PALŌVEPI 30
30
Ko e ngaahi Akonaki ‘a ‘Auka
(Ko e ngaahi lea ‘a ‘Auka foha ‘o ‘Iake ko e Masa)
1FOLOFOLA ‘a e mafi,
Kuo u ongosia ‘i he fai, ‘e ‘Otua,
‘E ‘Otua, kuo u ongosia ‘i he fai,
Pea kuo u tuku.#30.1 ‘E ‘Otua… tuku; ‘Oku ‘ikai ke mahino ‘a hono faka-Hepeluú. Ko hono hiki ‘e taha ko e: ‘Oku ‘ikai ke kau mo au ‘a e ‘Otuá, ‘Oku ‘ikai ke kau mo au ‘a e ‘Otuá, pea ‘oku ‘ikai ha tokoni ‘e fai mai kiate au.
2Tā ko e fakamanu kita, ‘o ‘ikai ko e maama,
Pea ‘oku ‘ikai ‘iate au ‘a e ‘atamai ‘o e tangata:
3Pea na‘e ‘ikai te u ako ‘a e poto,
Ke u a‘usia ‘a e ‘ilo‘i ‘o e Tāpuhā.
4Ko hai kuo ‘alu hake ki he langi ‘o ‘alu hifo?
Ko hai kuo kuku ‘a e matangi ‘i hono ongo nima?
Ko hai kuo lokuloku ‘a e vai ‘i ha kofu?
Ko hai kuo hunuki ‘a e ngaahi ngata‘anga ‘o māmani?
Ko hai hono huafa,
Pea ko hai ‘a e huafa ‘o hono ‘Alo,
‘O kapau ‘oku ke ‘ilo ki ai?
5Ko e folofola kotoa ‘a ‘Elohā kuo ‘osi-‘a-sivi;
Ko e fakaū ia kiate kinautolu kuo hūfanga kiate ia.
6‘Oua te ke fakalahi ki he‘ene ngaahi lea;
Na‘a ne fakamāu‘i koe, pea ke hā ko e loi.
Ko e ngaahi Palōvepi Kehe
7Ko e ua‘i me‘a kuo u kole mei he ‘Afiona;
‘Oua ‘e fakafisi hono ‘omi te‘eki te u mate:
8Ko e muna mo e lea loi, fakamama‘o meiate au:
‘Oua ‘e tuku ke u masiva pe koloa‘ia;
Fafanga ‘aki au ‘a e me‘akai ‘o hoku ‘inasi;
9Na‘a ‘iloange te u fu‘u mākona, ‘o u faka‘otuamate‘i ‘a e ‘Afiona;
‘O u pehē, “Ko hai ‘a Sihova?”
Pea na‘a ‘iloange te u masiva, ‘o kaiha‘a;
Pea u talakaa‘i ‘a e huafa ‘o hoku ‘Otua.
10‘Oua ‘e lau‘ikovi ‘a e tamaio‘eiki ki hono ‘eiki;
Na‘a ne talatuki‘i koe, pea ke fua hono mo‘ua.
11‘a e nofo–
‘Oku kape ki he‘enau tamai,
Pea ‘oku ‘ikai ke talamonū ki he fa‘ē!
12‘a e nofo–
‘Oku ma‘a ‘i he vakai ‘anautolu,
Ka ‘oku te‘eki ke fufulu ‘enau ‘uli!
13‘a e nofo–
Hono ‘ikai matahihiki,
Mo tu‘amata mafe‘u!
14‘a e nofo–
Nifo heletā,
Pea hangē ha hele māsila ‘a e kaungao,
Ke keina ‘o ‘osi ‘a e masiva mei he fonua,
Pea ke ‘osi ‘a e fusimo‘omo mei he kakai!
15‘Oku ma‘u ‘e he ‘aluka ha ‘ōfefine ‘e toko ua–
“Tuku mai,” “Tuku mai”–
‘Oku ai ha me‘a ‘e tolu ‘oku ‘ikai fiu–
‘Isa, ko e fā ‘oku ‘ikai ke pehē, “Ma‘u ā:”
16Ko Hētesi; mo e manava ‘oku pa‘a;
Ko e fonua ‘oku ‘ikai ke fiu ‘i he vai:
Ko e afi foki ‘oku ‘ikai ke pehē, “Ma‘u ā.”
