NŌMIPA 9
9
Ko e Pāsova Hono Uá
1PEA folofola ‘a Sihova kia Mōsese ‘i he Toafa ‘o Sainai, ‘i he ‘uluaki māhina ‘o hono ua ‘o e ta‘u hili ‘enau hū mai mei ‘Isipite, ‘o pehē, 2Ke fai foki ‘e ha‘a ‘Isileli ‘a e kātoanga ‘o e Pāsova ‘i hono taimi totonu. 3‘I hono ‘aho hongofulu mā fā ‘o e māhina ni, efiafi hifo, te mou fai ia ‘i hono taimi kotofa: te mou fai ‘o fakatatau ki hono ngaahi tu‘utu‘uni kotoa mo hono ngaahi kupu‘i konisitūtone. 4Pea lea ‘a Mōsese ki ha‘a ‘Isileli ke nau fai ‘a e Pāsova. 5Pea nau fai ‘a e Pāsova ‘i he ‘uluaki māhina, ‘i hono ‘aho hongofulu mā fā, efiafi hifo, ‘i he Toafa ‘o Sainai: hangē ko e ngaahi tu‘utu‘uni ‘a Sihova kia Mōsese, na‘e pehē tofu pē hono fai ‘e ha‘a ‘Isileli.
6Pea na‘e ai ha tu‘unga tangata kuo ta‘ema‘a ko ha pekia, pea na‘e ‘ikai te nau lava ke fai ‘a e Pāsova ‘i he ‘aho ko ē, ko ia na‘a nau ‘unu‘unu mai kia Mōsese pea kia ‘Ēlone ‘i he ‘aho ko ia: 7pea na‘e pehē ‘a e tu‘unga tangata kiate ia, Ko kimautolu ko e ta‘ema‘a tokua koe‘uhi ko ha pekia: ko e hā ‘oku ta‘ofi ai ‘emau ‘atu ‘a e kōpano ‘a Sihova ‘i he lotolotonga ‘o ha‘a ‘Isileli ‘i hono taimi tu‘utu‘uni?
8Pea tali ‘e Mōsese kiate kinautolu, Tu‘u pē, ka u fakaongo pe ko e hā ‘a e tu‘utu‘uni ‘a e ‘Eiki kiate kimoutolu.
9Pea folofola ‘a e ‘Eiki kia Mōsese, ‘o pehē, 10Lea ki ha‘a ‘Isileli, ‘o pehē, Ka ai ha tangata ‘oku ta‘ema‘a ko ha pekia, pe ‘oku mama‘o ‘i ha fononga, pe ko ha taha ‘iate kimoutolu, pe ‘i ha to‘utangata ‘amui, ka te ne fai pē ‘a e Pāsova kia Sihova. 11‘I hono hongofulu mā fā ‘o e ‘aho ‘i hono ua ‘o e māhina te nau fai ia, efiafi hifo; te nau kai ia mo e mā ta‘elēvani mo e lou‘akau konokona: 12‘e ‘ikai te nau fakatoe hano me‘a ki he ‘apongipongi, pe fesi‘i hano hui ‘e taha: te nau fai ia ‘o fakatatau ki he tu‘utu‘uni kotoa ‘o e Pāsova.#‘Eki 12.46; Sioné 19.36 13Ka ko e tangata ‘oku kalo mei he Pāsova, ka ‘oku ma‘a, pea ‘oku ‘ikai ke tō fononga, ‘e tu‘usi ‘a e laumālie ko ia mei hono kakai; kuo ‘ikai te ne ‘atu ‘a e kōpano ‘a Sihova ‘i hono taimi kotofa, ko ia ‘e fua ‘e he tangata ko ia ‘ene angahala.
14Pea kapau ‘e ‘āunofo ha muli mo kimoutolu, pea ‘oku ne loto ke fai ‘a e Pāsova; hangē ko e tu‘utu‘uni ‘a e Pāsova, pea hangē ko hono konisitūtone, ‘e pehē ‘ene fai: ‘e taha pē ho‘omou tu‘utu‘uni, pe ko ha muli, pe ko ha tupu‘i fonua.
Ko Pou Afi
(‘Eki 40.34-38)
15Pea ‘i he ‘aho na‘e fokotu‘u ai ‘a e Tāpanekale na‘e ‘ufi‘ufi ‘e he ‘Ao ‘a e Tāpanekale, ‘a e Tēniti Fakamo‘oni‘anga: pea ‘i he efiafi na‘e hā ‘i he funga Tāpanekale ‘o hangē ko ha maama, ‘o a‘u ki he ‘apongipongi. 16Ko hono anga ai pē ia: na‘e ‘ufi‘ufi ia ‘e he ‘Ao, mo e me‘a hangē ha afi ‘i he pō. 17Pea ‘oka fakahā‘ele hake ‘a e ‘Ao mei he funga Tēniti, pea na‘e toki tuku fononga atu ‘a ha‘a ‘Isileli, pea ko e potu na‘e toka ai ‘a e ‘Ao, pea fokotu‘u tēniti ai ‘a ha‘a ‘Isileli. 18‘I he fekau ‘a Sihova na‘e tuku fononga atu ‘a ha‘a ‘Isileli, pea ‘i he fekau ‘a Sihova na‘a nau fokotu‘u tēniti: lolotonga na‘e toka ‘a e ‘Ao ‘i he funga Tāpanekale na‘e hunuki ‘enau tēniti. 19Pea ka fakatotoka ‘i he funga Tāpanekale ‘a e ‘Ao, ‘o ‘aho lahi, pea fai ‘e ha‘a ‘Isileli ‘enau fakafeangai kia Sihova, ‘o ‘ikai te nau fononga. 20Pea ko e taimi ni‘ihi na‘e ‘aho si‘i ‘a e ‘Ao ‘i he funga Tāpanekale: pea ka pehē ko e angi ‘a Sihova na‘a nau nofo tēniti ai, pea ko e angi ‘a Sihova na‘a nau fononga ai. 21Pea ko e taimi ni‘ihi na‘e ‘i ai ‘a e ‘Ao mei he po‘uli ki he pongipongi, pea fakahā‘ele ‘a e ‘Ao pongipongi, pea nau fononga: pe ko ha ‘aho mo ha pō pea toki fakahā‘ele ‘a e ‘Ao, ka nau fononga. 22Pe na‘e ‘aho ua, pe ko ha māhina, pe ko ha ta‘u, ‘ene ‘i he funga Tāpanekale ‘a e ‘Ao, ‘o toka ai; na‘e nofo pē ‘a ha‘a ‘Isileli, ‘o ‘ikai fononga atu: ka ‘oka fakahā‘ele leva pea nau fononga. 23‘I he fekau ‘a Sihova na‘a nau hunuki tēniti, pea ‘i he fekau ‘a Sihova na‘a nau hiki; na‘a nau fai ‘enau fakafeangai kia Sihova ‘i he fekau ‘a Sihova na‘e fakafai ‘ia Mōsese.
Currently Selected:
NŌMIPA 9: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
