NŌMIPA 5
5
Ko e Kakai Ta‘eMa‘a
1PEA folofola ‘a e ‘Eiki kia Mōsese, ‘o pehē, 2Fekau ki ha‘a ‘Isileli ke nau kapusi mei he ‘apitanga ‘a kinautolu ‘oku kilia, mo ia fua pē ‘oku ‘au, mo ia ‘oku ta‘ema‘a ko ha pekia; 3pe ko ha tangata pe ko ha fefine, te mou kapusi pē ke nofo ‘i tu‘a ‘apitanga: ke ‘oua te nau ‘uli‘i honau ‘apitanga, ‘a ia ‘oku ou nofo ki honau lotolotonga. 4Pea fai pehē ‘e ha‘a ‘Isileli, ‘o nau kapusi kinautolu ke nofo ‘i tu‘a ‘apitanga: ‘o hangē ko e folofola ‘a Sihova kia Mōsese, na‘e pehē ‘a e fai ‘e ha‘a ‘Isileli.
5Pea folofola ‘a e ‘Eiki kia Mōsese, ‘o pehē,#Lev 6.1-7 6Lea ki ha‘a ‘Isileli, Ka ai ha tangata pe fefine kuo ne fai ha taha ‘o e ngaahi angahala ‘oku kau ki he vā ‘o e tangata mo e tangata, ke feia ha kākā kia Sihova; 7pea te nau vete ‘a e angahala kuo nau fai: pea te ne totongi ‘osi hono mo‘ua, pea te ne ‘atu kiate ia ‘oku ne mo‘ua ki ai mo hano vahe nima mōno toloi. 8Pea kapau ‘oku ‘ikai hano koeli ‘o e tangata ke ‘atu ki ai ‘a e totongi ‘o e mo‘ua, pea ko e totongi ‘o e mo‘ua ‘oku ‘o Sihova; pea ‘e ‘i he taula‘eiki fakataha mo e sipi tangata ‘oku fai‘aki ‘a e fakalelei ma‘ana. 9‘Io, ‘ilonga ha feilaulau-hapai ‘i he ngaahi me‘a kuo fakatapu ‘e ha‘a ‘Isileli, te nau ‘atu ki he taula‘eiki: ko hono ‘inasi ai pē. 10Pea ko e ngaahi me‘a fakatapu ‘a ha taha ko hono ‘inasi mo ia: ‘io, ‘ilonga ha me‘a ‘oku ‘atu ‘e ha taha ki he taula‘eiki, ‘e ‘a‘ana.
Ko e ngaahi Hopo he ngaahi Husepāniti ‘oku Hu‘uhu‘u ki honau Hoá
11Pea folofola ‘a e ‘Eiki kia Mōsese, ‘o pehē, 12Lea ki ha‘a ‘Isileli, ‘o tala kiate kinautolu, Ka ai ha tangata kuo afe hono uaifi, ‘o ne kākaa‘i ia, 13pea kuo mohe mo ia ha tangata, ka kuo puli mei hono husepāniti ‘o fufū; pea kuo ‘uli‘i ‘a e fefine, ka ‘oku ‘ikai ha fakamo‘oni, pea na‘e ‘ikai ma‘u pau; 14ka kuo puke ‘a e tangata ‘i he fua‘a, ‘o ne fua‘a ki hono uaifi, he kuo ‘uli‘i: pea na‘a kuo ‘ikai ‘uli‘i, ka ‘oku puke ‘a e tangata ‘i he fua‘a, ‘o ne fua‘a kiate ia; 15pea ‘e toki ‘omi ‘e he tangata hono uaifi ki he taula‘eiki, pea te ne ha‘u mo ia ha kōpano ‘a e fefine, ko e vahehongofulu ‘o e efa mahoa‘a pa‘ale: ‘e ‘ikai te ne lilingi ha lolo ki ai, pe ‘ai ki ai ha laipeno; he ko e feilaulau fua‘a, ko e feilaulau fakamanatu angahala.
