PALŌVEPI 22
22
1KO E ongoongolelei ko e me‘a ia ke fili mu‘a ki ai ‘i he koloa lahi:
Pea ‘oku ngutuhua ange ke te ‘ofeina ‘i ha siliva mo ha koula.
2‘Oku femili ‘a e koloa‘ia mo e masiva:
Ko Sihova ai pē na‘a ne ngaohi honau kotoa.
3Ko e fakapotopoto ‘oku ne sio ki he kovi, ‘o ne toi:
Ka ko e hehemangofua ‘oku nau laka atu pē, ‘o mo‘ua ai.
4‘Oku tata‘o mai ki he anga malū ‘a e ‘apasia kia Sihova:
Ha‘u ai mo e koloa mo e ongoongo mo e mo‘ui.
5Koni talatala, koni tauhele,
‘Oku felei ‘aki ‘a e hala ‘o e mamio:
Ko ia ‘oku ne tokanga ki hono laumālie te ne fakamama‘o mei ai.
6‘Atu ako ki ha tamasi‘i, ‘o taau mo hono ‘alunga,
Tala atu, ‘oka ne ka motu‘a ‘e ‘ikai te ne hiki mei ai.
7Ko e koloa‘ia ‘oku ne pule ki he masiva;
Pea ko ia kuo ne fai ha nō, ‘oku ne tamaio‘eiki ki he tangata kuo tali ‘a e nō.
8Ko ia ‘oku ne tūtuu‘i ‘a e kākā ‘oku ne utu ‘a e kovi:
Pea ko e tokotoko na‘a ne pehē ‘e fakaai ‘aki ‘ene ‘ita, ‘e mole.
9Ko e fofonga ‘ofa, ko eni ia ‘e fai tāpuekina;
He ‘oku ne foaki mei he‘ene me‘akai ki he masiva.
10Kapusi ‘a e tama kakae, pea ‘e hū mo ia ki tu‘a ‘a e kē:
Pea ‘e ngata ‘a e fakakikihi mo e fakamā.
11Ko ia ‘oku mamahi‘i ‘a e loto ma‘a, mo e lea lelei, ‘e kaume‘a ‘aki ia ‘e he tu‘i.
12Ko e fofonga ‘o Sihova ‘oku ne tauhi ‘a e ‘ilo;
Ka ne fulihi ‘a e lea ‘a e kākā.
13Ko e lea ‘a e makau ‘oku pehē,
“Tokua ‘oku takatu‘a ha laione!”
“Ā, ‘e fakapoongi au ‘i ha hala ‘o e kolo!”
14Ko e ngutu ‘o e kau fefine muli ko e luotō loloto:
‘Ilonga ha mala‘ia meia Sihova te ne tō ki ai.
15‘Oku tāvani ‘a e vale ‘i he loto ‘o ha tamasi‘i:
Ko e ‘akau ako te ne vaea ke mavahe.
16Ko ia ‘oku ne fakamālohia ‘a e masiva
Ke fakalahi ki he‘ene koloa,
Mo ia ‘oku foaki ki he koloa‘ia,
‘Oku ne fai pē hono fakamasiva.
Ko e Akonaki ‘e Tolungofulu ‘i he Potó
17Fokotu‘u telinga mai ‘o ongo‘i e lea ‘ani punake,
‘O fakatokoto ho loto ki he me‘a kuo u ‘ilo;
18He te nau melie ‘o kapau te ke tauhi ‘i loto,
Kapau te nau nofo ai pē ‘i ho ngutu foki.
19Koe‘uhi ā ke tu‘u ho‘o falala kia Sihova;
Ko ia ai, kuo u faka‘ilo ‘a e ngaahi me‘a ni kiate koe he ‘aho ni:
‘Io, kiate koe.
20Hono ‘ikai kuo u tohi ma‘au ha ngaahi me‘a fungani,
Ko e koto fale‘i mo e poto?
21Ke u faka‘ilo kiate koe
‘a e me‘a ‘oku fua ‘aki ‘a e ngaahi lea ‘o e mo‘ui;
Ka ke foki mo koe kiate kinautolu na‘e fekau atu koe ‘a e ngaahi lea ‘a ia ko e mo‘oni ‘atā.
Ko e ‘Uluaki Akonakí
22‘Oua te ke fakamālohia ha masiva koe‘uhi ko e masiva,
Pea ‘oua te ke laiki ‘a e vaivai ‘i he matanikolo;
23He ko Sihova te ne tu‘u ma‘anau taukapo,
Pea te ne fa‘ao me‘a meiate kinautolu ‘oku fa‘ao mei he fa‘ahinga ko ē,
‘O kanoni ‘aki ‘enau mo‘ui.
Ko e Akonaki Hono Ua
24‘Oua te ke kaume‘a mo ia ‘oku fa‘a ‘ita;
Pea ‘oua ‘e ō mo e tangata tafulu:
25Na‘a ‘iloange te ke ako hono ngaahi ‘alunga,
‘O ke ma‘u ai ha hele ki ho laumālie.
Ko e Akonaki Hono Tolu
26‘Oua te ke ului ki he fa‘ahinga ‘oku ‘atu nima,
‘A kinautolu ‘oku hoko ko e talifaki ‘o e ngaahi mo‘ua:
27Koe‘uma‘ā ke nau ‘ave ‘a e mohenga ‘oku ke lolotonga tokoto ai,
Ko e ‘ikai ha‘o me‘a ke totongi ‘aki.
Ko e Akonaki Hono Fā
28‘Oua te ke hiki ‘a e kau‘ā tupu‘a,
‘A ia na‘e fokotu‘u ‘e ho tupu‘anga.
Ko e Akonaki Hono Nima
29‘Oku ke vakai ha tangata ‘oku nimenima he fai hono lakanga?
Te ne taka he ‘ao ‘o e ngaahi tu‘i;
‘E ‘ikai te ne taka he ‘ao ‘o e kakai ta‘e‘iloa.
Currently Selected:
PALŌVEPI 22: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
