NŌMIPA 4
4
Ko e ngaahi Fatongia ‘o e Ha‘a Līvai ko Kōhate
1PEA folofola ‘a e ‘Eiki kia Mōsese pea kia ‘Ēlone, ‘o pehē, 2Lau ‘a ha‘a Kōhate mei he lotolotonga ‘o ha‘a Līvai, ‘o fakafāmili mo faka‘ulumotu‘a: 3kamata meiate ia ‘oku tolungofulu ta‘u ‘o fai hake ki he nimangofulu ta‘u, ‘a kinautolu kotoa ‘oku ‘i he kongakau, koe‘uhi ke nau fekau ‘i he Tēniti Fe‘iloaki‘anga. 4Ko eni ‘a e ngāue ‘a ha‘a Kōhate ‘i he Tēniti Fe‘iloaki‘anga; ko e ngaahi me‘a toputapu.
5Pea ‘i he hiki atu ‘a e ‘apitanga, ‘e hū ‘a ‘Ēlone mo ‘ene fānau, pea te nau ‘ohifo ‘a e Tatau, ‘o fakapulonga ‘aki ‘a e ‘A‘ake Fakamo‘oni‘anga; 6pea te nau ‘ai ki ai mōno ‘ufi‘ufi ha kili‘i tukongi pea te nau folahi ai mei ‘olunga mo ha tupenu lanu pulū ‘ata‘atā, pea te nau ‘ai hono ‘akau ha‘amo.
7Pea te nau folahi ‘i he Tēpile-mā-fono ha tupenu lanu-langi; pea te nau ‘ai ki ai ‘a e ngaahi tisi mo e ngaahi tatā mo e ngaahi sioki mo e ngaahi ipu fakatau kava, pea ‘i ai ai pē ‘a e mā tu‘u ma‘u: 8pea te nau folahi mei ‘olunga ha tupenu kula-‘aho‘aho, pea ‘ufi‘ufi ‘aki ia ha ‘ufi‘ufi kili‘i tukongi, pea te nau ‘ai hono ‘akau ha‘amo.
9Pea te nau to‘o ha tupenu lanu-langi, ‘o ‘ufi‘ufi ‘a e Tu‘unga Maama, mo hono ngaahi nge‘esi maama, mo hono ngaahi helekosi, mo hono ngaahi ‘aingamalala, mo hono ngaahi ipu lolo ‘oku tauhi ‘aki: 10pea te nau ‘ai mo hono nāunau kotoa ki ha ‘ufi‘ufi kili‘i sili, pea te nau tuku ia ki he fata.
11Pea ki he ‘Ōlita Koula te nau folahi ha tupenu lanu langi, ‘o ‘ufi‘ufi ia ‘aki ha ‘ufi‘ufi kili‘i tukongi, mo ‘ai ‘akau ha‘amo. 12Pea te nau to‘o ‘a e nāunau kotoa ‘a ia ‘oku nau fai‘aki ‘a e ngāue ‘i he Potu Tapu, pea te nau ‘ai ia ki ha tupenu lanu langi, mo ‘ufi‘ufi ‘aki ha ‘ufi‘ufi kili‘i tukongi, pea te nau tuku ki he fata. 13Pea te nau tata ‘a e efuefu mei he ‘ōlita, ‘o folahi mei ‘olunga ha tupenu kula-po‘upo‘uli; 14pea te nau ‘ai ki ai hono nāunau kotoa ‘oku tauhi ‘aki, ‘a e ngaahi ‘ainga malala, ‘a e ngaahi huhu, mo e ngaahi huo lafalafa, mo e ngaahi pēsoni, ‘a e nāunau kotoa ‘o e ‘ōlita; pea te nau folahi mei ‘olunga mōno ‘ufi‘ufi ha kili‘i tukongi, mo ‘ai hono ‘akau ha‘amo. 15Pea ‘i he ‘osi ‘e ‘Ēlone mo ‘ene fānau ‘a e ‘ufi‘ufi ‘o e Potu Tapu, mo e nāunau kotoa ‘o e Potu Tapu ‘i he ‘amanaki hiki atu ‘a e ‘apitanga, pea hili ia ‘e toki hū ‘a ha‘a Kōhate ke fua: kae ‘ikai te nau ala ki he ngaahi me‘a tapu na‘a nau mate. Ko eni ‘a e kavenga ‘a ha‘a Kōhate ‘i he Tēniti Fe‘iloaki‘anga.
