NŌMIPA 22
22
Ko e Fekau Atu ‘e he Tu‘i Moapé kia Pēlami ke ne ‘Alu Ange
1PEA vakai ‘e Pēlaki, ko e ‘alo ‘o Sīpoa, ‘a e ngaahi me‘a kuo fai ‘e ‘Isileli ki he kau ‘Āmoli.
2Pea mātu‘aki līfusia ‘a Moape ki he kakai ko ē, he ko e kakai lahi: pea nau hoha‘a telia ‘a ha‘a ‘Isileli. 3Pea lea ‘a Moape ki he mātu‘a Mitiani, Ko ‘eni, ‘e ‘emohia ‘e he hōsitē ni ‘a e me‘a kotoa ‘oku takatakai kiate kitautolu, ‘o hangē ko e ‘emohia ‘e he pulu ‘a e musie ‘o e vao. 4Pea ko Pēlaki ko e ‘alo ‘o Sīpoa na‘e Tu‘i Moape ‘i he taimi ko ia. 5Ko ia, na‘a ne tuku atu ha kau talafekau kia Pēlami ko e foha ‘o Peoli ki Pētola, ‘a ia na‘e tu‘u ki he Vaitafe ‘i he fonua ‘o ha‘a ‘Amo,#22.5 ‘i he… ‘Amó; ‘Oku toe hiki: ‘i he fonua ‘o hono kakaí. ke ne ha‘u, pea ke nau pehē; Vakai, ‘oku ai ha kakai kuo ha‘u mei ‘Isipite, pea koloto ke hā ha lau‘i kelekele koe‘uhi ko kinautolu, pea ‘oku nau nofo ‘o siofaki mai: 6pea ko ia ‘oku ou kole ke ke ha‘u, ‘o tukitala‘i ‘a e kakai ni ma‘aku; he ‘oku nau kaukaua fau kiate au: hei‘ilo te u mafai ka mau taa‘i ia ‘o kapusi mei he fonua: he ‘oku ou ‘ilo ko ia ‘oku ke tāpuaki‘i ‘oku monū‘ia, ka ko ia ‘oku ke tukitala‘i te ne mala‘ia.
7Pea ō ‘a e mātu‘a Moape mo e mātu‘a Mitiani, ‘o nau ‘alu mo kinautolu ‘a e koloa ‘o e fakalou‘akau; pea nau a‘u kia Pēlami, ‘o nau tala kiate ia ‘a e folofola ‘a Pēlaki. 8Pea pehē ‘e ia kiate kinautolu, Mou tatoka heni he pō ni, ka u toki ‘atu hano tali ‘o fakatatau ki he folofola ‘a Sihova kiate au. Pea tatoka mo Pēlami ‘a e hou‘eiki Moape.
9Pea hā‘ele mai ‘a e ‘Otua kia Pēlami, ‘o ne folofola mai, Ko e tu‘unga tangata hā ena ‘oku ‘iate koe?
10Pea fakatau folofola ‘a Pēlami kia ‘Elohimi, Ko Pēlaki ko e ‘alo ‘o Sīpoa, ko e Tu‘i Moape, kuo ne pōpoaki mai ‘o pehē, 11Vakai, ko e kakai kuo ha‘u mei ‘Isipite ‘oku ‘ikai ke hā ‘a e kelekele koe‘uhi ko kinautolu: ko ia ke ke ha‘u ‘o tutuku‘i ia ma‘aku; hei‘ilo te u mafai ai ke tau‘i ia, ‘o kapusi.
12Pea folofola ‘a e ‘Otua kia Pēlami, ‘Oua te ke ‘alu mo kinautolu; ‘oua te ke tukitala‘i ‘a e kakai ko ē: he ko e kakai tāpuekina.
13Pea tu‘u pongipongi hake ‘a Pēlami, ‘o ne pehē ki he hou‘eiki ‘a Pēlaki, Mou ō ki homou fonua; he kuo ta‘eloto ‘a Sihova ke tukuange au ke ‘alu mo kimoutolu. 14Pea tutu‘u ‘a e hou‘eiki Moape, ‘o nau a‘u kia Pēlaki, pea nau pehē, Na‘e ‘ikai loto ‘a Pēlami ke ha‘u mo kimautolu.
