NŌMIPA 23
23
Ko e ‘Uluaki Kikite ‘a Pēlami
1PEA pongipongi hake na‘e ‘ave ‘e Pēlaki ‘a Pēlami ki Pāmoti-Peali,#23.1 li Pāmoti-Peali; Ko hono hiki ‘e taha: ki he ngaahi ‘esi ‘o Peali. pea ne mamata mei ai ki he taupotu ‘o e kakai. Pea lea ‘a Pēlami kia Pēlaki, Fokotu‘u heni ma‘aku ha fitu‘i ‘ōlita, pea teuteu heni ma‘aku ha fitu‘i pulu mo ha fitu‘i sipi tangata.
2Pea fai ‘e Pēlaki hangē ko e lea ‘a Pēlami; pea feia ‘e Pēlaki mo Pēlami ha pulu mo ha sipi tangata ‘i he ‘ōlita takitaha. 3Pea lea ‘a Pēlami kia Pēlaki, Tu‘u pē koe ‘i ho tafa‘aki feilaulau ka u ‘alu au; hei‘ilo ‘e hā‘ele mai ‘a Sihova ke ma fe‘iloaki. Pea neongo pe ko e hā te ne faka‘ilo mai te u tala kiate koe. 4Pea ne ‘alu ki ha mātanga. Pea fe‘iloaki ‘a e ‘Otua mo Pēlami; pea fakatau folofola ‘e ia ki ai, Ko e fitu‘i ‘ōlita kuo u fokotu‘u, pea kuo u feia ha pulu mo ha sipi tangata ‘i he ‘ōlita takitaha.
5Pea ‘ai ‘e he ‘Eiki ha lea ki he ngutu ‘o Pēlami, ‘o ne folofola mai, Foki kia Pēlaki, pea ‘e pehē ho‘o lea ki ai. 6Pea ne foki kiate ia, pea tā ‘oku ne tu‘u ofi ki he‘ene feilaulau, ‘a ia mo e hou‘eiki Moape.
7Pea ofa‘aki ‘e ia ‘ene ta‘anga, ‘o ne pehē,
Ko Pēlaki kuo ne ‘omi au mei ‘Ālame,
Ko e Tu‘i Moape mei he ngaahi mo‘unga ‘o Hahake:
“Ha‘u, ‘o tukitala‘i ‘a Sēkope ma‘aku,
‘Io, ha‘u ā, ‘o tuku ‘a ‘Isileli ki he houhau.”
8Te u tutuku‘i fēfē ha taha kuo ‘ikai tutuku‘i ‘e ‘Ela?
Mo fakahouhau‘i fēfē, ka kuo ‘ikai fakahouhau‘i ‘e Sihova?
9He mei he funga makatu‘u ‘oku ou sio ki ai,
Pea ‘i he ngaahi mo‘unga ‘oku ne ma‘ali mai:
Ko e kakai eni ia ka nofo ‘atā,
‘O ‘ikai lau mo e ngaahi pule‘anga. 10Ko e efu ‘i Sēkope ‘e fatu ‘e hai?
Pe lau hono vahefā ‘o ‘Isileli?
Ka u mate au he mātenga ‘o ha‘a angatonu,
Pea tatau mo ho‘ona ‘a e iku‘anga ‘o‘oku.
11Pea me‘a ‘a Pēlaki kia Pēlami, Ko e hā eni kuo ke fai kiate au? Na‘a ku ‘omi koe ke tukitala‘i hoku ngaahi fili, pea vakai, kuo ke mātu‘aki tāpuaki‘i.
12Pea tali ‘e ia ‘o ne pehē, ‘Ikai ‘oku totonu ke u ta‘ofi au ke lea‘aki ‘a e me‘a pē kuo ‘ai ‘e Sihova ki hoku ngutu?
Ko e Kikite Hono Ua ‘a Pēlami
13Pea pehē ‘e Pēlaki kiate ia, Ha‘u mu‘a, ke ta ō ki ha potu ‘e taha, ‘a ia te ke sio mei ai kiate kinautolu; ko hano tepu pē te ke mamata ki ai, ka ‘e ‘ikai te ke sio ki honau kotoa: ka ke fai mei ai ma‘aku hano tutuku‘i. 14Pea ne ‘ave ia ki he toafa ‘o Sōfimi ‘i funga Pīsika, ‘o ne fokotu‘u ha fitu‘i ‘ōlita, ‘o ne feia ha pulu mo ha sipi tangata ‘i he ‘ōlita takitaha.
