PALŌVEPI 26
26
1Hangē ha sinou ‘i he fa‘ahita‘u māfana,
Mo ha ‘uha ‘i he ututa‘u,
Pehē ‘ene ta‘ehoa mo ha vale ke ma‘u hingoa.
2Hangē ha misi kuo sese‘e,
Hangē ha pekepeka ‘oku siutaka,
Pehē ko e tuki tu‘unga‘a ‘e foki kiate kita.#26.2 ‘e foki kiate kita; ‘Oku hiki ‘e ni‘ihi: ‘E ‘ikai foki.
3Ko e uipi ki he hoosi,
Ko e piti ki he ‘asi,
Mo e loholoho ki he tu‘a ‘o e vale.
4‘Oua te ke tali ha vale ‘o tatau mo ‘ene vale,
Na‘a ke tatau mo ia ‘a koe foki.
5Tali ha vale ‘o tatau mo ‘ene vale,
Na‘a ne poto ‘i he‘ene vakai ‘a‘ana.
6‘Oku ne tu‘usi hono va‘e,
‘Oku ne inu mamahi,
Ha taha ‘oku fakafai ‘i ha vale ‘ene fekau.
7Hangē ‘oku tāupe ‘a e ongo va‘e ‘o e heke. ‘Oku pehē ‘a e palōvepi ‘i he ngutu ‘o e vale.
8Hangē ko ‘ete ‘ai ha makakoloa ‘i ha makatā,
‘Oku pehē ‘ete ‘ai ‘i ha vale ha hingoa fakanofo.#26.8 ‘Oku fihi.
9Ko e va‘a talatala ‘oku hiki ‘e he nima ‘o e tangata konā,
Ko e tuha ia ‘o ha palōvepi ‘i he ngutu ‘o e vale.
10‘Oku hangē ha taha fana ngahau noa‘ia
ha taha ‘oku ne unga ha vale pe ko ha konā.#26.10 ‘Oku ‘ikai ke mahino lelei ‘a e ‘uhinga ‘o e vēsí ni.
11Hangē ha kulī ‘oku foki ki he‘ene lua,
‘Oku pehē ‘a e toe fai ‘e he vale ‘ene vale.
12Ko ho‘o ‘ilo leva ha tangata ‘oku poto ‘i he‘ene vakai ‘a‘ana,
Te tau ‘amanaki ki ha vale ‘i he toko taha ko ia.
13Ko e lea ‘a e makau ‘oku pehē,
“Tokua ‘oku ai ha manu fekai ‘i he hala;
‘Oku taka ha laione ‘i kolo!”
14Hangē ko e fefoki‘aki ‘a e matapā ‘i he hīnisi,
‘Oku pehē ‘a e makau ‘i hono mohenga.
15Kuo velo ‘e he makau na hono nima ki he tisi;
‘E taiki ‘ene toe hiki ia ki hono ngutu.
16‘Oku poto hake ‘a e makau
‘i he‘ene vakai ‘a‘ana ‘i ha toko fitu ‘oku lava ha tali mālie.
17Ko e puke ha telinga ‘o ha kulī,
Ko e tuha ia ‘o ha tangata fononga
‘Oku ne hanga ‘o kaunoa ‘i ha kē.
18Hangē ha faha ‘oku lī fano ni potu‘i afi,
Koni ngahau,
Mo e me‘a ke mate ai;
19Ko e tatau tofu pē ia ‘o e tangata ‘oku ne kākaa‘i hono kaungā‘api,
‘O ne toki pehē, “Ikai ko ‘eku va‘inga pē?”
20‘I he ‘osi ‘a e fefie ‘oku mate ‘a e afi,
Pea ‘i he ‘ikai ha ‘ave lau ‘oku tuku ‘a e kē.
21Hangē ha makafefie ‘oku hunuaki ‘aki ha malala,
Pea hangē ha va‘akau ‘oku fetolonaki mo ha potu‘i afi.
‘Oku pehē ha tangata anga kē, ‘ene tafunaki ‘a e vākovi.
22Ko e ngaahi lea ‘a e tama ‘ave lau
‘Oku hangē ko e ngaahi ma‘anga ngako:
Pea ko e fa‘ahinga ko ia ‘oku ‘alu hifo
Ki he loto he loto‘i kete.
23Ko e efe‘i siliva ‘oku pani ‘aki ‘a e ipu ‘umea,#26.23 efe‘i… ‘aki (pe siliva te‘eki fakama‘a he afi); Ko hono faka-Hepeluú ia, ka ‘oku ngali tonu ‘a hono hiki ‘o: kili ngingila ‘o ha.
Ko e ngutu māfana ia mo e loto kovi.#26.23 māfana; Ko hono faka-Hepeluú ia, ka ‘oku pehē ‘i he hiki fuoloa ‘e taha: mālualoí.
24Ko ia ‘oku fehi‘a,
‘Oku ne ha matamatakehe ‘i hono ngutu,
Ka ‘i loto ‘oku ne fai hā puleaki.
25Kapau te ne ‘ai hono le‘o ke ngali ‘ofa mai,
‘Oua te ke tui kiate ia;
He ‘oku ai ha fitu‘i fakalielia ‘i hono loto na:
26Te ne ‘ufi‘ufi nai ‘ene fehi‘a ‘aki ha fu‘u kākā.
Kae tatala hono kovi ‘i he fakataha.
27Ko ia te ne keli ha luo te ne tō ki ai ‘e ia;
Pea ko ia ‘oku ne fakateka hake ha maka, ‘e foki pē kiate ia.
28Ko e ‘elelo loi ‘oku fehi‘a kiate kinautolu ‘oku lavea ai;
Pea ko e ngutu fakaheke ‘oku fakatupu tōkilalo.
Currently Selected:
PALŌVEPI 26: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
