, tauhi ‘eku lao ‘o hangē ko ho tama‘imata.
3Takai ia ki ho ngaahi tuhu;
Tohi ia ‘i he tohi‘anga ‘o ho loto.
4Lea kia Poto,
Ko hoku tokoua koe;
Pea ui ‘a Mafai-ke-‘ilo,
Ko si‘oku kaume‘a.
5Ke tauhi koe mei he fefine faka‘ulia,
Mei he fefine muli ‘oku lea fakaoleole.
Ko e Fefine Ta‘eAnga Nofó
6He na‘a ku tu‘u ‘i he kātupa ‘o hoku fale,
Pea u fakasio ki tu‘a ‘i he lulu vangavanga;
7Pea u ‘ilo ha tu‘unga hehemangofua,
‘O u vakai ‘i he kau tama ha talavou masiva ‘atamai.
8‘Oku ne ‘eve‘eva ‘i he hala ofi ki he tuliki ‘o e fale ‘o e fefine,
‘O ne fou ai pē ‘i he hala ki hono fale;
9‘I he ataata, ‘i he po‘uli mai ‘a e ‘aho,
‘I he tu‘uapō mo e kaupō‘uli.
10Pea tā ko e fefine ena ‘oku fakafetaulaki mai kiate ia,
Kuo teu hangē ha pa‘umutu, pea ko e koto taulama hono loto.
11Ko e anga maveu ia mo lomingata‘a;
Koloto ke pā ki lalo hono va‘e ‘i hono fale ‘o‘ona:
12‘Iloange pē kuo ne ‘i matafale,
‘Iloange kuo ne ‘i ha taha ‘o e ngaahi hala,
Pea ko e tuliki fē ‘oku ‘ikai te ne toka tata‘o ai.
13Pea puke ‘e ia ‘a e siana, ‘o ‘uma ki ai,
‘O ne fakamatafeka ‘o lea kiate ia:
14“Kuo ‘iate au ‘ani feilaulau faka‘osi;
Ko e ‘aho ni kuo u faka‘osi ‘eku tukumo‘ui;
15Ko hono ‘uhinga ia ‘o ‘eku hū ki tu‘a ke fakafetaulaki atu,
Ko ‘eku ha‘ao si‘o mata,
Pea tā kuo u ma‘u koe.
16Kuo u teu hoku longa ‘aki ‘a e me‘a fakamolū,
‘A e ‘ufi‘ufi pulepule, ‘a e siti mei ‘Isipite;
17Kuo u afuhi ‘aki hoku mohenga
‘a e kaloni mula, ‘alosi, mo e sinamoni.
18Ha‘u ange, ke ta inu fakaputa ‘a ‘ofa,
‘O a‘u ki he ma‘a ‘a e ‘aho;
Pea tā fai ‘ofa ke topono.
19He ‘oku ‘ikai ‘i ‘api ‘a e tangata‘eiki,
‘Oku ‘alu ‘ene fononga ki he potu mama‘o:
20Kuo ‘alu mo ia ha kato pa‘anga;
Te ne toki foki ki ‘api ‘oka kātoa ‘a e māhina.”
21Na‘a ne oloa ia ‘i he lahi ‘o ‘ene lau,
‘Oku ne fauna ia ‘aki ‘a e lau ‘a hono ngutu.
22Ko e kemo kuo ne muimui atu,
‘O hangē ko e ‘alu ‘a ha pulu ki he fale tāmate manu,
Pe hangē ha kulī ki he tautea ‘o e vale,#7.22 Pe… vale; Ko e hiki eni he Sepituakiní. Ko hono hiki ‘e taha ko e: hangē ha tia ‘oku topuna holo ‘o ma‘u ai ia ‘i ha tauhelé. ‘Oku ‘ikai ‘ilo pau ‘a e ‘uhinga ‘o e lea ‘oku tu‘u aí.
23Hangē ko e fakavave ‘a e manupuna ki he hele
‘O ‘ikai ‘ilo ko e me‘a ki he‘ene mo‘ui,
Kae‘oua ke ‘asi ‘a e ngahau ‘i hono ‘ate.
24Pea ko eni, kau tama, fanongo kiate au,
Pea tokanga ki he ngaahi lea ‘oku ou pu‘aki.
25‘Oua ‘e afe ho loto ki he ‘alunga ‘o e fefine ko ē,
Pea ‘oua te ke hē ‘i hono ngaahi laka‘anga.
26He ‘oku tokolahi ‘a e kafo he‘ene tulaki;
Pea ka lau fakataha ‘a e kakai kuo ne fakapoongi ko e fu‘u hōsitē.
27Ko hono fale ko e koto hala ki Vanu,
‘Oku nau hifo kotoa pē ki he ngaahi loki ‘o Mate.
Currently Selected:
PALŌVEPI 7: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
