PALŌVEPI 24
24
Ko e Akonaki Hono Hongofulu Mā Hiva
1‘OUA na‘a meheka ki he kakai kovi,
Pea ‘oua na‘a ke holi ke fafale kiate kinautolu:
2He ko e fakamālohi pē: ‘oku fakakaukau ki ai honau loto,
Pea ko e pau‘u pē ‘oku lea‘aki ‘e honau loungutu.
Ko e Akonaki Hono Uofulu
3Ko e poto pē ‘oku langa ai ha fale;
Pea ko e fai fakapotopoto ‘a ia ‘oku tu‘u ma‘u ai:
4Pea ko e ‘ilo ‘oku fakafonu ai ‘a e ngaahi loki
‘I he koloa kehekehe ‘oku mahu‘inga mo masani.
Ko e Akonaki Hono Uofulu Mā Taha
5Ko e to‘a ‘oku poto ko e mālohi mo‘oni ia;
Pea ko e tangata ‘ilome‘a ‘oku toka‘i ai hono ivi;
6He hili ‘a e ngaahi fakakaukau lelei te ke fai ‘a e tau,
Pea ‘i he lahi ‘a e fale‘i ‘oku ai ha tu‘umālie.
Ko e Akonaki Hono Uofulu Mā Ua
7Ko e ngaahi fa‘ahinga poto ko e ‘ū feo kula ia ki he vale:
Ko hono ō ia ‘oku ‘ikai te ne mafa‘a hono ngutu ‘i he matanikolo.
Ko e Akonaki Hono Uofulu Mā Tolu
8Ko ia ‘oku fakakaukau ke fai ha kovi,
‘Oku ui ia ko e tangata puleaki.
9Ko e angahala ko e fakakaukau koto vale:
Pea ko e tama taukae ‘oku fakalili‘a ki ai ‘a e nofo.
Ko e Akonaki Hono Uofulu Mā Fa
10Na‘a ke vaivai koā ‘i he ‘aho ‘o e faingata‘a,
Tā ‘oku fakangatangata pē ho ivi.
Ko e Akonaki Hono Uofulu Mā Nima
11Fakahaofi ‘a kinautolu ‘oku ‘ave ke mate,
Pea ‘oku ‘alu tetetete pē ke tāmate‘i;
Tauange mo koe ke ke ta‘ofi.
12Kapau te ke lea mai,
“Sī, na‘e ‘ikai te mau ‘ilo ‘oku pehē:”
‘Ā, ko ia ‘oku ne fua ‘a e ngaahi loto
‘Ikai ‘e mahino kiate ia?
Pea ko ia ‘oku ne tauhi ho laumālie
‘Ikai ‘oku ne ‘ilo pē?
Pea ‘ikai te ne fakafoki ki he tangata
‘a e me‘a kuo ne fai?
Ko e Akonaki Hono Uofulu Mā Ono
13Tama, ke ke kai honi, he ‘oku sai,
Pea ‘oku melie ki ho‘o ‘ao‘ingutu ‘a e honi ‘oku tafe noa mai;
14Ke pehē ha‘o ongo‘i ‘a e poto ki ho laumālie:
Ka ‘iloange ‘oku ke ma‘u ia, ‘oku ai ‘a e ‘Amui,
Pea ‘e ‘ikai tu‘usi ho‘o ‘amanaki.
Ko e Akonaki Hono Uofulu Mā Fitu
15Siana angahala, ‘oua ‘e tokamalumu ki he nofo‘anga ‘o e faitotonu:
‘Oua ‘e vete ‘a e potu ‘oku ne tokoto ai;
16He ‘e tu‘o fitu ‘a e tō ki lalo ‘a e faitotonu,
Ka ne tu‘u pē:
Ka ‘oka hoko ha tu‘utāmaki ki he kau angahala,
Pea nau mafuli ai.
Ko e Akonaki Hono Uofulu Mā Valu
17‘Oua te ke fiefia ‘i he toka ho fili,
Pea ‘oua na‘a tome‘e ho loto ‘i he‘ene mafuli:
18Na‘a sio ki ai ‘a Sihova, pea tau kovi ki hono finangalo,
‘O ne le‘ei hono houhau meiate ia.
Ko e Akonaki Hono Uofulu Mā Hiva
19‘Oua te ke ha‘aki hoha‘a koe‘uhi ko e kau faihala:
‘Oua te ke meheka koe‘uhi ko e kau angahala:
20He ‘oku ‘ikai ha ‘Amui ki he kakai kovi;
Ko e maama ‘a e kau angahala ‘e me‘a mo mate.
Ko e Akonaki Hono Tolungofulu
21‘Apasia kia Sihova, tama, pea ki he tu‘i;
‘Oua te ke felāve‘i mo kinautolu ‘oku fe‘alu‘aki:
22He ‘e hoko fakafokifā ‘enau tu‘utāmaki;
Pea ko e fakangata honau ta‘u ‘oku ‘ilo ‘e hai?
Ko e ngaahi Akonaki Kehe he Potó
23Ko eni foki ‘oku ‘a e kau punake.
Ko e hūmataniu ‘i he fakamaau ‘oku ‘ikai lelei.
24Ko ia ‘oku ne pehē ki he hia, “Tonuhia koe,”
‘E kape‘i ia ‘e he ngaahi kakai, ‘e va‘inga‘aki ia ‘e he ngaahi fa‘ahinga.
25Ka ko kinautolu ‘oku tautea ‘a e fa‘ahinga ko ē, te nau sai;
Pea ‘e hoko kiate kinautolu ha tāpuaki lahi.
26Ko ia ‘oku fai ha tali ‘oku tonusika,
Ko e taha ia ‘oku ‘uma ki ho ngutu.
27Tokonaki ho‘o ngāue ‘i tu‘a,
Pea teuteu ma‘au ‘i he vao;
Hili ia pea ke nofo ke langa hao fale.
28‘Oua te ke hoko ko e fakamo‘oni tu‘unga‘a ki ho kaungā‘api;
He te ke fai kākā koā ‘aki ho ngutu?
29‘Oua te ke pehē,
Hangē ko ‘ene fai kiate au, ‘e pehē ‘eku fai kiate ia;
Te u fakafoki ki he tangata ‘o taau mo e me‘a na‘a ne fai.”
30Ne u laka ange ‘i he vao ‘o e matāpule makau,
‘Io, ‘i he tu‘a ngoue vaine ‘a e tangata masiva loto;
31Pea tā kuo ‘alu hake ‘a e vao ‘o ‘osi,
Kuo faliki ‘aki ‘a e talatala,
Pea ko hono ‘āmaka kuo holo.
32Pea u tu‘u ‘o sio,
‘O ‘ave ki ai hoku loto:
Na‘a ku siofi,
Na‘a ku ma‘u akonaki mei ai.
33“Ka u mohe si‘i atu pē,
Ka u ki‘i kemo hifo mu‘a,
Ha‘aku ki‘i mohe fehulunaki.”–#Pal 6.10-11
34Tā ‘e hoko kiate koe ha masiva hangē ha pāpani;
Mo e fusimo‘omo hangē ha tangata to‘o mahafu.
Currently Selected:
PALŌVEPI 24: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
