NŌMIPA 8
8
Ko Hono Fokotu‘u ‘o e ngaahi Māmá
1PEA folofola ‘a e ‘Eiki kia Mōsese, ‘o pehē, 2Lea kia ‘Ēlone, ‘o pehē kiate ia, ‘I ho‘o fakahā‘ele ‘a e ngaahi nge‘esi maama, ‘e fakamaama ‘e he fitu‘i maama ki he fofonga‘i Tu‘unga Maama ki ‘ao. 3Pea fai pehē ‘e ‘Ēlone; na‘a ne fakahā‘ele hono ngaahi nge‘esi maama ke fakamaama ki he fofonga‘i Tu‘unga Maama ki ‘ao, ‘o hangē ko e tu‘utu‘uni ‘a e ‘Eiki kia Mōsese. 4Pea ko e anga eni ‘o e ngaohi ‘o e Tu‘unga Maama; na‘e tuki koula; mei hono tu‘unga, ‘o a‘u ki hono ngaahi tangitangi na‘e tuki pē: hangē ko hono fakatātā na‘e fakahā ‘e he ‘Eiki kia Mōsese, na‘e pehē ‘ene ngaohi ‘a e Tu‘unga Maama.
Ko Hono Fakama‘a mo Fakatāpui ‘o e Kau Līvaí
5Pea folofola ‘a e ‘Eiki kia Mōsese, ‘o pehē.
6To‘o ‘a e kau Līvai mei he lotolotonga ‘o ha‘a ‘Isileli, ‘o fakama‘a kinautolu. 7Pea ko eni ‘a e me‘a te ke fai kiate kinautolu mo nau fakama‘a: afuhi kinautolu ‘aki ‘a e vai angahala, pea te nau tele honau sino kotoa, pea te nau fō honau kofu, mo kaukau kinautolu.
8Pea ke nau toki to‘o ha pulu mui, mo hono feilaulau-me‘akai, ko e ‘elito‘i mahoa‘a kuo natu ‘aki ‘a e lolo, pea te ke to‘o mo ha pulu mui ‘e taha mo‘o feilaulau-angahala.
9Pea te ke fakaofi ‘a e kau Līvai ki he mata Tēniti Fe‘iloaki‘anga, pea te ke tānaki ‘a e fakataha kātoa ‘o ha‘a ‘Isileli: 10pea te ke fakaofi ‘a e kau Līvai ki he ‘ao ‘o e ‘Eiki, pea ko ha‘a ‘Isileli te nau hilifaki honau nima ki he kau Līvai: 11pea ‘e tākalo ‘aki ‘e ‘Ēlone ‘a e kau Līvai ‘i he ‘ao ‘o Sihova ko e feilaulau tākalo mei ha‘a ‘Isileli, ke nau nofo ke tali fatongia ki he ‘Eiki. 12Pea ko e kau Līvai te nau hilifaki honau nima ki he ‘ulu ‘o e ongo pulu: pea te ke feia ha taha mo‘o feilaulau-angahala, mo e taha mo‘o feilaulau-mōifua ki he ‘Eiki, ke fai‘aki ‘a e fakalelei ma‘a e kau Līvai.
13Pea te ke fokotu‘u ‘a e kau Līvai ‘i he ‘ao ‘o ‘Ēlone mo e ‘ao ‘o ‘ene fānau, pea te ke tākalo ‘aki kinautolu ko e feilaulau-tākalo kia Sihova.
14‘Io, te ke vavahe ‘a e kau Līvai mei he lotolotonga ‘o ha‘a ‘Isileli, pea ‘e ‘o‘oku ‘a e kau Līvai.
15Pea hili ia ‘e hū ‘a e kau Līvai ke fai ‘a e ngāue ‘o e Tēniti Fe‘iloaki‘anga, pea te ke fakama‘a kinautolu mo tākalo ‘aki kinautolu mo‘o feilaulau-tākalo. 16He kuo tuku li‘aki kinautolu kiate au mei he lotolotonga ‘o ha‘a ‘Isileli; kuo u to‘o kinautolu ma‘aku ke fetongi ‘aki ‘a e ngaahi ‘olopo‘ou, ‘a e ‘uluaki fānau tangata ‘a ha‘a ‘Isileli kātoa. 17He ‘oku ‘o‘oku ‘a e ‘uluaki fānau tangata ‘i ha‘a ‘Isileli, ‘a e tangata mo e manu fakatou‘osi: na‘a ku fakatāpui kinautolu mo‘oku ‘i he ‘aho na‘a ku taa‘i ai ‘a e ‘uluaki fānau ‘i ‘Isipite.#‘Eki 13.2 18Pea kuo u to‘o ‘a e kau Līvai ko e fetongi ‘o e ‘uluaki fānau ‘i ha‘a ‘Isileli, 19pea kuo u ‘atu ‘a e kau Līvai ko e foaki kia ‘Ēlone mo ‘ene fānau mei he lotolotonga ‘o ha‘a ‘Isileli, ke fai ‘a e fatongia ‘o ha‘a ‘Isileli ‘i he Tēniti Fe‘iloaki‘anga, pea ke feia ‘a e fakalelei ma‘a ha‘a ‘Isileli, pea ke ‘oua na‘a tō ha mala ki ha‘a ‘Isileli ‘i he ‘unu‘unu mai ‘a ha‘a ‘Isileli ki he Fale Tapu.
20Pea fai ‘e Mōsese mo ‘Ēlone mo e fakataha kātoa ‘o ha‘a ‘Isileli ki he kau Līvai: hangē tofu pē ‘a e tu‘utu‘uni ‘a Sihova ‘i he kau Līvai, na‘e pehē ‘a e fai ‘a ha‘a ‘Isileli kiate kinautolu. 21Pea fai ‘e he kau Līvai ‘enau fakama‘a angahala, ‘o nau fō honau kofu; pea tākalo ‘aki kinautolu ‘e ‘Ēlone ko e feilaulau-tākalo ki he ‘ao ‘o Sihova; pea fai ‘e ‘Ēlone ‘a e fakalelei ma‘anautolu mo‘onau fakama‘a. 22Pea hili ia na‘e hū ‘a e kau Līvai ke fai ‘enau ngāue ‘i he Tēniti Fe‘iloaki‘anga ‘i he ‘ao ‘o ‘Ēlone mo e ‘ao ‘o ‘ene fānau; hangē ko e tu‘utu‘uni ‘a Sihova kia Mōsese ‘i he kau Līvai, na‘e pehē ‘enau fai kiate kinautolu.
23Pea folofola ‘a e ‘Eiki kia Mōsese, ‘o pehē, 24Ko eni ‘a e me‘a ki he kau Līvai: ‘e kamata mei he‘enau uofulu mā nima ta‘u ‘o fai hake ‘enau hū ke tu‘u ‘i he kongakau ‘i he ngāue ‘o e Tēniti Fe‘iloaki‘anga: 25pea ‘e kamata mei he‘enau nimangofulu ta‘u ‘enau nofo mei he kongakau ngāue, pea ‘e ‘ikai te nau kei ngāue: 26ka te nau le‘o mo honau kāinga ‘i he Tēniti Fe‘iloaki‘anga, he fai ‘o e fakafeangai; ka ko e ngāue ‘e ‘ikai te nau fai. ‘E pehē ho‘o fai ki he kau Līvai ki hanau ngaahi nafa.
Currently Selected:
NŌMIPA 8: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