15Pea toe fekau atu ‘e Pēlaki ha hou‘eiki na‘e tokolahi ange mo mā‘olunga hake ‘i he ō ko ē. 16Pea nau a‘u kia Pēlami, ‘o nau pehē ki ai, Ko e folofola eni ‘a Pēlaki ko e ‘alo ‘o Sīpoa, Ke ‘oua na‘a ke tuku ke ta‘ofi koe mei he ha‘u kiate au: 17he te u mātu‘aki fakahīkihiki‘i koe, pea neongo pe ko e hā te ke tala mai kiate au te u fai: ko ia ke ke ha‘u mu‘a, ‘o tutuku‘i ‘a e kakai ni ma‘aku.
18Pea tali ‘a Pēlami, ‘o ne pehē ki he kau tamaio‘eiki ‘a Pēlaki, Neongo ‘e foaki mai ‘e Pēlaki hono fale kuo fonu ‘i he siliva mo e koula, ‘e ‘ikai te u lava ke hiki mei he me‘a ‘e tō mei he fofonga ‘o Sihova ko hoku ‘Otua, ke fakasi‘isi‘i, pe fakalahi ki ai. 19Ka ko eni ke mou nofo mu‘a heni, he pō ni foki, ka u ‘ilo pe ko e hā ha toe folofola ‘a Sihova ‘e fai mai.
20Pea hā‘ele mai ‘a e ‘Otua kia Pēlami ‘i he pō, ‘o ne folofola kiate ia, Kapau ‘e ha‘u ‘a e tu‘unga tangata ke ui koe, pea ke tu‘u ‘o ‘alu mo kinautolu; ka neongo ia, ka ko e lea te u ‘atu kiate koe ko ia pē te ke fai. 21Pea pongipongi hake pea tu‘u ‘a Pēlami, ‘o ne teuteu ‘ene ‘asi fefine, ‘o ne ‘alu mo e hou‘eiki Moape.
22Pea langa‘i ai ‘a e houhau ‘o e ‘Otua koe‘uhi ko ‘ene ‘alu: pea hanga ‘a e ‘Āngelo ‘a Sihova ‘o tu‘u ‘i he hala mōno fili. Ka kuo heka ia ‘i he‘ene ‘asi, pea ‘oku ō mo ia ‘ene ongo talavou. 23Pea vakai ‘e he ‘asi ‘a e ‘Āngelo ‘a Sihova ‘oku tu‘u ‘i he hala, kuo unuhi ‘ene heletā ‘o ne to‘o: pea afe ‘a e ‘asi mei he hala, ‘o ne ‘alu ‘i he vao: pea taa‘i ia ‘e Pēlami ke ne foki ki he hala. 24Pea hanga ‘a e ‘Āngelo ‘a Sihova, ‘o tu‘u ‘i ha hala fakaliuvaka, ‘i he ngaahi ngoue vaine, ‘o ‘aa‘i mei tafa‘aki mo tafa‘aki. 25Pea sio ‘e he ‘asi ki he ‘Āngelo ‘a Sihova, ‘o ne fa‘aki mālohi ki he ‘ā maka, ‘o feu‘utekina ‘a e va‘e ‘o Pēlami mo e ‘ā maka: pea ne toe ‘ai hono fu‘u hapo. 26Pea toe taha atu ‘a e ‘Āngelo ‘a Sihova, ‘o ne tu‘u ‘i ha potu ‘efi‘efi, ‘a ia na‘e ‘ikai ala tafoki ai ki to‘omata‘u pe ki to‘ohema. 27Pea ‘i he sio ‘a e ‘asi ki he ‘Āngelo ‘a Sihova, na‘a ne tō fo‘ohifo mo Pēlami: pea puke ‘a e ‘ita ‘o Pēlami, ‘o ne taa‘i ‘a e ‘asi ‘aki ‘ene me‘a kinisi. 28Pea to‘o ‘e Sihova ‘a e ngutu ‘o e ‘asi, ‘o ne lea kia Pēlami, Ko e hā ‘aku kuo u fai kiate koe ke ke taa‘i ai au ‘a e tu‘o tolu ni?
