NŌMIPA 10
10
Ko e ngaahi Talupite Siliva
1PEA folofola ‘a Sihova kia Mōsese, ‘o pehē, 2Ngaohi ma‘au ha ongo talupite siliva: pea ko hona ngaohi ‘e tuki pē: pea te ke ngāue‘aki ‘i he ui ‘o e fakataha, mo e hiki ‘o e ‘apitanga. 3Pea kapau ‘e ifi ua, pea ‘e kātoa mai kiate koe ‘a e fakataha ki he mata Tēniti Fe‘iloaki‘anga. 4Ka ‘o kapau ‘e ifi taha pē, pea ‘e toki fakataha kiate koe ‘a e hou‘eiki pule ‘o e ngaahi toko afe ‘o ‘Isileli. 5Pea kapau te mau ifi faka-lali-pakola, pea ‘e toki hiki atu ‘a e ngaahi ‘apitanga ‘oku tu‘u mei hahake. 6Pea ka mou ka ifi faka-lali-pakola hono tu‘o ua, pea ‘e mātuku atu ‘a e ngaahi ‘apitanga ‘oku tu‘u mei he tonga: ‘e ifi faka-lali-pakola ki he ngaahi hiki fononga. 7Ka ‘o kapau ko e ui ‘o e fakataha, te mou ifi pē, kae ‘ikai faka-lali-pakola. 8Pea ko e hako ‘o ‘Ēlone, ‘a e kau taula‘eiki, ko kinautolu te nau ifi ‘a e ongo talupite: ko e tu‘utu‘uni ta‘engata ia kiate kimoutolu ‘i homou ngaahi to‘utangata.
9Pea ka ko ho‘omou ‘alu ke fai tau ‘i homou fonua mo e fili ‘oku ne fakamamahi‘i kimoutolu, pea mou ifi faka-lali-pakola ‘aki ‘a e ongo talupite; pea ‘e langa‘i ai ha manatu kiate kimoutolu ‘i he ‘ao ‘o Sihova ko homou ‘Otua, pea ‘e fakahaofi kimoutolu mei homou ngaahi fili. 10Pea ‘i homou ‘aho fakafiefia, mo homou ngaahi kātoanga, mo homou ngaahi māhina-fo‘ou, te mou ifi ‘aki ‘a e ongo talupite ‘i he funga ‘o ho‘omou ngaahi feilaulau-mōifua, mo ho‘omou ngaahi feilaulau-‘ofa; pea te nau hoko ko e me‘a fakamanatu ma‘amoutolu ‘i he ‘ao ‘o homou ‘Otua. Ko au Sihova ko homou ‘Otua.
Ko e Hiki Fononga ‘a e Kakai ‘Isilelí
11Pea ‘i hono ua ‘o e ta‘u, mo hono ua ‘o e māhina, mo e ‘aho uofulu ‘o e māhina, ‘iloange na‘e fakahā‘ele ‘a e ‘Ao mei he funga Tāpanekale Fakamo‘oni‘anga. 12Pea tuku atu ‘a ha‘a ‘Isileli ‘o fakatatau ki he hokohoko ‘o ‘enau hiki, mei he Toafa ‘o Sainai, pea na‘e tōfā ‘a e ‘Ao ‘i he Toafa ‘o Pēlana.
13Pea nau hiki hokohoko ‘i he angi ‘a Sihova na‘e fakafai ‘ia Mōsese. 14Pea na‘e hiki mu‘a ‘a e fuka ‘o e ‘apitanga ‘o ha‘a Siuta mo hono ngaahi kongakau: pea ko Na‘asoni ko e foha ‘o ‘Aminatape na‘a ne pule ki he tau ko ia. 15Pea na‘e pule ki he tau ‘o e matakali ‘o ha‘a ‘Īsaka ‘a Nātaniela ko e foha ‘o Sua. 16Pea na‘e pule ki he tau ‘o e matakali ‘o ha‘a Sepulone ‘a ‘Eliapi ko e foha ‘o Hēloni.
17Pea na‘e veteki ‘a e Tāpanekale, pea na‘e tuku fononga atu ‘a ha‘a Kēsoni mo ha‘a Melali, ‘a ia na‘a nau kauala ‘a e Tāpanekale.
