PALŌVEPI 14
14
1KO E poto ha fefine ‘oku kau ke ma‘uma‘uluta ai hono fale:
Ka ko ‘ene vale ‘oku hangē ko ‘ene ala ki ai ke hae.
2Ko ia ‘oku fou ‘i hono totonu ‘o‘ona ko e taha ia ‘oku ‘apasia kia Sihova:
Ka ko ia ‘oku afe mei hono ‘alunga, ‘oku ne ta‘etoka‘i ‘a ‘ene ‘Afio.
3‘Oku heke mai mei he ngutu ‘o e vale ha va‘a fielahi:#14.3 ‘Oku fihi.
Ka ko e loungutu ‘o e poto ‘oku ne ta‘ofi kinautolu mei ha me‘a pehē.
4Ka ‘ikai ha fanga pulu ‘e ma‘a ‘a e potu fafanga:
Kae lahi ‘a e me‘a ‘oku tupu mei he ivi ‘o e manu toho palau.#14.4 ‘e ma‘a… palau; pe ‘e hala ha me‘akai ‘i ho‘o feleokó, ka ‘oka ‘i ai, pea ‘e fonu ho‘o feleokó he me‘akai, pe ‘e ‘i ai ho‘o ki‘i me‘akai ‘e ma‘u, ka ‘oka ‘i ai, ‘e lahi ‘aupito ho‘o me‘akai ‘e ala ma‘ú.
5Ko e fakamo‘oni tōnunga ‘oku ‘ikai te ne loi:
Ka ‘oku hō‘aki loi ‘a e fakamo‘oni kākā.
6Ko e kumi ‘a e kakae ki he poto ‘oku ‘ikai ke sia‘a:
Ka ‘oku ma‘ungofua ‘a e ‘ilo ki he mafakakaukau.
7‘Alu ‘o feangai mo ha tangata vale:
Kae ‘ikai ‘aupito te ke ‘ilo ha tō mei hono loungutu ha poto.#14.7 ‘Oku fihi.
8Ko e poto ‘a e fakapotopoto ‘a‘eni, ke ‘ai ke mahino hono hala:
Ka ko e vale ‘a e kau vale ke fai fakakākā.
9Ko e feilaulau totongi ‘a e vale ‘oku ne tuhu kakae ki ai:
Ka ko e kau faitotonu ‘oku feluteni honau vā.#14.9 ‘Oku ‘ikai ke mahino ‘a e faka-Hepelū ‘o e vēsí ni.
10Ko ‘ete mamahi ‘oku ‘ilo pē ‘e hoto loto ‘o‘ota:
Pea ‘oku ‘ikai ha taha ‘e felāve‘i mo au he‘eku fiefia.
11Ko e fale ‘o e angahala ‘e faka‘auha:
Ka ko e tēniti ‘o e faitotonu ‘e tu‘u mo e lau.
12‘Oku ai ha hala ‘oku hā matamata totonu ki he tangata:
Ka ‘oku tū‘ulu atu ki he ngaahi hala ‘oku fakatau ki he mate.#Pal 16.25
13Na‘a mo e lolotonga ‘ete kata, ka ‘oku teteve hoto loto:
Pea ko e iku‘anga ‘o ē–‘o e fiefia–ko e mamahi.
14Ko e holomui loto ‘e faifai pea ne mākona ‘i he‘ene fāliunga:
Pea ‘e mākona ‘a e tangata lelei meiate ia pē.#14.14 meiate ia pē; Ko hono faka-Hepeluú ia, ka ‘oku ngali tonu hono hiki ‘o: koe‘uhí ko ‘enau ngaahi me‘a na‘e faí.
15Ko e hehemangofua ‘oku ne tui ki he lea kotoa:
Ka ko e fakapotopoto ‘oku ne fakakaukau ‘ene laka.
16Ko e tangata poto ‘oku ne manavahē, ‘o afe mei he kovi:
Ka ko e vale ‘oku ‘ai ‘ene faka‘ita, ‘o ‘alu ta‘etokanga.
17Ko e tangata māfanangofua ‘oku fai ‘a e me‘a ‘oku ngali vale;
Ka ko e tangata puleaki ‘oku fehi‘anekina.#14.17 fehi‘anekina; Ko hono faka-Hepeluú ia, ka ‘oku pehē ‘i he hiki fuoloa ‘e taha: mokomoko ai pē hono lotó.
