NŌMIPA 3
3
Ko e ngaahi Foha ‘o ‘Ēlone
1PEA ko e tohi eni ‘o e hako ‘o ‘Ēlone mo Mōsese ‘i he taimi na‘e folofola ai ‘a Sihova kia Mōsese ‘i he mo‘unga ko Sainai. 2Pea ko e ngaahi hingoa eni ‘o e ngaahi foha ‘o ‘Ēlone; ko Nātapi ‘a e ‘uluaki, mo ‘Āpiu, ko ‘Eliesa mo ‘Ītama.#Nōm 26.60 3Ko e hingoa ia ‘o e ngaahi foha ‘o ‘Ēlone, ‘a e kau taula‘eiki na‘e pani, ‘a ia na‘a ne fakanofo ke taula‘eiki. 4Ka na‘e pekia ‘a Nātapi mo ‘Āpiu ‘i he ‘ao ‘o e ‘Eiki, ‘i he‘ena ‘atu ‘a e afi kehe ‘i he ‘ao ‘o Sihova ‘i he Toafa ‘o Sainai; pea na‘e ‘ikai ha‘ana fānau: ko ia ko ‘Eliesa pē mo ‘Ītama na‘e fai ‘a e ngāue fakataula‘eiki fakataha mo ‘Ēlone ko ‘ena tamai.#Lev 10.1-2; Nōm 26.61
Ko e Fakanofo ‘o e Kau Līvai ke nau Fai Fatongia ma‘á e Kau Taula‘eikí
5Pea na‘e folofola ‘a Sihova kia Mōsese, ‘o pehē, 6Fakaofi mai ‘a e matakali ‘o Līvai, ‘o fokotu‘u ia ‘i he ‘ao ‘o ‘Ēlone ko e taula‘eiki ke nau tauhi kiate ia. 7Pea te nau feia ‘ene lakanga tauhi, pea mo e lakanga tauhi ‘a e fakataha kātoa, ‘i he mata Tēniti Fe‘iloaki‘anga, ke ‘anautolu ‘a e ngāue ‘o e Tāpanekale. 8Pea te nau tauhi ‘a e nāunau kotoa ‘o e Tēniti Fe‘iloaki‘anga, mo fai ‘a e lakanga tauhi ‘a ha‘a ‘Isileli ke ‘anautolu ‘a e ngāue ‘o e Tāpanekale. 9‘Io, te ke foaki ‘a e kau Līvai kia ‘Ēlone mo ‘ene fānau: kuo tuku li‘aki kinautolu kiate ia mei ha‘a ‘Isileli. 10Ka ko ‘Ēlone mo ‘ene fānau te ke vahe‘i kinautolu, pea te nau tauhi ‘enau lakanga taula‘eiki: pea ka ai ha kehe ‘e fakaofiofi ki ai, ‘e mate tāmate‘i ia.
11Pea folofola ‘a Sihova kia Mōsese, ‘o pehē, 12Pea ko ‘eni kuo u to‘o ‘e au ‘a e kau Līvai mei he lotolotonga ‘o ha‘a ‘Isileli ke fetongi ‘aki ‘a e ngaahi ‘olopo‘ou ‘o ha‘a ‘Isileli: ko ia ‘e ‘o‘oku ‘a e kau Līvai: 13he ‘oku ‘o‘oku ‘a e ‘olopo‘ou tangata kotoa pē: ‘i he ‘aho na‘a ku taa‘i ai ‘a e ‘olopo‘ou tangata ‘i he fonua ko ‘Isipite na‘a ku fakatāpui mo‘oku ‘a e ‘olopo‘ou tangata kotoa pē ‘o ‘Isileli, ‘o e manu mo e tangata fakatou‘osi: ‘e ‘o‘oku ‘a kinautolu. Ko au Sihova.#‘Eki 13.2
Ko e Tohi Kakai ‘o e Kau Līvaí
14Pea folofola ‘a Sihova kia Mōsese ‘i he Toafa ‘o Sainai, ‘o pehē, 15Lau ‘a ha‘a Līvai, ‘o faka‘ulumotu‘a mo fakafāmili; te ke lau ‘a e tangata kotoa pē, ‘o kamata mei he taha māhina ‘o fai hake. 16Pea na‘e lau kinautolu ‘e Mōsese ‘o hangē ko e folofola ‘a Sihova, ‘o tatau mo hono fekau. 17Pea ko eni ‘a e ngaahi foha ‘o Līvai, ‘a honau hingoa: ko Kēsoni, mo Kōhate, mo Mēlali. 18Pea ko ‘eni ‘a e ngaahi hingoa ‘o ha‘a Kēsoni ‘i he lau fakafāmili; ko Līpini mo Simi. 19Pea ko ha‘a Kōhate ‘i he lau fakafāmili; ko ‘Amilami mo ‘Īsa‘a, ko Hepeloni mo ‘Osieli. 20Pea ko ha‘a Mēlali ‘i he lau fakafāmili; ko Māhali, mo Musi. Ko e ngaahi fāmili ia ‘o ha‘a Līvai ‘o faka‘ulumotu‘a.
