PALŌVEPI 6
6
Ko e ngaahi Fakatokanga Kehe
1TAMA, kapau kuo ke hoko ko e talifaki ma‘a ho kaungā‘api,
Kuo ke ‘atu ho nima ma‘a ha kehe.
2Tā kuo ke fihia ‘i he ngaahi lea ‘a ho ngutu,
Tā kuo kafai koe ‘i he ngaahi lea ‘a ho ngutu.
3Sī! fai eni, tama, ‘o fakahaofi koe,
He kuo ke hū ki he ‘aofi nima ‘o ho kaungā‘api:
‘Alu fakavave, pea kole ta‘ota‘o ki ho kaungā‘api.
4‘Oua ‘e tuku ho mata ke mohe,
Pe ko ho laumata ke tule.
5Fai ke ke hao;
Hangē ha kaseli na‘e puke,
Pe ha manupuna kuo puke ‘e he tulimanu.
6‘Alu ki he lō, ‘a e makau na;
Siofi hono ngaahi ‘alunga, ka ke ma‘u poto:
7‘A ia ‘oku ‘ikai hano angi,
Hano ‘ōfisa,
Pe pule.
8Tokonaki pē ia ‘ene me‘akai ‘i he fa‘ahita‘u māfana,
Pea kuo ne tānaki ‘i he taimi ututa‘u ‘ene me‘a tokoni.
9‘a e makau na, ‘e ngata ‘afē ho‘o tokoto na?
‘Afē te ke tu‘u mei ho‘o mohe?
10“Ka u mohe si‘i atu pē
Ka u ki‘i kemo hifo mu‘a,
Ha‘aku ki‘i mohe fehulunaki”–#Pal 24.33-34
11Tā ‘e hoko kiate koe ‘a e masiva hangē ko e pāpani,
Mo e fusimo‘omo hangē ha tangata to‘o mahafu!
12Sī! ko e tangata faka-Pileali ē,
Ko e siana kovi–‘Oku faiva ‘aki ‘a e ngutu piko‘i;
13‘Oku talanoa kakamo,
‘Oku talanoa tūva‘e,
‘Oku talanoa tutuhu.
14Ko e me‘a ‘i hono loto ko e makaka,
‘Oku ne nofo he taimi kotoa pē, ‘o fa‘u kovi ke fai;
‘Oku ne humaki atu ni kē.
15Ko ia, tuaiekemo kuo a‘u atu hono nunu‘a,
Fokifā kuo faka‘auha, ‘o ‘ikai hano faito‘o.
16Tū ‘oku ai ha ono‘i me‘a ‘oku fehi‘a ki ai ‘a Sihova–
‘Isa! ko e fitu ‘oku fakalili‘a ki ai hono finangalo:
17Ko e matahihiki,
Ko e ‘elelo loi,
Mo e nima ‘oku lingi toto ta‘ehalaia;
18Ko e loto ‘oku fa‘u fakakaukau kovi,
Ko e va‘e ‘oku lele fakavave ki he faikovi.
19Ko e fakamo‘oni kākā ‘oku hō‘aki loi;
Mo ia ‘oku humaki kē ke maumau ‘a e vā ‘o e kāinga.
Ko e Fakatokanga ‘i he Fe‘auakí
20Tama, ke ke tauhi ‘a e fekau ‘a ho‘o tamai,
Pea ‘oua ‘e keu‘i ‘a e lea ‘a ho‘o fa‘ē:
21Ha‘i kinaua ki ho loto ma‘u ai pē,
Takai kinaua ‘i ho kia.
22‘I ho‘o ‘alu fano, te ne taki tonu koe;
‘I ho‘o tokoto, te ne le‘ohi koe;
Pea ‘i ho‘o ‘ā, te ne talanoa mo koe.
23He ko e fekau ko ia ko e tūhulu;
Pea ko e lea ko ia ko e maama;
Pea ko e ngaahi tautea ako ko e hala ki he mo‘ui:
24Ke ta‘ofi koe mei he fefine kovi,
Mei he fakaoleole ‘a e ‘elelo kehe.
25‘Oua ‘e holi ho loto ki hono hōihoifua;
Pea ‘oua na‘a pukea koe ‘e hono laumata.
26He ko e ‘ātunga ‘o e fai mo e pa‘umutu,
Kuo a‘u ha tangata ki ha momo‘i pisikete:
Pea ko e fefine faka‘ulia
‘Oku ne tuli ke pō ha laumālie mahu‘inga.
27‘E hikofi koā ‘e ha tangata ha afi, ‘o ‘ai ki hono fatafata,
‘O ‘ikai mōfia hono kofu?
28‘E lava ‘e ha tangata ke ha‘ele ‘i he funga maka ‘afu,
‘O ‘ikai vela hono va‘e?
29Pehē ko e ‘alu ha taha ki he uaifi ‘o hono kaungā‘api–
‘E ‘ikai ta‘etautea ha taha ‘oku ala ki he fefine pehē.
30‘Oku ‘ikai te tau lau ko e kua ha taha kaiha‘a,#6.30 ‘Oku ‘ikai te tau lau ko e kua ha taha kaiha‘a; pe ‘Ikai ‘oku tau lau ko e kua ha taha kaiha‘a?
‘O kapau ko ‘ene fai ke fakaili ‘ene mo‘ui hōngea;
31Kae‘uma‘ā ka ma‘u, te ne totongi lō fitu nai;
‘Io, ‘o ‘atu ‘a e koloa kotoa ‘o hono fale.
32Ko ia ‘oku tono‘i ha fefine ko e taha masiva ‘atamai;
Ko e fakapoongi ‘o‘ota–ha taha ‘oku fai pehē.
33Ko e me‘a ‘oku ne ma‘u ko e loholoho mo e mā;
Pea ko hono lau‘i ‘e ‘ikai mate.
34He ko e fua‘a ko e tatā ‘a ha mafi;
Pea ‘e ‘ikai te ne faka‘atu‘i ‘i he ‘aho ‘o e sauni.
35Neongo pe ko e hā ‘a e holo te ke ‘atu, ‘e ‘ikai te ne tokanga ki ai,
Pea neongo ho‘o fakalahi tala me‘a‘ofa fufū, ka ‘e ‘ikai tali.
Currently Selected:
PALŌVEPI 6: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