29Pea tali ‘e Pēlami ki he ‘asi, Koe‘uhi ko ho‘o ngaohi pehe‘i au: taumaiā ‘oku ‘i hoku nima ha heletā, pehē kuo u tāmate‘i koe.
30Pea pehē ‘a e ‘asi kia Pēlami, ‘Ikai ko si‘o ‘asi au ‘a ia kuo ke heka ai talu ho‘o mo‘ui, ‘o a‘u ki he ‘aho ni? he kuo u momo‘i fai pehē kiate koe hā taimi?
31Pea ne tali, ‘Ikai. Pea tatala ‘e Sihova ‘a e mata ‘o Pēlami, ‘o ne sio ki he ‘Āngelo ‘a e ‘Eiki ‘oku ne tu‘u mai ‘i he hala, pea kuo unuhi ‘ene heletā ‘o to‘o: pea ne punou, ‘o tō fo‘ohifo. 32Pea folofola kiate ia ‘a e ‘Āngelo ‘a Sihova, Ko e hā na‘a ke taa‘i ai ho‘o ‘asi ‘a e tu‘o tolu ko ē? Ko eni kuo u ha‘u ko ho fili, he ‘oku tū‘ulu tonu mai kiate au ho hala:#22.32 Ko eni… ho hala: Ko ‘eku ha‘ú ke tāpuni ho halá, he na‘e ‘ikai ke totonu ke ke fai ‘a e fononga ko ení. 33pea na‘e sio kiate au ‘a e ‘asi, ‘o ne afe meiate au ‘a e tu‘o tolu ko ē: ka ne ‘ikai afe ia meiate au, pehē kuo u tāmate‘i koe kae tuku ia ke mo‘ui.
34Pea fakatau folofola ‘a Pēlami ki he ‘Āngelo ‘a Sihova, Kuo u hia, he na‘e ‘ikai te u ‘ilo ‘oku ke tu‘u koe mei he hala ke ta‘ofi au; pea kapau ‘oku kovi ki he Feitu‘u na, pea te u foki.
35Pea folofola ‘a e ‘Āngelo ‘a Sihova kia Pēlami, ‘Alu mo e kau tangata; ka ‘oku ngata ‘i he lea te u fai kiate koe ‘a ia te ke lea‘aki. Ko ia na‘e ‘alu ‘a Pēlami mo e hou‘eiki ‘a Pēlaki.
36Pea ‘i he fanongo ‘e Pēlaki kuo ha‘u ‘a Pēlami, na‘a ne ‘alu atu ke fakafetaulaki kiate ia ki ‘Ala-Moape, ‘a ia ‘oku ‘i he tafafonua ‘o ‘Alanoni, ‘i he taupotu ‘o e fonua. 37Pea me‘a ‘a Pēlaki kia Pēlami, ‘Ikai na‘a ku mātu‘aki fekau atu ho ‘omi? Ko e hā na‘e ‘ikai te ke ha‘u ai kiate au? ‘Ikai ‘oku ou mafai mo‘oni ke fakahīkihiki‘i koe?
38Pea tali ‘e Pēlami kia Pēlaki, Ko eni kuo u ha‘u kiate koe; ka he ‘oku ou momo‘i lava ke fai ha lea? Ko e me‘a kotoa pē ‘e ‘ai ‘e he ‘Otua ki hoku ngutu ko ia pē te u lea‘aki. 39Pea ō ‘a Pēlami mo Pēlaki, pea na a‘u ki Kiliati-hūsoti. 40Pea feia ‘e Pēlaki ha feilaulau pulu mo e sipi, mo tauhi kia Pēlami mo e hou‘eiki na‘e ‘iate ia.
Currently Selected:
NŌMIPA 22: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
