PALŌVEPI 27
27
1‘OUA te ke pōlepole ha me‘a te ke fai ‘a pongipongi;
He ‘oku ‘ikai te ke ‘ilo pe ko e hā ‘e fanau‘i ‘e he ‘aho.#Sēm 4.13-16
2Tuku ke viki koe ‘e ha taha kehe,
‘O ‘ikai ko ho ngutu ‘o‘ou;
‘E ha sola, ‘o ‘ikai ko ho loungutu ‘o‘ou.
3Mamafa ‘a maka,
Mo ‘ikai avangi ‘a ‘one‘one;
Ka ko e tafue ‘a e vale ‘oku mamafa ange ‘iate kinaua ‘osi pē.
4Ko e tafulu ko e tama fekai,
Pea ko e ‘ita ko e vai fā;
Ka ko e fua‘a, ‘e matu‘uaki ‘e hai?
5‘Oku ngutuhua ange ha valoki ‘oku e‘a,
‘I ha ‘ofa ‘oku fūfūnaki.
6Ko e ngaahi kafo mei hoto kaume‘a ko e ‘ofa mo‘oni ia:
Ka ko e ngaahi ‘uma ‘a hoto fili ko e fokotu‘uniu pē.
7Ko ia kuo mākona, te ne mala ‘i he honi lelei;
Ka ko e ‘alefa, ‘oku ‘ikai ha kona ka ‘oku melie kiate ia.
8Hangē ha manupuna ‘oku heva ai pē mei hono pununga,
‘Oku pehē ‘a e tangata ‘oku heva mei hono potu totonu.
9Ko e tākai mo e fakakakala ko e me‘a fakafiefia ki he loto,
Ka ‘oku melie ange ha kaume‘a ‘i he ‘akau nanamu.#27.9 Ka… nanamu; ‘Oku ‘ikai ke mahino ‘a hono faka-Hepeluú, ka ‘oku pehē he hiki fuoloa ‘e taha: Ka ko e faingata‘á ‘oku mole ai ‘ete nongá.
10Ko e kaume‘a ‘o‘ou mo ho‘o tamai, ‘oua ‘e li‘aki;
Pea ‘i he taimi ‘o ho‘o tu‘utāmaki, ‘oua ‘e ‘alu ki he fale ‘o ho kāinga:
‘Oku ngutuhua ange ha taha nofo ofi,
‘I ha kāinga ‘oku mama‘o.
11Tama, ke ke hoko ko e poto, kae fiefia hoku loto;
Pea ai ‘eku tali ke fai kiate ia ‘oku ngaohi au
12Ko e fakapoto–sio ki he kovi–toi:
Ko e hehemangofua–laka atu-mo‘ua ai.
13To‘o hono kofu, he na‘a ne hoko ko e talifaki ‘o e kehe na;#27.13 ‘o e kehé na; Ko hono fakalea ia ‘i he hiki fuoloa ‘e taha, ka ‘oku pehē ‘i he faka-Hepeluú: ‘o e kehe pe ko e fefine ta‘eanganofo.
‘Io, puke ‘a e tangata foki, ko ‘ene talifaki ha fefine muli.
14Ko ia ‘oku ne langa hengihengi atu,
‘O fai le‘o lahi ‘ene talamonū ki hono kaume‘a,
‘E tatau ki hē mo ha‘ane tala mala.
15Ko e patatō ma‘u pē ha mata‘i tutulu ‘i ha ‘aho ‘uha,
Pea ko e fefine fa‘a kē ‘oku na tatau:
16Ko ia ‘oku fai ke fakapūlou ia ‘oku ne fakapūlou ‘a e matangi,
Pea ‘oku fepaki hono to‘omata‘u mo ha koto lolo pē.#27.16 ‘oku… lolo pē; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: ‘okú ne faluku ha lolo.
17‘Oku fakamāsila ‘a e ‘aione ‘aki ‘a e ‘aione:
Pehē ‘oku fakamāsila ha tangata he feangai mo ha taha kehe.
18Ko ia ‘oku ne tauhi ‘a e fu‘u fiki
Te ne kai hono fua;
Pea ko ia ‘oku ne mamahi‘i hono ‘eiki ‘e fakalāngilangi‘i ia.
19Hangē ko e ma‘ali mai hoto mata ‘i he‘ete sio ki ha vai,
Pehē ‘oku ma‘ali mai hoto loto ‘ete sio ki ha tangata kehe.
20Tala‘ehai ‘oku mākona ‘a Hētesi mo ‘Apatoni;
Pehē ‘oku ‘ikai mākona ‘a e mata ‘o e tangata.
21Ko e kulo ma‘a e siliva,
Pea ko e fōnise ma‘a e koula;
Ke pehē ‘a e tangata ki he ngutu ‘o ia ‘oku fakamālō mai.#27.21 ‘Oku fihi.
22Neongo ho‘o tuki ha vale ‘aki ha hāmala
‘I he kumete fakataha mo e koane,
‘E ‘ikai mahu‘i meiate ia ‘ene vale.
23Ke ke mātu‘aki tokanga ki he anga ‘o ho‘o fanga sipi mo kosi;
Ngāue ho loto ke ai ha monumanu:
24He ‘oku ‘ikai tolonga ‘o ta‘engata ‘a e koloa,
Pea he ‘oku a‘u ‘a e kalauni ki he to‘utangata mo e to‘utangata?
25Kuo ‘osi fetuku ‘a e musie tauaki,
Pea kuo fisiki mai ‘a e mohuku,
Pea kuo fa‘oaki ‘a e me‘akai ‘a manu mei mo‘unga.
26Toki ai ha fanga lami mo‘ao kofu,
Pea ma‘u mei he fanga kosi ‘a e totongi ‘o ha tofi‘a;
27Pea lahi ‘a e hu‘a kosi ki ho tauhi,
Ke tauhi ‘aki ho fale, pea ke mo‘ui ‘aki ho‘o kau kaunanga.
Currently Selected:
PALŌVEPI 27: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