21Na‘e kau kia Kēsoni ‘a e fāmili ‘o ha‘a Līpini, mo e fāmili ‘o ha‘a Simi: ko e ongo fāmili ia ‘o ha‘a Kēsoni. 22Ko kinautolu na‘e lau mei ai, ko e lau ‘a e kau tangata, ‘o kamata meiate ia kuo taha māhina ‘o fai atu, ko honau tokolahi ko e toko fitu afe mā toko nimangeau. 23Ko e ngaahi fāmili ‘o ha‘a Kēsoni te nau ‘apitanga ki he tu‘a Tāpanekale ki lulunga. 24Pea ko e ‘eiki ‘ulumotu‘a ‘o ha‘a Kēsoni ko ‘Eliesafe ko e foha ‘o Laeli. 25Pea ko e ngafa ‘o ha‘a Kēsoni ke tauhi ‘i he Tēniti Fe‘iloaki‘anga, ko e Tāpanekale mo e Tēniti, ‘a hono ‘ato, mo e puipui ‘o e mata Tēniti Fe‘iloaki‘anga; 26mo e lulu ‘o e loto‘ā, pea mo e puipui ‘o e matapā ‘o e loto‘ā, ‘a ia ‘oku ‘alu takatakai ki he Tāpanekale, mo e ‘ōlita mo hono ngaahi me‘a, pea mo hono maea, mo e hā fua ha ngāue ‘oku kau ki he ngaahi me‘a ko ia.
27Pea na‘e kau kia Kōhate ‘a e fāmili ‘o ha‘a ‘Amilami, mo e fāmili ‘o ha‘a ‘Īsa‘a, mo e fāmili ‘o ha‘a Hepeloni, mo e fāmili ‘o ha‘a ‘Osieli: ko e ngaahi fāmili ia ‘o ha‘a Kōhate. 28Ko e kau tangata na‘e lau, ‘o kamata meiate ia na‘e taha māhina ‘o fai hake, ko e toko valu afe mā toko onongeau, ko e kau tauhi ‘o e Fale Tapu. 29Ko e ngaahi fāmili ‘o ha‘a Kōhate te nau ‘apitanga ki he tafa‘aki Tāpanekale ki he tonga. 30Pea ko e ‘eiki ‘ulumotu‘a ‘o ha‘a Kōhate ko ‘Elisafani ko e foha ‘o ‘Osieli. 31Pea ko honau ngafa ko e ‘A‘ake, mo e Tēpile, mo e Tu‘unga Maama, mo e ongo ‘ōlita, mo e nāunau ‘i he Fale Tapu ‘a ia ‘oku fai‘aki hono ngāue, mo e Tatau, mo e hā fua ha ngāue na‘e kau ki he ngaahi me‘a ko ia.
32Pea ko e ‘eiki ‘o e ngaahi ‘eiki ‘o e kau Līvai ‘a ‘Eliesa ko e foha ‘o ‘Ēlone ko e Taula‘eiki-lahi: na‘e ‘a‘ana ‘a e angi ‘o kinautolu na‘e fai ‘a e tauhi ‘o e Fale Tapu.
33Na‘e kau kia Mēlali ‘a e fāmili ‘o Māhali mo e fāmili ‘o Musi: ko e ongo fāmili ia ‘o ha‘a Mēlali. 34Ko kinautolu na‘e lau mei ai, ko e lau ‘o e kau tangata, ‘o kamata meiate ia na‘e taha māhina ‘o fai atu, ko e toko ono afe mā toko uangeau. 35Pea ko e ‘eiki ‘ulumotu‘a ‘o e ngaahi fāmili ‘o ha‘a Mēlali ko Siulieli ko e foha ‘o ‘Apihaili: te nau ‘apitanga ki he tafa‘aki Tāpanekale ki he tokelau. 36Pea ko e ngafa tu‘utu‘uni ‘o ha‘a Mēlali ko e holisi ‘o e Tāpanekale, mo hono ngaahi kiato, mo hono ngaahi pou, mo hono ngaahi tu‘unga, mo hono ngaahi nāunau kotoa, mo e hā fua ha ngāue na‘e kau ki he ngaahi me‘a ko ia. 37Ko e ngaahi tokotu‘u foki ‘o e loto‘ā takatakai, mo honau ngaahi tu‘unga, mo honau ngaahi fa‘o, mo honau ngaahi maea.