18Pea hiki atu ‘a e fuka ‘o e ‘apitanga ‘o Lūpeni mo hono ngaahi kongakau: pea na‘e pule ki he tau ko ia ‘a ‘Elisiuli ko e foha ‘o Seteulo. 19Pea na‘e pule ki he tau ‘o e matakali ‘o Simione ‘a Selumiela ko e foha ‘o Siulisatai. 20Pea na‘e pule ki he tau ‘o e matakali ‘o ha‘a Kata ‘a ‘Eliesafe ko e foha ‘o Teuela.
21Pea tuku fononga atu ‘a e kau Kōhate ‘oku nau kauala ‘a e Potu Tapu: pea na‘e fokotu‘u ‘e kinautolu ‘a e Tāpanekale ki he‘enau a‘u mai.
22Pea hiki atu ‘a e fuka ‘o e ‘apitanga ‘o ha‘a ‘Ifalemi mo honau ngaahi kongakau: pea na‘e pule ki he tau ko ē ‘a ‘Elisama ko e foha ‘o ‘Amihuti. 23Pea na‘e pule ki he tau ‘o e matakali ‘o ha‘a Manase ‘a Kāmelieli ko e foha ‘o Petasiuli. 24Pea na‘e pule ki he tau ‘o e matakali ‘o ha‘a Penisimani ‘a ‘Apitani ko e foha ‘o Kiteoni.
25Pea hiki atu ‘a e fuka ‘o e ‘apitanga ‘o ha‘a Tani mo hono ngaahi kongakau, ‘a ia ko e tukutau ‘o e ngaahi ‘apitanga kotoa: pea na‘e pule ki he tau ko ia ‘a ‘Ahiesa ko e foha ‘o ‘Amisatai. 26Pea na‘e pule ki he tau ‘o e matakali ‘o ha‘a ‘Āseli ‘a Pakiela ko e foha ‘o ‘Okelani. 27Pea na‘e pule ki he tau ‘o e matakali ‘o ha‘a Nafitalai ‘a ‘Āhila ko e foha ‘o ‘Einani. 28Ko eni ‘a e ngaahi tuku fononga atu ‘a ha‘a ‘Isileli mo honau ngaahi kongakau: pea nau hiki atu.
29Pea lea ‘a Mōsese kia Hōpapi ko e foha ‘o Leueli ko e Mitiani, ko e kāinga mali ‘o Mōsese, Ko ‘emau fononga ē ki he potu ‘a ia na‘e folofola ai ‘a Sihova, Te u ‘atu ia mo‘omoutolu. Ha‘u ā ke tau ō, pea te mau fai lelei kiate koe: he kuo folofola lelei ‘a Sihova ma‘a ‘Isileli.
30Pea tali ki ai ‘e ia, ‘E ‘ikai te u ‘alu; ka te u foki ki hoku fonua, mo hoku kāinga.
31Pea pehē ‘e ia, ‘Oua mu‘a ‘e li‘aki kimautolu; koe‘uhi ā ‘oku ke ‘ilo ha‘amau ngaahi ‘apitanga ‘i he Toafa, pea mau mata ‘aki koe. 32Pea ko ‘eni, kapau te tau ō, tala atu ka ai ha lelei ‘e fai ‘e he ‘Eiki ma‘amautolu te mau fai ia kiate koe.
Ko e Mavahe ‘a e Kakaí me honau ‘Apitangá
33Pea nau fononga atu mei he mo‘unga ‘o Sihova ko e vaa‘i hala ‘o e ‘aho ‘e tolu; pea ko e ‘A‘ake ‘o e Kovinānite ‘o Sihova na‘e taki ‘i he fononga ‘o e ‘aho ‘e tolu ke ha‘ao hanau mālōlō‘anga. 34Pea na‘e ‘afio mei ‘olunga ‘a e ‘Ao ‘o Sihova, ‘aho, ‘i he‘enau hiki atu mei he ‘apitanga.
35Pea ‘i he tuku atu ‘a e ‘A‘ake, pea lea ‘a Mōsese, Ma‘ama‘a? hake ā ‘e Sihova, kae movetevete ho ngaahi fili; pea feholaki mei ho fofonga ‘a kinautolu ‘oku fehi‘a kiate koe.#Saame 68.1 36Pea ‘i he‘ene tōfā hifo na‘a ne pehē, Foki mai ā, ‘e Sihova, ki he ngaahi afe‘i mano ‘o ‘Isileli.#10.36 Foki mai… ‘Isileli; pe Foki mai ‘e Sihova, ‘a e ‘Afió na ‘okú ke hangē ha kau tau toko milioná ki ‘Isileli.
Currently Selected:
NŌMIPA 10: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