17Ko e mata ‘oku luki ki he‘ene tamai,
Pea ‘oku ne maa‘i ‘a e talangofua ki he‘ene fa‘ē;#30.17 ‘a e… fa‘eé; pe ‘a e talangofua ‘a e fa‘eé; Ko hono faka-Hepeluú ia, ka ‘oku pehē ‘i he hiki fuoloa ‘e taha: ‘e ne fa‘eé ‘i he‘ene fakatōtōla‘aá.
‘E kape‘i ‘a e mata ko ia ‘e he fanga lēveni ‘o e tele‘a.
Pea keina ia ‘e he ‘īkale mui.
18‘Oku ai ‘a e me‘a ‘e tolu ‘oku ou ofo‘ia ai–
‘Isa, ko e fā ‘oku ‘ikai te u ‘ilo‘i:
19Ko e ‘alunga ‘o e ‘īkale ‘i he ‘atā;
Ko e ‘alunga ‘o e ngata ‘i he funga maka;
Ko e ‘alunga ‘o e vaka ‘i he moana;
Pea mo e ‘alunga ‘o ha fu‘u tangata mo ha finemui.
20‘Oku pehē ‘a e ‘alunga ‘o e fefine tono tangata:
‘Oku ne kai, pea holoholo hono ngutu,
‘O ne pehē,
Tala‘ehai ‘oku ai ha kovi kuo u fai.
21‘Oku ai ‘a e me‘a ‘e tolu ‘oku kulukia ai ‘a e fonua hono fua–
‘Isa, ko e fā ‘oku ‘ikai te ne matu‘uaki;
22Ko e tamaio‘eiki kuo hoko ‘o tu‘i;
Mo e vale kuo mohu me‘akai;
23Ko e fefine fehi‘anekina ‘oka ‘iloange ‘oku ne ma‘u husepāniti;
Mo ha kaunanga kuo ne fetongi ‘a e ma‘itaki.
24‘Oku ai ha faa‘i me‘a ‘oku matamata iiki ‘i māmani,
Ka ko e fa‘ahinga poto he poto ange fau:
25Ko e lō–ko e fa‘ahinga kakai ‘oku ‘ikai mālohi,
Ka ‘oku nau tokonaki ‘i he fa‘ahita‘u māfana ‘enau me‘akai.
26Ko e sāfana–ko e kakai ‘oku ‘ikai ke kaukaua,
Ka ‘oku nau ‘ai ‘i he makatu‘u honau fale.
27‘Oku ‘ikai ma‘u tu‘i ‘e he he‘e,
Ka ‘oku nau ‘alu atu fakataha fakavāhenga tau.
28Ko e pili–‘oku ke lava ke puke ‘aki ho nima,
Ka ‘oku ne ‘i he palasi ‘o e ngaahi tu‘i.
29‘Oku ai ha me‘a ‘e tolu ‘oku omooma ‘enau laka–
‘Isa, ko e fā ‘oku ‘alu fakatūtū:
30Ko e laione–
Ko e helo ‘o e fanga manu,
Pea ‘oku ‘ikai te ne papae ki ha taha;
31Ko e moa ta‘ane mo ‘ene kau fefine;#30.31 Ko e… fefine; ‘Oku hiki ‘e he ni‘ihi: Ko e kulī tuli manu.
Pea ko e kosi tangata;
Pea mo e tu‘i ‘oku fotu ‘i hono kakai.
32Kapau kuo ke fai vale ‘i ho‘o fakahīkihiki‘i koe,
Pea kapau kuo ke fai he puleaki,
‘Ai ho nima ki ho ngutu:
33He ko e ngaohi ‘o e hu‘akau ‘e iku ko e pota,#30.33 Ko e patá eni.
Pea ko e ngaohi ‘o e ihu ‘e iku ki ha toto,
Pea ko e ngaohi ‘o e fōtunga ‘e iku ki he kē.
Currently Selected:
PALŌVEPI 30: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
