PALŌVEPI 18
18
1KO E tangata mavahe ‘oku ne nofo‘aki kumi ‘a e holi ‘a‘ana:
Neongo pe ko e hā ha fale‘i ‘e fai, te ne ina ki ai.
2‘Oku ‘ikai ko e manako ‘a e vale ki he poto mo‘oni,
Ka koe‘uhi pē ke fufuke hono ‘atamai.
3Ka ha‘u ‘a e angahala, ‘e ha‘u ai foki ‘a e manukia:
Pea ō leva mo e ta‘etoka‘i ‘a e tautekovia.
4Ko e ngaahi lea ‘oku tō mei he ngutu ‘o ha tangata ko e vai misiteli pē:
Ko e matavai ‘o e poto ko e vaitafe ‘oku mahua atu.
5‘Oku ‘ikai lelei ke toka‘i ‘a e fofonga ‘o e angahala;
‘O fakahalaia ‘a e faitotonu ‘i he fakamaau.
6Ko e loungutu ‘o e vale ‘oku hanga ‘o kau ‘i he kē,
‘Io, ko hono ngutu ‘oku ne ui mai ‘a e loholoho.
7Ko e ngutu ‘o e sesele ko hono tu‘utāmaki ‘anga:
Pea ko hono loungutu ko e hele ‘o hono laumālie.
8Ko e ngaahi lea ‘a e tama ‘ave lau ‘oku hangē ko e ngaahi ma‘anga ngako,
Pea ko e fa‘ahinga ko ia ‘oku ‘alu hifo ki he loto he loto kete.
9Tala atu, ko ia ‘oku ngāue fakamu‘omu‘a nima ‘i hono lakanga,
Ko e tokoua ia ‘o e tangata ‘oku nofo ki he maumau me‘a.
10Ko e huafa ‘o Sihova ko e taua mālohi:
‘Oku lele ki ai ‘a e faitotonu ‘o ne malu ai.
11Ko e koloa ‘a e koloa‘ia ko hono kolo mālohi ia;
Pea ‘i he‘ene lau ‘a‘ana ko e fu‘u ‘ā mā‘olunga.
12‘I he panaki ‘a e have‘i, ‘oku ‘afungi ‘a e loto ‘o e tangata:
Pea ko e anga vaivai ko e fakamelomelo ‘o e hākeaki‘i.
13Ko ia ‘oku fai ‘ene tali ‘i he te‘eki ke ne fanongo,
‘Oku hoko ko e faka‘ilonga ‘o ‘ene vale mo e me‘a fakamā.
14Ko e laumālie fakatangata ‘o ha matāpule ‘oku ne matu‘uaki ‘ene mahaki:
Ka ko e laumālie maumau ko hai ‘e puke hake ‘a e me‘a fakafāfine ko ia?
15Ko e loto ‘o e tangata ‘atamai ‘oku ne ma‘u mai ‘a e ‘ilo:
Pea ko e telinga ‘o e kau poto ‘oku kumi ai pē ki he ‘ilo.
16Ko e me‘a‘ofa ‘a e tangata ‘oku faka‘atā hono hala,
‘O taki ia ki he ‘ao ‘o ha‘a mā‘olunga.
17Ko ia ‘oku fua lea ‘i he fakamaau ‘oku ngali totonu:
Ha‘u leva ‘a e taha, ‘o sivi hakili ia.
18‘Oku fakangata kē ‘e he fai talotalo,
‘O ne vaea ha ongo mafi.
19Ko e kāinga kuo te hia ki ai, ‘oku faingata‘a ange ‘i ha kolo mālohi,#18.19 ‘Oku ‘ikai ke mahino ‘a hono faka-Hepeluú, ka ‘oku pehē he ngaahi hiki fuoloa ‘e ni‘ihi: Ka ke tokoni ki ho kāingá, pea te nau hoko leva ko ho kolotau mālohí.
Pea ko e alā kē pehē ‘oku hangē ko e songo ‘o ha palasi.
20Ko e fua ‘o e lea ‘a ha matāpule ‘a ia ‘oku topono ai hono kete;
Ko e fua ‘o hono loungutu ‘oku ne mākona ai.
21Ko e mate mo e mo‘ui ‘oku puke ‘e he ‘elelo:
Pea ko ia ‘oku mamafa ki ai, te ne kai hono fua.
22Ko ia ‘oku ne ma‘u uaifi, ‘oku ne ma‘u ha monū:
Pea kuo ne lave ha ‘ofa meia Sihova.
23Ko e lea ‘a si‘i masiva ko e koto fakakolekole;
Ka ko e koloa‘ia ‘oku ne tali fefeka.
24Ko ia ‘oku tokolahi hono kau fe‘iloaki#18.24 Ko ia ‘oku tokolahi hono kau fe‘iloakí (pe hono ngaahi kaungāme‘á); Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: Ko e ngaahi fakakaungāme‘a ‘e ni‘ihi. ko hono ‘ātunga pē ‘ene lusa:
Ka ‘oku ai ha ‘ofa‘anga ‘oku ma‘u ange ‘ene piki ‘i hoto mo‘oni.
Currently Selected:
PALŌVEPI 18: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
