PALŌVEPI 19
19
1‘OKU ngutuhua ‘ange ha masiva ‘oku tauhi hono ‘alunga totonu.
‘I ha matāpule ngutu mamio, pea ko e vale foki.
2Tala atu, ‘oku ‘ikai lelei ke masiva ‘ilo ‘a e finangalo;
Pea ko ia ‘oku lele ‘aki ‘e hono va‘e, ‘oku fai hala.
3Ko e vale ‘a e tangata ‘oku fulihi hono hala:
Ka ‘oku hanu hono loto kia Sihova.
4Ko e ma‘u koloa ‘oku fakalahi ai hoto ngaahi kaume‘a:
Ka ko si‘i masiva, na‘a mo hono kaume‘a pē taha ‘oku fakamavahe mei ai.
5Ko e fakamo‘oni loi, ‘e ‘ikai ‘alu ta‘etautea:
Pea ko ia ‘oku hō‘aki loi, ‘e ‘ikai hao.
6‘E ‘omi holo ‘e he tokolahi ki he hou‘eiki:
Pea ‘oku fakaholo mai kotoa pē ki he nima homo ke kaume‘a.
7‘Oku fehi‘anekina ‘a e masiva ‘e hono kāinga kotoa:
Kae huanoa ‘a e mavahe meiate ia kotoa hono kau fe‘iloaki.#19.7 ‘Oku ‘ikai lava ‘a e hiki ‘o e laine ko eni. Kuo mole nai ‘a e lea ni‘ihi. Ka ko hono hiki ‘e taha eni; Ne‘ine‘i tokosi‘i hono ngaahi kaungāme‘á. Neongo ‘ene fiema‘u kaungāme‘a fēfē, ka ‘oku ‘ikai pē te ne lava ‘o ma‘u.
8Ko ia ‘oku ne ma‘u mai ‘a e poto, ‘oku ne ‘ofa ki he‘ene mo‘ui;
Pea ko ia ‘oku ne tauhi ‘a e ‘ilome‘a, ko hono ‘ātunga ē ‘ene mo‘ua ha monū.
9Ko e fakamo‘oni loi ‘e ‘ikai ‘alu ta‘etautea;
Pea ko ia ‘oku ne hō‘aki loi ‘e ‘auha.
10‘Oku ‘ikai hoa mo e vale ‘a e nofo fakausousa:
Huanoa ke pule ha tamaio‘eiki ki he hou‘eiki.
11Ko e fakapotopoto ‘a ha tangata ‘a ia ‘oku ne fakatotoka ai ki he ‘ita:
Pea ko ‘ene lakai ha angahala ko hono lāngilangi ia.
12Ko e mamahi ‘a ha tu‘i ‘oku hangē ko e ngungulu ‘a ha laione:
Ka ko ‘ene hāngai ‘ofa, ‘oku hangē ko e tō ‘a e hahau ki he lou‘akau.
13Ko e foha vale ko e lusa‘anga ‘o ‘ene tamai;
Pea ko e fa‘a kē ‘a hoto uaifi, ‘oku hangē ko e patatō ma‘u pē ha matatulutulu.
14Ko e fale mo e koloa ko e me‘a tuku fakaholoholo mei he mātu‘a:
Ka ko e uaifi fakapotopoto ko e me‘a meia Sihova ia.
15Ko e anga fakapikopiko ko hono ‘ātunga ai pē ‘a e mohe fakalōle‘a:
Pea ko e loto makau ‘e hōngea.
16Ko ia ‘oku ne tauhi ‘a e fekau, ‘oku ne tauhi ai ‘ene mo‘ui:
Ko ia ‘oku va‘inga‘aki hono ‘alunga, te ne mate.
17Ko e tali ‘a e nō ‘a Sihova ‘a ‘ete fai ‘ofa ki he masiva;
Pea te ne totongi kiate ia ‘a e me‘a ‘oku ne fai.
18Ako fakapoto ho foha, he ‘oku ai ha ‘amanaki:
Pea ‘oua na‘a pau ho loto ke tāmate‘i ia.#19.18 Pea… ia; pe Kae vakai na‘á ke fu‘u taa‘i lahi pea hoko ai pē mo ho‘o tāmate‘i.
19Ko e tangata ‘ita kakaha te ne fua hono tautea:
He kapau te ke ala ke ta‘ofi ko hono faka‘āsili ia.#19.19 He… ia; pe Ko ho‘o fakahaofi ia mei ha kovi, kuo pau ho‘o toe fakahaofi ia mei ha kovi ‘e taha.
20Tokanga ki ho fale‘i, pea tali akonaki:
Koe‘uhi ke ke poto ‘i ho ngaahi ‘aho ‘amui.
21‘Oku lahi ‘a e ngaahi fakakaukau ‘i he loto ‘o e tangata:
Ka ko e fale‘i ‘a Sihova, ko ia ia ‘e tu‘u.
22Ko e faka‘amu ‘a ha tangata ko ‘ene ‘ofa ia:#19.22 Ko e… ia; pe Ko e me‘a fakamā ‘a e ‘uakaí, pe Ko e me‘a ‘oku tokangaekina ai ha taha ko e fai mateaki.
Pea ‘oku ngutuhua ange ha tangata masiva ‘i he tangata loi.
23Ko e ‘apasia kia Sihova ‘oku ngāue ki he mo‘ui:
Pea ‘oku te mohe mākona ai ta‘e‘a‘ahi mai ha kovi.
24Kuo velo ‘e he makau na hono nima ki he tisi:
Tala atu, ‘e ‘ikai te ne ongosia hiki ia ki hono ngutu.
25Uipi‘i ‘a e tama kakae, pea ‘e loto poto ai ‘a e hehemangofua:
Pea akonaki‘i ha tangata ‘atamai, pea te ne ma‘u ha poto.
26Ko ia ‘oku ne fakamālohi‘i ‘ene tamai, mo kapusi ‘ene fa‘ē,
Ko e tama ia ‘oku ne fakatupu ‘a e mā mo e ongoongokovi.
27Tama, tuku ho‘o fanongo ako,
Ko ho‘o fai pē ke afe mei he ngaahi lea fakapoto.
28Ko e fakamo‘oni faka-Pileali ‘oku ne manuki‘i ‘a e me‘a fakalao:
Pea ko e ngutu ‘o e angahala ‘oku ne folofua ‘a e kovi.
29‘Oku teu ‘ani tautea ma‘a e kau manuki,
Mo e loholoho ki he tu‘a ‘o e kau vale.
Currently Selected:
PALŌVEPI 19: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