38Pea ko kinautolu ‘e ‘apitanga ‘i he mata Tāpanekale ki hahake, ‘a e mata Tēniti Fe‘iloaki‘anga ki he hopo‘anga la‘ā, ko Mōsese mo ‘Ēlone mo ‘ene fānau, ko ‘enau fai ‘a e tauhi ‘o e Fale Tapu ma‘a ha‘a ‘Isileli: he ka ofi ki ai ha muli ‘e mate tāmate‘i. 39Ko e lau kotoa ‘o e kau Līvai, ‘a ia na‘e fai honau lau ‘e Mōsese mo ‘Ēlone ‘i he fekau ‘a Sihova, ‘o faka-e-honau-ngaahi fāmili, ko e kau tangata pē, ‘o kamata meiate ia na‘e taha māhina ‘o fai hake–kātoa ko e toko ua mano mā toko ua afe.
Ko e Fetongi ‘e he Kau Līvaí ‘a e Tu‘unga ‘o e ‘Olopo‘ou Tangatá
40Pea folofola ‘a e ‘Eiki kia Mōsese, Lau hono kotoa ‘o e ‘olopo‘ou tangata ‘o ha‘a ‘Isileli, ‘o kamata meiate ia ‘oku taha māhina ‘o fai hake, pea te ke fai mei he tohi ‘o honau hingoa. 41Pea te ke to‘o ‘a e kau Līvai ma‘aku (ko Sihova au), ko e fetongi ‘o e kau ‘olopo‘ou tangata ‘o ha‘a ‘Isileli, pea mo e monumanu ‘o ha‘a Līvai ko e fetongi ‘o e ‘olopo‘ou tangata ‘i he monumanu ‘o ha‘a ‘Isileli. 42Pea na‘e lau ‘e Mōsese ‘a e kau ‘olopo‘ou tangata ‘o ha‘a ‘Isileli, ‘o hangē ko hono fekau ‘e Sihova. 43Pea ko e lau ‘o e ‘olopo‘ou tangata, fai mei he tohi ‘o honau hingoa, ‘o kamata meiate ia na‘e taha māhina ‘o fai hake, ko honau tokolahi ko e toko ua mano mā toko ua afe mā toko uangeau mā toko fitungofulu mā toko tolu.
44Pea folofola ‘a Sihova kia Mōsese, ‘o pehē, 45To‘o ‘a e kau Līvai ko e fetongi ‘o e ngaahi ‘olopo‘ou tangata ‘o ha‘a ‘Isileli, mo e monumanu ‘o e kau Līvai ko e fetongi ‘o e monumanu ‘o ē: pea ‘e ‘o‘oku ‘a e kau Līvai. Ko au Sihova. 46Pea ko e me‘a ki he toko uangeau mā toko fitungofulu mā tolu ke huhu‘i, ‘a ia ko e ope atu ‘o e ‘olopo‘ou ‘o ha‘a ‘Isileli ‘i he kau Līvai, 47te ke to‘o meiate kinautolu ha nima‘i sikeli ki he ‘ulu takitaha: ko e sikeli ‘o e Fale Tapu te ke to‘o (ko e kela ‘e uofulu ko e sikeli ‘e taha): 48pea te ke ‘atu kia ‘Ēlone mo ‘ene fānau ‘a e pa‘anga huhu‘i ‘o e ope. 49Pea to‘o ‘e Mōsese ‘a e pa‘anga huhu‘i meiate kinautolu na‘e huhu‘i, ko ‘enau ope ‘i he kau Līvai: 50‘io, na‘a ne to‘o ‘a e pa‘anga mei he kau ‘olopo‘ou tangata ‘o ha‘a ‘Isileli, ko e sikeli ‘e taha afe mā tolungeau mā onongofulu mā nima (ko e sikeli ‘o e Fale Tapu): 51pea ‘ange ‘e Mōsese ‘a e pa‘anga huhu‘i kia ‘Ēlone mo ‘ene fānau, ‘o fakatatau ki he folofola ‘a Sihova mo ‘ene tu‘utu‘uni kia Mōsese.
Currently Selected:
NŌMIPA 3: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
