PALŌVEPI 15
15
1KO E tali malū ‘oku lolou ai ‘a e houhau:
Ka ko e lea māsila ‘oku ne langa‘i ‘a e ‘ita.
2Ko e ‘elelo ‘o e poto ‘oku ne ‘a‘au lelei ‘a e me‘a ‘oku ne ‘ilo:
Ka ko e ngutu ‘o e vale ‘oku ne huhua atu ‘ene sesele.
3Ko e ongo fo‘i fofonga ‘o Sihova ‘oku ‘i he potu kotoa pē:
He taulama ‘o e lelei mo e kovi.
4Ko e ‘elelo lea malū ko e ‘akau ‘o e mo‘ui tofu pē:
Ka ‘oka ‘i ai ha mamio, ‘oku lavea ai ‘a e laumālie.
5Ko e vale ia ‘oku ne ta‘etoka‘i ‘a e akonaki fakapoto ‘a ‘ene tamai:
Ka ko ia ‘oku ne tokanga ki ha valoki, ‘oku ne fai fakapotopoto.
6Ko e fale ‘o e faitotonu ko e fu‘u feleoko:
Ka ‘i he koloa hū ma‘u ‘a e angahala, ‘oku ‘i ai ha mamahi‘anga.
7Ko e loungutu ‘o e poto ‘oku nau laku atu ‘a e me‘a kuo ‘ilo:
Ka ko e loto ‘o e vale ‘a e me‘a ‘oku ‘ikai pau.
8Ko e feilaulau ‘ani angahala ‘oku fakalili‘a ki ai ‘a Sihova;
Ka ko e lotu ‘ani faitotonu ko hono mamana ia.
9‘Oku fakalili‘a ‘a Sihova ki he ‘alunga ‘o e angahala:
Ka ‘oku ne ‘ofa kiate ia ‘oku ha‘ao ki he totonu.
10‘Oku ai ha tautea kovi ma‘ana ‘oku li‘aki ‘a e Hala:
‘Ilonga ‘a ia ‘oku fehi‘a ki he valoki te ne mate.
11Na‘a mo Hētesi mo ‘Apatoni ka ‘oku na tekefili ‘i he ‘ao ‘o Sihova;
Kae huanoa ‘a e ngaahi loto ‘o e hako‘i tangata.
12Ko e tama kakae ‘oku ‘ikai te ne manako ke valoki ia ‘e ha taha:
‘Oku ‘ikai te ne fafale ki he kau poto.
13‘Oku tupu mei he loto fiefia ‘a e fofonga malimali:
Pea ‘oku ō mo e mamahi ‘a e loto ‘o e laumālie maumau.
14Ko e loto ‘o e tangata ‘atamai ‘oku ne kumi ki he poto:
Ka ko e ngutu ‘o e vale ‘oku ne me‘akai ‘aki ‘a e vale pē.
15Ko e ‘aho kotoa pē ‘o si‘i ta‘ali‘ekina ‘oku kovi:
Ka ko ia ‘oku fakatu‘alelei ‘oku ne kai kātoanga ma‘u pē.
16‘Oku ngutuhua ange ha ki‘i me‘a ‘oku ma‘u mo e ‘apasia kia Sihova,
‘I ha fu‘u koloa ‘oku ō mo e maveuveu.
17‘Oku lelei ha ‘umu lū ‘oku kiki ‘aki ‘a e ‘ofa,
‘I ha pulu fafanga ‘oku ‘omi mo e fehi‘a.
18‘Oku fakalanga kē ‘a e tangata loto ‘ita:
Ka ko ia ‘oku fakatotoka ki he ‘ita ‘oku ne fakaleleia.
19Ko e hala ‘o e makau ‘oku hangē ‘oku felei ‘aki ‘a e ‘akau talatala:
Ka ko e hala ‘o e faitotonu ko e hala tanu.
20Ko e foha poto ko e fiefia‘anga ‘o ‘ene tamai:
Ka ko ha‘a vale ‘oku ne va‘inga‘aki ‘ene fa‘ē.
21Ko e fai vale ko e me‘a fakafiefia ki he masiva ‘atamai:
Ka ko e tangata poto ‘oku ne ‘alu fakatotonu atu.
22‘Oku maumau fakakaukau ‘a e ‘ikai fai ha alea:
Ka ‘oku tu‘u ‘oka tokolahi ‘a e fale‘i.
23Ka lava ‘e ha tangata ha tali ‘oku fe‘unga, ‘oku ai ‘ene fiefia:
‘Io, ko e lea ‘oku fai ‘i hono taimi totonu, hono ‘ikai lelei.
24Ko e hala ‘o e mo‘ui ki he tangata fakapotopoto ko e hala fakatahakehake:
Ko ‘ene fie hao mei Hētesi mo e ‘alu hifo.
25Ko e fale ‘o e fielahi ‘oku ta‘aki ‘e Sihova;
Ka ‘oku ne vili hifo ‘a e kau‘ā ‘o si‘i uitou.
26Ko e ngaahi fakakaukau kovi ‘oku fakalili‘a ki ai ‘a Sihova:
Ka ‘oku ma‘a ‘i hono ‘ao ‘a e ngaahi lea ‘ofa.
27Ko ia ‘oku fa‘ao koloa ‘oku ne fakamamahi hono fale ‘o‘ona:
Ka ko ia ‘oku fehi‘a ki he totongi fufū te ne mo‘ui.
28Ko e loto ‘o e faitotonu ‘oku ne fakakaukau ha tali lelei:
Ka ko e ngutu ‘o e angahala ‘oku ne pu‘aki atu ‘ani kovi.
29‘Oku mama‘o ‘a Sihova mei he kau angahala:
Ka ko e lotu ‘o e faitotonu ‘oku ne ongo‘i.
30Ko e fauloulo ‘a e mata ‘oku ne langa ‘a e fiefia ‘i he loto.
Ko ‘ete ongona ha ongoongolelei ‘oku ne fakamomona ‘a e hui.
31Ko e telinga ‘oku tali ‘a e valoki fakamo‘ui
Te ne ‘apitanga ‘i he lotolotonga ‘o e kau poto.
32Ko ia ‘oku ne teke‘i ‘a e akonaki fakapoto ‘oku ne va‘inga‘aki hono laumālie:
Ka ko ia ‘oku tali valoki, ‘oku ne ma‘u poto ai.
33Ko e ‘apasia kia Sihova ko e fakatonutonu ‘o e poto:
Pea ko e anga vaivai ko e fakamelomelo ‘o e hākeaki‘i.
Currently Selected:
PALŌVEPI 15: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