15Pea pehē ‘e ia kia Pēlaki, Tu‘u koe heni ofi ki ho‘o feilaulau, ka u ‘alu au ‘o fakalalave ki hē.
16Pea felāve‘i ‘a Sihova mo Pēlami, ‘o ne ‘ai ha lea ki hono ngutu, ‘o ne folofola mai, Foki kia Pēlaki, pea ‘e pehē ho‘o lea ki ai. 17Pea ne a‘u kiate ia, pea tā ko ena ia ‘oku ne tu‘u ‘o ofi ki he‘ene feilaulau, pea mo e hou‘eiki Moape fakataha mo ia. Pea me‘a mai ‘a Pēlaki kiate ia, Ko e hā ‘a e folofola mai ‘a Sihova? 18Pea ne ofa‘aki ‘ene ta‘anga, ‘o pehē,
Tu‘u, Pēlaki, ‘o fanongoa;
Fokotu‘u telinga mai, Hako ‘o Sīpoa:
19‘Oku ‘ikai ko e tangata ‘a ‘Ela ke loi ia;
Pe hako‘i ‘Ātama ke ne fakatomala:
Ko e pehē ke ne lea ‘o ‘oua ‘e fai?
Pe folofola ‘o ‘ikai fakaai?
20Ko eni ko e tāpuaki kuo ‘omi ke u fai:
Pea ka kuo ne tāpuekina ‘e ‘ikai te u maliu ‘aki.
21Kuo ‘ikai te ne ‘ilo ‘ia Sēkope ha kovi,
Pea kuo ‘ikai te ne ‘afioa ha fakamamahi ‘i ‘Isileli:
‘Oku ō mo ia hono ‘Otua ko Sihova,
Pea ‘oku longolongo tu‘i hono ‘apitanga. 22Ko ‘Ela ‘oku taki mai kinautolu mei ‘Isipite;
‘Oku hangē ‘oku ‘iate ia ‘a e mālohinga ‘o e pufaloe.
23He ‘oku ‘ikai ‘ia Sēkope ha fai tongafisi,
Pea ‘oku ‘ikai ha faka‘āvea ‘i ‘Isileli:#23.23 He ‘oku ‘ikai… ‘i ‘Isileli; pe He ‘oku ‘ikai ha tongafisi pe faka‘āvea ‘e ala lava ki he kakai ‘Isilelí.
Ka ‘oku toki tala kia Sēkope ‘i hono houa,
‘Io, ki ‘Isileli ‘a e me‘a ‘oku fai ‘e ‘Ela. 24Tā ko e kakai ni ‘oku hangē ha laione toutama ‘ene tu‘u na,
Pea hangē ha laione motu‘a ‘ene mofuta;
‘E ‘ikai te ne tokoto kae‘oua ke kai ‘ene hae,
Mo inu ‘a e toto ‘o ‘ene tāmate.
25Pea me‘a ‘a Pēlaki kia Pēlami, Foki tama, ‘oua te ke tukitala‘i kinautolu, pea ‘oua foki ‘e tāpuaki‘i!
26Pea tali ‘e Pēlami, ‘o ne pehē kia Pēlaki, ‘Ikai na‘a ku tala kiate koe, ‘o pehē, Ko ia kotoa ‘e folofola‘aki mai ‘e Sihova kuo pau ke u fai ia?
Ko e Kikite Hono Tolu ‘a Pēlami
27Pea me‘a ‘a Pēlaki kia Pēlami, Ha‘u ke u ‘ave koe ki ha potu kehe, hei‘ilo ‘e toki finangalo lelei ‘a ‘Elohimi ke ke fai honau tukitala‘i ma‘aku mei ai. 28Ko ia na‘e ‘ave ‘e Pēlaki ‘a Pēlami ki he tumutumu ‘o Peoli, ‘a ia ‘oku sio hifo mei ai ki he mata ‘o e lala. 29Pea lea ‘a Pēlami kia Pēlaki, Fokotu‘u heni ma‘aku ha fitu‘i ‘ōlita, pea teuteu heni ma‘aku ha fitu‘i pulu mo ha fitu‘i sipi tangata. 30Pea fai ‘e Pēlaki hangē ko e lea ‘a Pēlami, pea ne feia ha pulu mo ha sipi tangata ‘i he ‘ōlita takitaha.
Currently Selected:
NŌMIPA 23: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