16Pea ‘e fakaofi mai ‘e he taula‘eiki ‘a e fefine, ‘o fokotu‘u ‘i he ‘ao ‘o Sihova: 17pea ‘e to‘o ‘e he taula‘eiki ha vai tapu ‘i ha ipu kelekele, pea te ne to‘o mo ha me‘i efu mei he faliki ‘o e Tāpanekale, ‘o ‘ai ki he vai; 18pea te ne fokotu‘u ‘a e fefine ‘i he ‘ao ‘o Sihova, pea te ne fakamafue hono lau, pea te ne tuku ki hono nima ‘a e feilaulau fakamanatu, ‘a ia ko e feilaulau fua‘a: kae to‘o ‘e he taula‘eiki ‘a e vai kona ‘oku ne ‘omi ‘a e mala. 19Pea ‘e fakafuakava ‘a e fefine ‘e he taula‘eiki he‘ene pehē ki ai, Kapau kuo ‘ikai mohe mo koe ha tangata, pea kapau ‘oku ‘ikai te ke afe mei ho husepāniti ke ‘uli‘i ‘e ha taha kehe, pea ke toki ‘atā mei he vai kona ni ‘oku ‘omi ‘a e mala. 20Ka ‘o kapau kuo ke afe mei ho husepāniti, pe kuo ke ‘uli ‘i he mohe mo koe ha tangata ‘oku ‘ikai ko ho husepāniti– 21pea ‘e fakafuakava ‘e he taula‘eiki ‘a e fefine ha fuakava fakamala‘ia, pea te ne pehē ki he fefine, Tauange mo Sihova ke ke hoko ko e mala‘ia mo e fuakava loi ‘i he lotolotonga ‘o ho kakai, ‘i he‘ene ngaohi ho tenga ke mate, mo ho kete ke pupula. 22Pea ko e vai kona ni ‘oku ‘omi ‘a e mala te ne hū ki ho fatu, ‘o fakapupula ho kete mo fakamate ho tenga. Pea ‘e tali ‘e he fefine, ‘Ēmeni, ‘Ēmeni.
23Pea ‘e tohi ‘e he taula‘eiki ‘a e ngaahi talatuki ni ‘i ha tohi, pea ne toki fufulu ia ‘i he vai kona ke hū ki ai: 24pea te ne fakainu ki he fefine ‘a e vai kona ‘oku ‘omi ‘a e mala: pea ‘e hū kiate ia ‘a e vai ‘oku ‘omi ‘a e mala ke kona. 25Pea ‘e to‘o ‘e he taula‘eiki mei he nima ‘o e fefine ‘a e feilaulau fua‘a, pea te ne tātākalo ‘a e feilaulau ‘i he ‘ao ‘o Sihova, pea te ne ‘atu ki he ‘ōlita. 26Pea ‘e to‘o ‘e he taula‘eiki ha falukunga mahoa‘a mei he feilaulau mōno fakamanatu, pea te ne tutu ‘i he ‘ōlita; pea ko e toki hili ia te ne fakainu ki he fefine ‘a e vai. 27Pea hili ‘ene fakainu ‘a e vai, pea ka kuo ‘uli‘i ‘a e fefine, pea kuo ne fai kākā ki hono husepāniti, pea ‘e hū kiate ia ‘a e vai ‘oku ‘omi ‘a e mala ke kona, pea ‘e pupula hono kete, pea mate hono tenga, pea ‘e nofo ‘a e fefine mo hono kakai ko e taha mala‘ia. 28Ka ‘o kapau kuo ‘ikai ‘uli‘i ‘a e fefine, pea kuo ‘atā, 29pea te ne hao ‘o matu‘itu‘ia. Ko eni ‘a e lao ‘o e fua‘a, ‘oka afe ha fefine alafia ki ha tangata kehe, ‘o ‘uli‘i ai; 30pe ‘oka puke ha tangata ‘i he fua‘a, pea ne fua‘a ki hono uaifi, koe‘uhi ke ne ‘omi ‘a e fefine ki he ‘ao ‘o Sihova, pea fai kiate ia ‘e he taula‘eiki ‘a e ngaahi tu‘utu‘uni ko eni. 31Pea ‘e ‘atā ‘a e tangata mei he kovi, ka ko e fefine ko ia te ne fua hono kovi.
Currently Selected:
NŌMIPA 5: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
