PALŌVEPI 20
20
1KO uaine ko e tama ta‘emālū‘ia,
Ko kava mālohi ko e tama maveuveu;
‘Ilonga ha taha ‘oku holi ai ‘oku ‘ikai ko e poto.
2Ko e ngeia ‘o ha tu‘i ‘oku hangē ko e ngungulu ‘a ha laione:
Ko ia ‘oku ne ue‘i ia ‘oku ne hia ki he‘ene mo‘ui ‘a‘ana.
3Ko e me‘a ngali tangata ke te faka‘ehi‘ehi mei he kē:
Ka ‘ilonga ha vale pea vehi ki ai.
4Ko e makau ‘oku ‘ikai te ne fai ‘ene keli koe‘uhi ko e ‘alotāmaki:
Ka hoko ‘a e ututa‘u, te ne fiu‘a ‘eke kae ‘ikai.
5Ko e tu‘utu‘uni ‘i he loto ‘o e tangata ko e vai tu‘u fufū:
Ka ko e tama ‘ilo‘ilo te ne lava ke fusi hake.
6Ko e tokolahi ‘oku lau takitaha, ‘oku ‘ofa tokua:
Ka ko e fai mo‘oni ‘e ‘ilo ‘e hai?
7Ko ia ‘oku ne tauhi hono ‘alunga haohaoa koe‘uhi ko e totonu,
Ko e koto monū‘ia ‘ene fānau ‘amui.
8Ko e tu‘i ‘i he‘ene ‘afio ‘i hono taloni fakamaau,
‘Oku ne veteki ‘a e kovi kotoa ‘aki hono fōtunga.
9Ko hai te ne pehē,
Kuo u ngaohi hoku loto ke ma‘a,
Kuo u ‘atā mei he‘eku angahala?
10Ko e me‘a fakamamafa ‘oku faikehekehe,
Mo e fua lolo ‘oku faikehekehe,
‘Oku fakalili‘a ki ai ‘a Sihova fakatou‘osi.
11Na‘a mo e tamasi‘i, ‘oku mahino ia mei he‘ene fai anga
‘Oku ma‘a koā ‘ene ngāue?
‘Oku totonu?
12Ko e telinga ‘oku fanongo,
Mo e mata ‘oku sio,
Ko Sihova kuo ne ngaohi kinaua ‘osi pē.
13‘Oua ‘e ‘ofa ki he mohe, na‘a ke hoko ko e masiva;
‘Ā‘ā mu‘a, ka ke mohu me‘akai.
14“Me‘a kovi, me‘a kovi”–ko ‘ene lau ia te‘eki fakatau;
Ka ‘oka mahu‘i atu, ‘oku ne toki pole.
15‘Oku ai ‘a e koula,
Pea lahi ‘a e makakula koloa;
Ka ko e teunga mahu‘inga ko e loungutu poto.
16To‘o hono kofu, he na‘a ne hoko ko e talifaki ‘o e kehe na;
‘Io, puke ‘a e tangata foki, ko ‘ene talifaki ha kau muli.#20.16 ‘Oku fihi ‘a e laine ko ení.
17‘Oku vovo ki he tangata ‘a e me‘akai ma‘u kākā;
Kae iku pē ki he fonu teteve hono ngutu.
18‘Oku tu‘u ‘a e ngaahi tu‘utu‘uni ko e pou ‘e he fale‘i:
Pea hili fakakaukau lelei, fai ha tau.
19Ko ia ‘oku ‘alu fano mo e lau, ‘oku ne tatala ha me‘a fufū.
‘Oua na‘a femili mo ha taha ‘oku ngutu lau.
20Ko ia ‘oku kape ki he‘ene tamai pe ki he‘ene fa‘ē, ‘e tāmate‘i ‘ene maama ‘i he po‘uli ‘o e tu‘uapō.
21Ko e tofi‘a ‘oku fakavave kovi hono ma‘u ‘i he kamata‘anga,
Kae ‘ikai monū‘ia hono ngata‘anga.
22‘Oua te ke pehē,
Te u sauni ‘e au ‘a e kovi;
Tatali kia Sihova pea te ne fakamo‘ui koe.
23Ko e me‘a fakamamafa ‘oku fai kehekehe,
‘Oku fakalili‘a ki ai ‘a Sihova;
Pea ko e me‘afua kākā
‘Oku ‘ikai lelei.
24‘Oku meia ‘a Sihova ‘a e laka ‘a ha tangata mālohi;
Pea ko e tangata noa te ne ‘ilo fēfē hono ‘alunga?
25Ko e me‘a faka‘efihia ki he tangata ke ‘ioho, “Kōpano!”
Pea hili ‘ene tukumo‘ui, pea toki nofo ke sivi.
26Ko e tu‘i poto te ne fakamavahe ‘a e angahala,
‘O ne toe ‘omi ‘a e me‘a ‘au‘au kiate kinautolu.
27Ko e laumālie ‘o e tangata ko e maama ‘a Sihova,
‘Oku ne hakule ‘a e ngaahi leke ‘i he loto‘i loto kete.
28Ko e fai ‘ofa mo meesi ‘oku na le‘ohi ‘a e tu‘i;
Pea ‘oku ne pou ‘aki hono taloni ‘a e ofa.
29Ko e lāngilangi ‘o e fatutangata ‘a honau ivi;
Pea ko e teunga ‘o ha‘a mātu‘a ko e ‘ulu hinā.
30Ko e tafa ‘oku o‘o ne ‘asi ‘i he kovi:
Pehē ‘a e loholoho ‘oku ‘asi ‘i he loto‘i loto.#20.30 loto‘i lotó; pe loto‘i keté.
Currently Selected:
PALŌVEPI 20: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
