NŌMIPA 2
2
Ko e Fakanofonofo ‘e e ngaahi Matakali he ‘Apitangá
1PEA folofola ‘a Sihova kia Mōsese mo ‘Ēlone, ‘o pehē, 2Ko e fokotu‘u tēniti ‘a ha‘a ‘Isileli takitaha ‘e fai ki he fuka ‘o hono matakali, pea mo e fuka ‘o hono ‘ulumotu‘a: ko ‘enau fokotu‘u tēniti ‘e tumu‘aki ki he Tēniti Fe‘iloaki‘anga, ‘o takatakai ki ai.
3Pea ko ‘eni ia te tau fokotu‘u tēniti ki hahake ki he hopo‘anga la‘ā, ‘a kinautolu ‘oku kau ki he fuka ‘o e ‘apitanga ‘o Siuta; te nau nofo fakakongakau: pea ko e ‘eiki ‘o ha‘a Siuta ko Na‘asoni ko e foha ‘o ‘Aminatape. 4Pea ko ‘ene tau, ‘io, ko honau tokolahi na‘e lau, ko e toko fitu mano mā toko fā afe mā toko onongeau. 5Pea ko eni ia ‘e fokotu‘u tēniti ofi ki ai, ko e matakali ‘o ‘Īsaka: pea ko e ‘eiki ‘o ha‘a ‘Īsaka ko Nātaniela ko e foha ‘o Sua; 6pea ko ‘ene tau, ‘io, ko hono kakai na‘e lau, ko e toko nima mano mā toko fā afe mā toko fāngeau. 7‘I ai ‘a e matakali ‘o Sepulone; pea ko e ‘eiki ‘o ha‘a Sepulone ko ‘Eliapi ko e foha ‘o Hēloni. 8Pea ko ‘ene tau, ‘io, ‘a kinautolu na‘e lau, ko e toko nima mano mā toko fitu afe mā toko fāngeau. 9Ko hono kotoa ‘o e kakai na‘e lau na‘e kau ki he ‘apitanga ‘o Siuta ko e toko taha kilu mā toko valu mano mā toko ono afe mā toko fāngeau: ko ‘enau fakakongakau ia. Ko kinautolu ‘e taki ‘i he fononga.
10Ko e feitu‘u tonga ‘e tu‘u ai ‘a e fuka ‘o e ‘apitanga ‘o Lūpeni: te nau fakakongakau, pea ko e ‘eiki ‘o ha‘a Lūpeni ko ‘Elisiuli ko e foha ‘o Seteulo. 11Pea ko ‘ene tau, ‘io, ko hono kakai na‘e lau, ko e toko fā mano mā toko ono afe mā toko nimangeau. 12Pea ko eni ia ‘e fokotu‘u tēniti ofi ai, ko e matakali ‘o Simione, pea ko e ‘eiki ‘o ha‘a Simione ko Selumiela ko e foha ‘o Siulisatai. 13Pea ko ‘ene tau, ‘io, ko honau tokolahi na‘e lau, ko e toko nima mano mā toko hiva afe mā toko tolungeau. 14‘I ai foki ‘a e matakali ‘o Kata, pea ko e ‘eiki ‘o ha‘a Kata ko ‘Eliesafe ko e foha ‘o Teuela. 15Pea ko ‘ene tau, ‘io, ko kinautolu na‘e lau, ko e toko fā mano mā toko nima afe mā toko onongeau mā toko nimangofulu. 16Ko hono kotoa ‘o e kakai na‘e lau na‘e kau ki he ‘apitanga ‘o Lūpeni ko e toko taha kilu mā toko nima mano mā toko taha afe mā toko fāngeau mā toko nimangofulu: ko ‘enau fakakongakau ia. Pea ko hono ua ‘a kinautolu ‘i he fononga.
17Pea ‘e toki hiki atu ‘a e Tēniti Fe‘iloaki‘anga, ‘o lotolotoi ‘a e ‘apitanga ‘o e kau Līvai ‘i he ngaahi ‘apitanga ko ē: ‘o hangē ko ‘enau fokotu‘u tēniti ‘e pehē ‘enau hiki atu, ‘o takitaha hono feitu‘u mo hono fuka.
