PALŌVEPI 31
31
Ko e Fale‘i ki he Tu‘i
1KO E ngaahi lea ‘a Lemiueli ko e Tu‘i Masa:
Ko e me‘a na‘e akonekina ia ‘e he‘ene fa‘ē.
2Ko e hā ‘eku lea ‘e fai, nga‘ata?
‘Io, ko e hā, na‘i tama ‘a hoku mānava?
Ko e hā fua, tama ne u tukumo‘ui ai?
3‘Oua ‘e ‘atu ho ivi ki he kau fefine,
Pe le‘ei ho ngaahi founga ki he fa‘ahinga fakaka‘anga tu‘i.
4‘E Lemiueli, ‘oku ‘ikai ma‘a e ngaahi tu‘i–
‘Oku ‘ikai ma‘a e ngaahi tu‘i ke inu uaine;
Pe ko e kau pule ke faka-kī-kava:
5Na‘a inu ia, ‘o ngalo ‘a e me‘a kuo tu‘utu‘uni;
‘O le‘ei ‘a e totonu ‘o si‘i ha‘a masiva.
6‘Atu ‘a e kava mālohi kiate ia ‘oku tei mate,
Mo e uaine kiate kinautolu ‘oku kona honau loto;
7Ke ne inu, ‘o ngalo ai ‘ene masiva,
‘O ‘ikai kei manatu ‘ene tu‘utāmaki.
8To‘o ho fofonga ma‘a e fa‘ahinga ta‘emalea;
Ma‘a e totonu ‘o e fānau ‘a e kakai ‘oku mole atu.
9To‘o ho fofonga, fakamaau totonu:
Pea taukapo‘i ‘a e mā‘ulalo mo e fusimo‘omo.
Ko e Uaifi Fitá
10Ko e uaifi fita, ko hai te ne ma‘u?
He ko hono mahu‘inga ‘oku hulu ‘i he makakula koloa.
11‘Oku falala kiate ia ‘a e loto ‘o hono husepāniti,
Pea ‘i he taufa‘ao ke ma‘u koloa, ‘e ‘ikai te ne masiva.
12Ko e lelei te ne fai ma‘ana, ‘o ‘ikai ko e kovi,
‘I he ngaahi ‘aho kotoa ‘o ‘ene mo‘ui.
13‘Oku ne kumi fulufulu‘i sipi, mo e falakesi;
‘O ne ngaohi ia ‘aki ha nima fie ngāue.
14Ko e vaka fakatau tofu pē ia ‘ene ‘omi ‘ene me‘akai mei he mama‘o.
15‘Oku ne tu‘u hake foki kei po‘uli,
‘O tufa me‘akai ki hono fāmili,
Mo e ‘inasi ki he‘ene kau fefine.
16‘Oku ne fakakaukau ki ha konga vao, ‘o fakatau ia:
Ko e pa‘anga ‘oku hū mai ‘i he ngāue ‘a hono nima
‘Oku tō ‘aki ha ngoue vaine.
17Ko hono no‘o vala ko e fai mālohi,
Pea ‘oku ne fakafefeka hono nima.
18‘Oku ne sivi, tā kuo fua lelei ‘ene fakatau:
Talu ai ‘oku ‘ikai mate ‘ene maama ‘i he pō.
19Ala ‘e hono nima ko ē ki he tu‘unga amo;
Puke ‘e hono louhi‘i ko ē ‘a e mīsini filofilo.
20Ko e louhi‘i ai pē ko ia ‘oku ne humaki atu ki he mā‘ulalo,
Pea ko e nima ai pē ko ia ‘oku ne ala ‘aki ki he masiva.
21‘Oku ‘ikai te ne manavahē ki he sinou
Telia hono fāmili;
He ‘oku kofu hono fāmili kotoa
‘Aki ‘a e me‘a kulokula.
22‘Oku ne ngaohi me‘a fakamolū ma‘ana,
‘A e tupenu hina mo e kula po‘upo‘uli moana kofu.
23Ko e tangata ‘iloa hono husepāniti ‘i he matanikolo,
‘I he‘ene nofo mo e mātu‘a ‘o e fonua.
24‘Oku ne ngaohi tupenu sote, ‘o fakatau,
Pea ‘oku ne ‘atu no‘o ki he kau Finisia.
25Ko hono vala takai ko e mo‘umo‘ua mo e tu‘unga mā‘olunga.
Pea ‘oku ne kata ki he ‘aho ‘amui.
26Ko e to‘o hono ngutu ko e koto poto;
Pea na‘e nofo ‘a e lao ‘ofa ‘i hono funga ‘elelo.
27‘Oku ne lama ‘a e ngaahi ‘alunga ‘o hono fāmili;
Pea ‘oku ‘ikai te ne kai ‘a e me‘akai ‘a e fakapikopiko.
28‘Oku tu‘u hake ‘ene fānau, ‘o nau tala monū ki ai:
Ko hono husepāniti foki, ‘o ne fakamālō kiate ia, ‘o pehē.
29“‘Oku tokolahi ‘a e ngaahi ‘ōfefine kuo fai fita;
Ka ko koe kuo ke hulu ‘iate kinautolu kotoa.”
30Ko e matamatalelei ko e me‘a ‘e ‘ikai ala falala ki ai,
Pea ko e hōihoifua ko e me‘a hāmolofia:
Ko e fefine ‘oku ‘apasia kia Sihova,
Ko eni ia ‘e fakamālō‘ia.
31Tuku hano ‘inasi mei he fua ‘o hono nima,
Pea ke ne ma‘u fakamālō ‘i he ngaahi matanikolo,
‘I he ngaahi me‘a kuo ne fai.
Currently Selected:
PALŌVEPI 31: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