16Pea ko e ngafa ‘o ‘Eliesa ko e foha ‘o ‘Ēlone ko e taula‘eiki ke tokanga‘i ‘a e lolo ‘o e maama, mo e ‘inisēnisi namu kakala, mo e feilaulau me‘akai tāuma‘u, mo e lolo tākai; ‘a e vakai ‘o e Tāpanekale kātoa, mo e me‘a kotoa ‘oku ‘i ai ‘a e Fale Tapu mo hono nāunau.
17Pea folofola ‘a e ‘Eiki kia Mōsese pea kia ‘Ēlone, ‘o pehē, 18‘Oua te mou motuhi ‘a e tefito ‘o e fāmili, ko e kau Kōhate, mei he lotolotonga ‘o ha‘a Līvai; 19ka mo fai pehē kiate kinautolu ke nau mo‘ui, ‘o ‘oua ‘e mate ‘oka nau ka ‘unu‘unu ki he ngaahi me‘a toputapu. ‘E hū ‘a ‘Ēlone mo ‘ene fānau ‘o tu‘utu‘uni ‘a e ngāue mo e kavenga ‘a e tangata takitaha: 20ka ‘e ‘ikai te nau hū kinautolu, ‘o momo‘i hila ki he ngaahi me‘a tapu,#4.20 momo‘i…. tapu; pe sio ki he teuteu ‘e he kau taula‘eikí ‘a e ngaahi me‘a tapú ke hiki. na‘a nau mate.
Ko e ngaahi Fatongia ‘o e Ha‘a Līvai ko Kēsome
21Pea folofola ‘a e ‘Eiki kia Mōsese, ‘o pehē, 22Lau ‘a ha‘a Kēsoni foki, ‘o faka‘ulumotu‘a mo fakafāmili; 23te ke kamata lau meiate ia ‘oku tolungofulu ta‘u ‘o fai hake ki he nimangofulu ta‘u, ‘a kinautolu kotoa ‘oku tu‘u ‘i he kongakau, ke nau fai ngāue ‘i he Tēniti Fe‘iloaki‘anga. 24Ko ‘eni ‘a e ngafa ‘o e ngaahi fāmili ‘o ha‘a Kēsoni ‘i he fai ngāue mo e fua kavenga; 25te nau fua ‘a e ngaahi tupenu ‘o e Tāpanekale mo e Tēniti Fe‘iloaki‘anga, ‘a hono pulonga, mo e ‘u‘ufi kili‘i tukongi ‘oku ‘ai mei ‘olunga, mo e puipui ‘o e mata Tēniti Fe‘iloaki‘anga, 26mo e ngaahi tupenu lulu ‘o e loto‘ā, mo e puipui tāpuni ‘o e hū‘anga ‘o e loto‘ā ‘oku takatakai ki he Tāpanekale mo e ‘Ōlita, mo hono ngaahi maea, mo e nāunau kotoa ‘oku fai‘aki hono ngāue, mo e hā fua ha ngāue ‘oku kau ki he ngaahi me‘a ko ia, te nau fai ia. 27‘E ‘ia ‘Ēlone mo ‘ene fānau ‘a e angi ki he ngāue ‘a ha‘a Kēsoni, ha‘anau fua kavenga mo ha‘anau ngāue: ‘io, te mou tu‘utu‘uni kiate kinautolu ‘a e ngaahi kavenga te nau tauhi. 28Ko eni ‘a e fatongia ‘o e ngaahi fāmili ‘o ha‘a Kēsoni ‘i he Tēniti Fe‘iloaki‘anga; pea ko ‘Ītama ko e foha ‘o ‘Ēlone ko e taula‘eiki te ne pule ki he ngāue ‘oku nau tauhi.
Ko e ngaahi Fatongia ‘o e Ha‘a Līvai ko Melali
29Ko e me‘a ki ha‘a Mēlali, te ke lau kinautolu ‘o fakafāmili mo faka‘ulu-motu‘a; 30te ke kamata lau kinautolu meiate ia ‘oku tolungofulu ta‘u, ‘o fai hake ki he nimangofulu ta‘u, ‘a kinautolu kotoa ‘oku ‘i he kongakau, ke fai ‘a e ngāue ‘o e Tēniti Fe‘iloaki‘anga. 31Pea ko eni ‘enau kavenga tauhi ‘i he vahe ngāue ‘i he Tēniti Fe‘iloaki‘anga; ko e ngaahi papa holisi ‘o e Tāpanekale, mo hono ngaahi kiato, mo hono ngaahi pou, mo hono ngaahi tu‘unga; 32mo e ngaahi tokotu‘u ‘o e loto‘ā takatakai, mo honau ngaahi tu‘unga, mo honau ngaahi fa‘o, mo honau ngaahi maea, mo e hā fua ha nāunau ‘oku tauhi ‘aki, mo ha ngāue ‘oku kau ki he ngaahi me‘a ko ia; pea ‘i ho‘o tufa ‘a e nāunau te nau kavenga tauhi ‘aki, te ke lau hingoa. 33Ko eni ‘a e fatongia ‘o e ngaahi fāmili ‘o ha‘a Mēlali ‘i he vahe ngāue ‘i he Tēniti Fe‘iloaki‘anga, pea ‘e angi ‘e ‘Ītama ko e foha ‘o ‘Ēlone ko e taula‘eiki.