18Ko e hehemangofua ‘e tō honau tofi‘a ko e vale:
Ka ko e kau fakapotopoto ‘e ai honau kalauni ko e ‘ilome‘a.
19‘Oku tulolo ‘a e kovi ‘i he ‘ao ‘o e kakai lelei:
Mo e kau angahala ‘i he matanikolo ‘o e faitotonu.
20Ko si‘i masiva, na‘a mo hono kaungā‘api ‘oku ne fehi‘a ki ai:
Ka ‘oku tokolahi ‘a e fafale ‘o e koloa‘ia.
21Ko ia ‘oku ne ta‘etoka‘i hono kaungā‘api ‘oku ne angahala:
Ka ko ia ‘oku ‘ofa ki he masiva ko e koto monū‘ia pē ia.
22‘Ikai te nau ‘alu hē ‘a kinautolu ‘oku fakakaukau ha kovi ke fai?
Kae tō ha ‘ofa mo e fai mo‘oni kiate kinautolu ‘oku fakakaukau‘i ha lelei.
23‘I he fakaongosia kotoa ‘oku ai hano fua:
Ka ko e lau ‘a e ngutu, ‘oku iku pē ki he fakamasiva.
24Ko e kalauni ki he kau poto ‘a ‘enau koloa:
Ko e vale ‘a e kau vale ko e vale ai pē.#14.24 Ko e… ai pē; ‘Oku ‘ikai ke mahino ‘a e faka-Hepeluú, ka ‘oku ngali tonu hono hiki ‘o: ‘Oku ‘ilonga pē e valé he‘ene valé.
25‘Oku fakahaofi mo‘ui ‘e ha fakamo‘oni tōnunga:
Ka ko ia ‘oku hō‘aki loi ko e koto kākā.
26‘Oku ō mo e ‘apasia kia Sihova ‘a e falala mālohi:
Pea ko e fānau ‘a ha taha pehē, ‘oku ai hanau pāletu‘a.
27Ko e ‘apasia kia Sihova ko ha fauniteni ia ‘o e mo‘ui,
Ke te hao ai mei he ngaahi tauhele ‘a mate.
28Ko e lāngilangi ‘o e tu‘i ‘oku tu‘u ‘i he tokolahi ‘o e kakai:
Pea ko e luku ‘a e kakai ko e mole hono ngeia.
29Ko ia ‘oku fakatotoka ki he ‘ita ko e tama ‘atamai lahi:
Ka ko ia ‘oku loto ‘oho, ko hono ‘inasi mu‘a ko e vale.
30Ko e loto ‘oku toka ko e mo‘ui‘anga ‘o e sino kotoa:
Ka ko e meheka, ko e popo tofu pē ‘oku totolo ‘i hoku ngaahi hui.
31Ko ia ‘oku ne ta‘omi si‘i masiva
‘Oku ne talakaa‘i ‘a e ‘Afio na‘e ngaohi ia:
Ka ko ia ‘oku fai ‘ofa ki he fusimo‘omo
‘Oku ne fakaongolelei ‘a ‘ene ‘Afio.
32‘I he hoko mai ‘ene tu‘utāmaki ‘oku mafuli ‘a e angahala
Ka ko e faitotonu ‘oku ai ha pāletu‘a ‘i he‘ene pekia.#14.32 pekiá; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: anga leleí.
33Ka ma‘u ha poto ‘e ha tangata ‘atamai,
‘Oku nofo nonga ia ‘i hono loto:
Ka ‘oka hū ha me‘a pehē ki ha vale,
‘Oku ne fie‘iloa leva.#14.33 Ka… leva. Ko hono fakalea ‘i he hiki fuoloa ‘e taha ko e: Ka ‘oku ‘ikai ha momo‘i ‘ilo ‘a e valé ki he potó.
34Ko e faitotonu ‘oku ne hākeaki‘i ha pule‘anga:
Ka ko e faihala ko e mā‘anga ‘o ha kakai.
35‘Oku ‘ofeina ‘e he tu‘i ha tamaio‘eiki ‘oku fai fakapotopoto:
Ka ‘oku tō hono houhau kiate ia ‘oku fakatupu mā.
Currently Selected:
PALŌVEPI 14: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
