NŌMIPA 6
6
Ko e ngaahi Lao ‘o Fekau‘aki mo e Kau Nāsilí
1PEA folofola ‘a e ‘Eiki kia Mōsese, ‘o pehē, 2Lea ki ha‘a ‘Isileli, pea tala kiate kinautolu, Ka ai ha tangata pe fefine te ne fokotu‘u hano tapu mamafa, ko e tapu nāsili, ke hunuki ia kia Sihova: te ne tapu ‘i he uaine mo e kava mālohi; 3‘e ‘ikai te ne inu ha vinika uaine, pe ha vinika kava; pea ‘ilonga ‘a e huhu‘a ‘o e kālepi ‘e ‘ikai te ne inu, pe te ne kai ‘a e kālepi mata, pe ko e kālepi fakamaemae.#Luk 1.15 4Lolotonga ‘ene nofo hunuki ‘e ‘ikai te ne kai ha me‘a ‘oku ngaohi ‘aki ‘a e vaine, mei he tenga ‘o a‘u ki he kili.
5Lolotonga ‘ene tapu ‘i he‘ene tukumo‘ui ‘e ‘ikai apo ha tele ki hono ‘ulu: lolotonga kuo te‘eki kakato ‘a e taimi ‘o ‘ene nofo hunuki kia Sihova te ne tapu: te ne tuku ke patua mo mafue ‘a e lau ‘o hono ‘ulu. 6Lolotonga ‘ene fakatāpui ia kia Sihova ‘e ‘ikai te ne ofi ki ha pekia. 7Neongo ko ‘ene tamai kuo pekia, pe ko ‘ene fa‘ē, pe tokoua, pe tuofefine, ka ‘e ‘ikai te ne fakata‘ema‘a ia; he ko e kaho ‘a hono ‘Otua ‘oku ‘i hono ‘ulu. 8Ko e ‘aho kotoa pē ‘o ‘ene nāsili te ne tāpuhā kia Sihova.
9Pea kapau ‘e mate fakafoki fā pē ha taha ‘i hono tafa‘aki, ‘o maumau ai ‘a e tapu ‘o hono ‘ulu, te ne tele hono ‘ulu ‘i he ‘aho ‘o hono fakama‘a, ‘i hono fitu ‘o e ‘aho te ne tele ia. 10Pea ‘i hono ‘aho valu te ne ‘omi ki he taula‘eiki, ki he mata Tēniti Fe‘iloaki‘anga ha ongo kulukulu pe lupe mui: 11pea ‘e feia ‘e he taula‘eiki ha taha mo‘o feilaulau-angahala, mo e taha mo‘o feilaulau-mōifua, ‘o ne fai ma‘ana ‘a e lau fakalelei koe‘uhi ko ‘ene angahala ‘i he pekia, pea te ne fakatāpui hono ‘ulu ‘i he ‘aho ko ia. 12Pea te ne fakatāpui kia Sihova ‘a e ngaahi ‘aho na‘a ne tu‘utu‘uni te ne nāsili ai; pea te ne ‘omi ha lami tangata kuo ta‘u taha mo‘o feilaulau-halaia: pea ko e ngaahi ‘uluaki ‘aho ‘e ‘ikai lau, koe‘uhi na‘e maumau hono tapu.
13Pea ko eni ‘a e lao ‘o e nāsili ‘i he ‘aho ‘oku kakato ai ‘a e taimi ‘o ‘ene tapu.#Ngā 21.23-24 14‘E ‘omi ia ki he mata Tēniti Fe‘iloaki‘anga, pea te ne ‘atu ‘ene kōpano ki he ‘Eiki, ko e lami tangata kuo taha ta‘u, ta‘ehano mele, mo‘o feilaulau-mōifua, mo e lami fefine kuo taha ta‘u, ta‘ehano mele, mo‘o feilaulau-angahala, mo e sipi tangata ta‘ehano mele mo‘o feilaulau-‘ofa: 15mo e kato mā ta‘elēvani, ko e ngaahi keke ‘elito‘i mahoa‘a kuo natu ‘aki ‘a e lolo, mo e ngaahi mā manifinifi ta‘elēvani kuo pani lolo mo hono ouau ‘o e feilaulau-me‘akai mo hono kava.
16Pea ‘e fakaofi atu ‘e he taula‘eiki ki he ‘ao ‘o Sihova, pea te ne feia ‘ene feilaulau-angahala, mo ‘ene feilaulau-mōifua; 17pea te ne feia ‘a e sipi tangata ko e feilaulau-‘ofa kia Sihova fakataha mo e kato mā ta‘elēvani: pea te ne feia foki hono feilaulau-me‘akai mo hono kava. 18Pea ‘e tele ‘e he nāsili ‘i he mata Tēniti Fe‘iloaki‘anga ‘a e lau na‘e hunuki, pea te ne to‘o hono lou‘ulu ‘o ‘ene nāsili, ‘o ne tuku ki he afi ‘oku ‘i he lalo feilaulau-‘ofa.
19Pea ‘e to‘o ‘e he taula‘eiki ‘a e alanga mu‘a ‘o e sipi tangata kuo haka, mo e keke ta‘elēvani ‘e taha mei he kato, mo ha fo‘i mā manifinifi ta‘elēvani ‘e taha, pea te ne hili ki he ongo nima ‘o e nāsili hili ‘ene tele hono hunuki: 20pea ‘e tātākalo ‘aki ia ‘e he taula‘eiki mo‘o feilaulau tākalo ‘i he ‘ao ‘o Sihova (ko e me‘a ia ‘oku tapu ma‘a e taula‘eiki, fakataha mo e fatafata tākalo mo e tefito‘i alanga hapai): pea hili ia ‘e ngofua ke inu uaine ‘e he nāsili.
Koe Tuku Tāpuaki Fakataula‘eiki
21Ko e lao ia ‘o e nāsili kuo ne fakatāpui ia, ko ‘ene kōpano ia ki he ‘Eiki koe‘uhi ko hono hunuki–tukukehe ha me‘a ange te ne lava: ka ko e lea ‘o ‘ene fakatapu, ‘a ia na‘a ne pu‘aki, te ne fai ia, ‘o fakatatau ki he lao ‘o ‘ene nāsili.
22Pea folofola ‘a e ‘Eiki kia Mōsese, ‘o pehē, 23Lea kia ‘Ēlone mo ‘ene fānau, ‘o pehē, Ko e anga eni ‘o ho‘omou fai ‘a e tāpuaki ‘o ha‘a ‘Isileli; te mou pehē ki ai– 24ke tāpuaki‘i mai koe ‘e Sihova, mo ne tauhi‘i! 25Ke fakaulo mai ‘e Sihova hono fofonga kiate koe, mo ne ‘alo ‘ofa! 26Ke hāngaifofonga mai ‘a Sihova kiate koe, mo ne ‘atu ‘a e melino!
27Koe‘uhi ke nau ‘ai hoku hingoa ki ha‘a ‘Isileli, ka u tāpuaki kinautolu ‘e au.
Currently Selected:
NŌMIPA 6: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