Ko e Tohi Kakai ‘o e Kau Līvaí
34Pea na‘e lau ‘e Mōsese mo ‘Ēlone mo e hou‘eiki ‘o e fakataha ‘a ha‘a Kōhate, ‘o fakafāmili mo faka‘ulumotu‘a, 35‘o kamata meiate ia na‘e tolungofulu ta‘u ‘o fai hake ki he nimangofulu ta‘u, ‘a kinautolu kotoa na‘e tu‘u ‘i he kongakau, ke nau fai ngāue ‘i he Tēniti Fe‘iloaki‘anga; 36pea na‘e lau mei honau ngaahi fāmili ‘a e toko ua afe mo e toko fitungeau mo e toko nimangofulu. 37Ko kinautolu ia na‘e lau mei he ngaahi fāmili ‘o e kau Kōhate, ko e kau ngāue ‘i he Tēniti Fe‘iloaki‘anga, ‘a ia na‘e lau ‘e Mōsese mo ‘Ēlone ‘i he fekau ‘a Sihova na‘e fakafai ‘ia Mōsese. 38Pea ko e lau ‘o ha‘a Kēsoni fakafāmili mo faka‘ulumotu‘a, 39‘o kamata meiate ia ‘oku tolungofulu ta‘u ‘o fai hake ki he nimangofulu ta‘u, ‘a kinautolu kotoa na‘e tu‘u ‘i he kongakau, ke ngāue ‘i he Tēniti Fe‘iloaki‘anga– 40‘io, ko kinautolu na‘e lau fakafāmili mo faka‘ulumotu‘a na‘e toko ua afe mā toko onongeau mā toko tolungofulu. 41Ko kinautolu ia na‘e lau mei he ngaahi fāmili ‘o ha‘a Kēsoni, ko e kau ngāue ‘i he Tēniti Fe‘iloaki‘anga, ‘a ia na‘e lau ‘e Mōsese mo ‘Ēlone ‘i he fekau ‘a Sihova. 42Pea ko e lau ‘o e ngaahi fāmili ‘o ha‘a Mēlali, fakafāmili mo faka‘ulumotu‘a, 43‘o kamata meiate ia ‘oku tolungofulu ta‘u ‘o fai hake ki he nimangofulu ta‘u, ‘a kinautolu kotoa na‘e tu‘u ‘i he kongakau, ke ngāue ‘i he Tēniti Fe‘iloaki‘anga– 44‘io, ko kinautolu na‘e lau mei honau ngaahi fāmili ko e toko tolu afe mā toko uangeau. 45Ko kinautolu ia na‘e lau mei he ngaahi fāmili ‘o ha‘a Mēlali, ‘a ia na‘e lau ‘e Mōsese mo ‘Ēlone ‘i he fekau ‘a Sihova na‘e fakafai ‘ia Mōsese. 46Ko hono kotoa ‘o e kau Līvai ‘a ia na‘e lau ‘e Mōsese mo ‘Ēlone mo e hou‘eiki ‘Isileli, ‘o fakafāmili mo faka‘ulumotu‘a, 47‘o kamata meiate ia ‘oku tolungofulu ta‘u, ‘o fai hake ‘o a‘u ki he nimangofulu ta‘u, ko e kau hū ke fai ngāue mo fua kavenga ‘i he Tēniti Fe‘iloaki‘anga; 48ko kinautolu na‘e lau na‘e toko valu afe mā toko nimangeau mā toko valungofulu. 49‘I he fekau ‘a Sihova na‘e vahe kinautolu, ‘o fai ‘e Mōsese, ‘o takitaha ‘a e tangata ‘ene ngāue mo ‘ene kavenga: na‘e pehē hono vahe ‘o hangē ko e tu‘utu‘uni ‘a Sihova kia Mōsese.
Currently Selected:
NŌMIPA 4: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