18Ko e feitu‘u lulunga ‘e tu‘u ai ‘a e fuka ‘o e ‘apitanga ‘o ‘Ifalemi; te nau fakakongakau, pea ko e ‘eiki ‘o ha‘a ‘Ifalemi ko ‘Elisama ko e foha ‘o ‘Amihuti. 19Pea ko ‘ene tau, ‘io, ko kinautolu na‘e lau, ko e toko fā mano mā toko nimangeau. 20Pea ‘e ofi ai ‘a e matakali ‘o Manase; pea ko e ‘eiki ‘o ha‘a Manase ko Kāmelieli ko e foha ‘o Petasiuli. 21Pea ko ‘ene tau, ‘io, ko kinautolu na‘e lau, ko e toko tolu mano mā toko ua afe mā toko uangeau. 22‘I ai foki ‘a e matakali Penisimani; pea ko e ‘eiki ‘o ha‘a Penisimani ko ‘Apitani ko e foha ‘o Kiteoni. 23Pea ko ‘ene tau, ‘io, ko kinautolu na‘e lau, ko e toko tolu mano mā toko nima afe mā toko fāngeau. 24Ko hono kotoa ‘o e kakai na‘e lau na‘e kau ki he ‘apitanga ‘o ‘Ifalemi ko e toko taha kilu mā toko valu afe mā toko teau: ko ‘enau fakakongakau ia. Pea ko hono tolu ‘a kinautolu ‘i he fononga.
25Ko e feitu‘u tokelau ‘e tu‘u ai ‘a e fuka ‘o e ‘apitanga ‘o Tani: te nau fakakongakau, pea ko e ‘eiki ‘o ha‘a Tani ko ‘Ahiesa ko e foha ‘o ‘Amisatai. 26Pea ko ‘ene tau, ‘io, ko kinautolu na‘e lau, ko e toko ono mano mā toko ua afe mā toko fitungeau. 27Pea ko eni ia ‘e fokotu‘u tēniti ofi ki ai, ko e matakali ‘o ‘Āseli, pea ko e ‘eiki ‘o ha‘a ‘Āseli ko Pakiela ko e foha ‘o ‘Okelani. 28Pea ko ‘ene tau, ‘io, ko kinautolu na‘e lau, ko e toko fā mano mā toko taha afe mā toko nimangeau. 29Pea ai mo e matakali ‘o Nafitalai, pea ko e ‘eiki ‘o ha‘a Nafitalai ko ‘Āhila ko e foha ‘o ‘Einani. 30Pea ko ‘ene tau, ‘io, ko kinautolu na‘e lau ko e toko nima mano mā toko tolu afe mā toko fāngeau. 31Ko hono kotoa ‘o e kakai na‘e lau na‘e kau ki he ‘apitanga ‘o Tani ko e toko taha kilu mā toko nima mano mā toko fitu afe mā toko onongeau. ‘I he hokohoko ‘o e ngaahi fuka ko kinautolu ‘e fakamui ‘i he fononga.
32Ko ena ia ‘a e ha‘a ‘Isileli na‘e lau, ‘o faka-e-honau-ngaahi-tupu‘anga; ko e lau kotoa ‘o e ngaahi ‘apitanga ‘i he‘enau fakakongakau ko e toko ono kilu mā toko tolu afe mā toko nimangeau mā toko nimangofulu. 33Ka na‘e ‘ikai lau ‘a e kau Līvai fakataha mo ha‘a ‘Isileli, he na‘e pehē ‘a e tu‘utu‘uni ‘e Sihova kia Mōsese.
34Pea fai ‘e ha‘a ‘Isileli: hangē ko ia kotoa na‘e tu‘utu‘uni ‘e Sihova kia Mōsese na‘e pehē ‘enau fokotu‘u tēniti, ‘o tefito ki honau ngaahi fuka; pea pehē mo ‘enau hiki fononga takitaha ‘i hono fa‘ahinga mo hono tupu‘anga.
Currently Selected:
NŌMIPA 2: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.