PALŌVEPI 25
25
Ko e ngaahi Palōvepi Kehe ‘a Solomone
1KO eni foki ‘ani palōvepi ‘a Solomone,
‘A ia na‘e hiki ‘e he kau tangata ‘a Hesekaia ko e Tu‘i Siuta.
2Ko e lāngilangi ‘o e ‘Otua ke fufū me‘a:
Ka ko e lāngilangi ‘o e ngaahi tu‘i ke hakule me‘a.
3Ko e langi, ko ‘ene mā‘olunga.
Pea ko māmani, ko ‘ene taumama‘o,
Mo e finangalo ‘o e ngaahi tu‘i–ko e ta‘emahakulea ia.
4‘Ave ‘a e efe mei he siliva,
Pea ‘e ‘alu atu mei ai ha ipu ki he tufunga:
5‘Ave ‘a e angahala mei he ‘ao ‘o e tu‘i,
Pea ‘e tu‘u hono taloni ‘i he faitotonu.
6‘Oua ‘e fai hangē ko ha ‘eiki ‘i he ‘ao ‘o e tu‘i,
Pea ‘oua ‘e tu‘u ‘i he potu ‘o ha‘a mā‘olunga;#Luk 14.8-10
7He ‘oku ngutuhua ange ke nau pehē mai kiate koe,
“Ma‘uma‘u hake,”
‘I hao tuku ki lalo ‘i ha ‘eiki,
‘A ia na‘a ke kilo ki ai ‘anenai.#25.7 ‘A ia… ‘anenai. ‘Oku fihi.
8‘Oua ‘e ‘alu fakavave ke hopo mo ha taha,
Na‘a iku ki he me‘a ni, “Ko e hā ‘au ‘e fai?”
‘oka fakamaa‘i koe ‘e he toko taha ko ē.
9Ka ai ha‘amo fakakikihi mo ha taha, fai pē,
Kae‘oua ‘e fakahā ai ‘a e me‘a ne tala fufū ‘e ha taha kehe:
10Na‘a fakaongokovi‘i koe ‘e ia ‘oku fanongo,
Pea ‘ikai toe foki mai ho ongoongolelei.
11Koni ‘āpele koula ‘i he ‘ainga siliva,
Ko e lea ia ‘oku tautaungamālie hono lea‘aki.
12Ko e hau koula,
Mo e kahoa koula tongi,
Ko e malanga poto ia mo e telinga ‘oku fanongo.
13Ko e fakamokomoko ‘aki ‘a e sinou ‘i he taimi ututa‘u,
Ko e tuha ia ‘o e talafekau tōnunga ki he kakai na‘e fekau ia:
He ‘oku ne fakamānava hake hono hou‘eiki.
14Ko e loa mo e matangi, kae ‘ikai ‘uha,
Ko e tangata ia ‘oku pōlepole he‘ene foaki loi.
15Ko e fakama‘uma‘u ‘ete ‘ita, ‘e fakaloto‘i ai ‘a e angi;
Pea ‘oku fesi hui ‘e he ‘elelo molū.
16Kuo ke ‘ilo ha honi? kai pē ke fe‘unga mo koe;
Na‘a ke pāhia ai, ‘o ke lua‘aki.
17Fakasi‘isi‘i ki he tu‘u ho va‘e ki he fale ‘o ho kaume‘a;
Na‘a faifai pea ne pāhia ‘iate koe, ‘o fehi‘a.
18Ha kolo mo ha heletā mo ha ngahau māsila,
Ko e tangata ia ‘oka tu‘u ko e fakamo‘oni loi ki hono kaungā‘api.
19Ko e nifo kuo hele,
Mo e va‘e kuo heu,
Ko e falala ia ki he kākā ‘i he ‘aho ‘o e faingata‘a.
20Ko e to‘o hoto kote he ‘aho momoko,
Ko e lingi ‘a e vinika ki he sota,
Ko e tuha ia ‘o e hiva ‘ani hiva ki he loto kovi.
21Kapau ‘oku fiekaia ho fili,
Fafanga ia;
Kapau ‘oku ne fie inua,
‘Ange hano inu:#Lom 12.20
22He ko ho‘o fai pehē,
Te ke fokotu‘u ai ‘a e ngaahi malala‘i afi ki hono ‘ulu;
Pea ko Sihova te ne totongi ai kiate koe.
23Ko e matangi tokelau ‘oku ne fakatupu ‘uha;
Pehē ‘a e fofonga mamahi ‘e ha ‘elelo lau fufū.
24‘Oku ngutuhua ange ‘ete nofo ‘i ha tuliki ‘o ha tu‘a fale,
‘I he‘ete ‘apitanga mo ha fefine fa‘a kē.
25Ko e vai momoko ki ha taha mate he fie inu,
Ko e tuha ia ‘o e ongoongolelei mei ha fonua mama‘o.
26Ko e matavai kuo kele‘i,
Mo e fauniteni kuo maumau,
Ko e faitotonu ia kuo uesia ‘i he ‘ao ‘o e angahala.
27Ko e kai honi lahi ‘oku ‘ikai lelei:
pea ‘oku pehē pē mo e fiema‘u lāngilangi.#25.27 ‘oku… lāngilangi; ‘Oku ‘ikai ke mahino lelei ‘a e faka-Hepelū ‘o e laine ko ení, ka ‘oku ngali tonu ‘a hono hiki ‘o: ‘oku pehē pē mo e tōtu‘a ‘a e fiema‘u lāngilangí.
28Ko e kolo kuo holo, ‘o ‘ikai kei ai hano ‘ā,
Ko e tangata ia ‘oku ‘ikai mapuke hono loto.
Currently Selected:
PALŌVEPI 25: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
