PALŌVEPI 23
23
Ko e Akonaki Hono Ono
1KAPAU ko ho‘o nofo ke keinanga mo ha pule,
Ke ke mātu‘aki tokanga kiate ia ‘oku mo taumafa:
2‘Io, na‘a ke mei ‘ai ha hele ki ho kia,
Kapau ko e tangata u‘akai koe.
3‘Oua te ke havala ki he‘ene ngaahi ma‘anga ngako,
He ko e me‘akai kākā.
Ko e Akonaki Hono Fitu
4‘Oua te ke fakaongosia ke ma‘u koloa;
Tuku ho‘o feinga poto ko ia;
5He te ke lava ke kilo puna ki ai, he ‘oku ‘ikai?
He ‘oku mātu‘aki ‘ai kapakau ia,
Hangē ha ‘īkale ‘oku puna ki he ‘atā.
Ko e Akonaki Hono Valu
6‘Oua te ke kai ‘a e me‘akai ‘a ha taha sio kovi,
Pea ‘oua te ke havala ki he‘ene ngaahi ma‘anga ngako;
7‘E hangē ha taha ‘oku fai fika ‘i hono loto.
Ko hono anga ia: “Kai mo inu”–ko ‘ene lea ia kiate koe,
Ka ko hono loto ‘oku ‘ikai ‘iate koe.
8Ko e momo‘i me‘a ne ke kai kuo ke mei lua‘aki;
Pea ke maumau‘ia he ngaahi lea veveho ne ke fai.
Ko e Akonaki Hono Hiva
9‘Oua te ke lea tonu hifo ki ha vale;
He te ne manuki‘i ‘a e poto ‘o ho‘o lau.
Ko e Akonaki Hono Hongofulu
10‘Oua te ke hiki ‘a e kau‘ā tupu‘a;
Pea ‘oua ‘e hū ki he ngaahi kongavao ‘o e tamai mate:
11He ko honau koeli ko e mafi;
Pea ko ia ia te ne hopo mo koe ko honau taukapo.
Ko e Akonaki Hono Hongofulu mā Taha
12Taki mai ho loto ki he tautea,
Ko e Akonaki Hono Hongofulu Mā Ua
Mo ho telinga ke tali ‘a e ngaahi lea faka‘ilo.
13‘Oua te ke ta‘ofi ‘a e tautea mei he tamasi‘i:
Kapau te ke taa‘i ia ‘aki ‘a e ‘akau, ‘e ‘ikai te ne mate.
14Ko koe te ke taa‘i ia ‘aki ‘a e ‘akau,
Ko e Akonaki Hono Hongofulu Mā Tolu
Ka ko ho‘o fakahao ia ‘ene mo‘ui mei he Vanu.
15Tama, kapau ‘e faifai pea poto ho loto,
Ko ho‘oku ni loto pē ‘e fiefia:
16Pea ‘e me‘e hopohopo hoku kofuua,
‘Oka ‘ai mai ‘e ho ngutu ‘a e ngaahi lea totonu.
Ko e Akonaki Hono Hongofulu Mā Fā
17‘Oua na‘a faka‘amua ‘e ho loto ki he kau angahala:
Ka ke feinga‘i ‘a e ‘apasia kia Sihova he ‘aho kotoa pē
18He ‘oku ai ‘a e ‘Amui;
Ko e Akonaki Hono Hongofulu Mā Nima
Pea ‘e ‘ikai tu‘usi ho‘o ‘amanaki.
19Tama, tokanga ‘e koe ke ke poto,
Fakatotonu ho loto ‘i he Hala.
20‘Oua te ke ului ki he kau kai kava;
‘A e fa‘ahinga ‘oku hulu ‘enau kai kanomate.
21‘E hoko ko e fusimo‘omo ‘a e inu mo e kai fakaputa.
Pea ‘e iku ki he kofu mahaehae ‘a e fa‘a mohe.
Ko e Akonaki Hono Hongofulu Mā Ono
22Tokanga ki ho‘o tamai, he ko eni ia na‘e fakatupu koe,
Pea ‘oua te ke ta‘etoka‘i ‘oka motu‘a ho‘o fa‘ē.
23Fakatau mai ‘a e mo‘onia,
Pea ‘oua ‘e fakatau atu;
‘A e poto mo e akonaki mo e ‘ilo.
24‘E mātu‘aki tome‘e ‘a e tamai ‘a ha tangata faitotonu:
Pea ko ia kuo ne fakatupu ha poto, te ne fiefia ‘iate ia.
25‘Ofa ke fiefia ho‘o tamai mo ho‘o fa‘ē,
‘Io, ke tome‘e ‘a ia na‘a ne fā‘ele‘i koe.
Ko e Akonaki Hono Hongofulu Mā Fitu
26Tama, tuku mai ho loto,
Pea ke faka‘ofo‘ofa‘ia ‘i hoku ngaahi ‘alunga:
27He ko e luotō loloto ‘a e pa‘umutu;
Pea ko e fefine kehe ko e luo pokosi‘i.
28Tala atu, ‘oku ne toi hangē ha kaiha‘a,
Pea ‘oku ne fakatokolahi ‘a e kau kākā ‘i he nofo.
Ko e Akonaki Hono Hongofulu Mā Valu
29Ko hai ‘oku ‘oiauē?
Ko hai ‘oku “Fakapō:”
Ko hai ‘oku fa‘a kē?
Ko hai ‘oku lāunga tu‘u?
Ko hai ‘oku kafo tu‘unga‘a pē?
Ko hai kuo kula hono mata?
30‘A kinautolu ‘oku nofo fuoloa ‘o inu uaine;
‘A kinautolu ‘oku ‘alu fano ke ‘ahi‘ahi ‘a e uaine hu‘i kehekehe.
31‘Oua te ke sio ki he uaine
He‘ene fakakulokula mai, ‘ene ho‘ata mei he ipu,
Si‘ene momole hifo:
32Ko hono iku‘anga ‘oku ne u‘u hangē ha ngata,
Pea huhu hangē ha kēlasa.
33‘E sio ho mata ki he ngaahi me‘a kehe,
Pea ‘e ‘a‘au ‘e ho loto ‘a e ngaahi me‘a faka‘ulia.
34Pea te ke hangē ha taha ‘oku tokoto ‘i loto tahi,
Pe ha taha ‘oku tokoto he funga sila.
35“Kuo nau taa‘i au,
Ka na‘e ‘ikai te u lavea ai;
Kuo nau tenge au,
Ka na‘e ‘ikai te u ‘ilo;
‘Afē te u ‘ā.
Ka u toe kumi ki ai ā.”
Currently Selected:
PALŌVEPI 23: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
