NŌMIPA 24
24
1PEA ‘i he vakai ‘e Pēlami ko e finangalo ‘o Sihova ke tāpuaki‘i ‘a ‘Isileli, na‘e ‘ikai te ne ‘alu hangē ko e taimi ko ē mo ē ke fakalalave halanga; ka ne mo‘uhangā pē ki he toafa. 2Pea tāngaki hake ‘e Pēlami hono mata, ‘o ne ‘ilo ‘a ‘Isileli ‘oku nofo fakamatakali mai; pea hā‘ele kiate ia ‘a e Laumālie ‘o e ‘Otua. 3Pea ofa‘aki ‘e Pēlami ‘ene ta‘anga, ‘o ne pehē,
Ngonengone ‘a Pēlami foha ‘o Peoli,
Ngonengone ‘a e motu‘a ne mata pongia:#24.3 motu‘a… pongia; Ko e fakamahalo pē ia, he ‘oku ‘ikai ‘uhinga ‘a e me‘a ‘oku tu‘ú. Na‘a ko e tangata ‘oku ‘ā‘ā lelei; pe ko e tangata ‘oku kuikui.
4Ngonengone ‘a‘ana ‘oku ongo‘i he folofola ‘a ‘Ela,
Mo e vīsone ‘o Sātai ‘oku ne siofia,
‘Ene tō tekefili kae tatala hono mata:
5‘E Sēkope, hono ‘ikai faka‘ofo‘ofa ho ngaahi tēniti,
Mo ho ngaahi nofo‘anga, ‘e ‘Isileli!
6Hangē ni tele‘a ‘enau mafola ē,
Hangē ni ngoue ‘i he ve‘e vaitafe,
Hangē ni ‘otu ‘ālosi kuo tō ‘e he ‘Eiki,
Hangē ni ‘otu sita ‘i he ngaahi ve‘e vai.
7Ko ‘ene ongo kane ‘e fetafei mei ai ‘a e vai,
Pea ko hono hako ‘e nofo ki he ngaahi vai lahi.#24.7 Pea ko hono hako ‘e nofo ki he ngaahi vai lahi: ‘Oku ‘ikai ke mahino ‘a hono faka-Hepeluú, ka ‘oku pehē he hiki fuoloa ‘e taha: Pea te nau tō ‘enau pulopulá he kelekele hauhau lelei.
Pea ‘e mā‘olunga hono tu‘i ‘ia ‘Ēkaki,
Pea ko hono pule‘anga ‘e hākeaki‘i.
8Ko ‘Ela ‘oku taki ia mei ‘Isipite,
Hangē ‘oku ‘iate ia ‘a e mālohinga ‘o e pufaloe:
Te ne ngungu ‘ani kakai ko hono ngaahi fili,
Te ne mihi honau ngaahi hui,
Honau tenga te ne laiki.
9‘Ene taulalo, ‘ene tokoto, hangē ha laione motu‘a;
Pe ha laione toutama,#Sēn 12.3; 49.9 ko hai te ne ue‘ia!
Ko ia ‘oku ne tāpuaki‘i koe ‘e fai tāpuekina,
Pea ko ia ‘oku ne fakamala‘ia koe ‘e mala‘ia ia.
10Pea puke ‘ita ‘a Pēlaki kia Pēlami, ‘o ne fakapā hono nima: ‘o ne pehē kia Pēlami, Na‘a ku ui koe ke tutuku‘i hoku ngaahi fili, pea ko eni kuo ke mātu‘aki tāpuaki‘i kinautolu ‘o tu‘o tolu. 11Pea ko ia ke ke fei mo puna ki ho feitu‘u: na‘a ku pehē ke fu‘u fakahīkihiki‘i koe, ka tā kuo ta‘ofi koe ‘e he ‘Eiki mei he hākeaki‘i.
12Pea tali ‘e Pēlami kia Pēlaki, ‘Ikai foki na‘a ku fakahā ki he kau talafekau na‘a ke fekau mai, ‘o pehē, 13Neongo ‘e foaki mai ‘e Pēlaki hono fale kuo fonu ‘i he siliva mo e koula, ‘e ‘ikai te u lava ke hiki mei he me‘a ‘e tō mei he fofonga ‘o Sihova, ke fai ha lelei pe ha kovi ko hoku loto pē; ko e me‘a ‘oku folofola‘aki mai ‘e Sihova ko ia pē te u lea‘aki.
14Pea ko eni, vakai ko ‘eku ‘alu ē ki hoku kakai: ha‘u ka u hīnoi‘i koe ‘i he me‘a ‘e fai ‘e he kakai ni ki ho kakai ‘i he ngaahi ‘aho ‘amui. 15Pea ne ofa‘aki ‘ene ta‘anga ‘o ne pehē,
Ngonengone ‘a Pēlami, ko e foha ‘o Peoli ia,
Ngonengone ‘a e motu‘a ne mata pongia.#24.15 motu‘a… pongia; Ko e fakamahalo pē ia, he ‘oku ‘ikai ‘uhinga ‘a e me‘a ‘oku tu‘ú. Na‘a ko e tangata ‘oku ‘ā‘ā lelei; pe ko e tangata ‘oku kuikui.
16Ngonengone ‘a‘ana ‘oku ongo‘i ‘a e folofola ‘a ‘Ela,
Pea ko e fakakaukau ‘a ‘Elioni ‘oku ne ‘iloa,
Vīsone ‘o Sātai ‘oku ne siofia,
‘Ene tō tekefili kae tatala hono mata:
17‘Oku ou vakai ia neongo kuo te‘eki ‘i ai,
‘Oku ou ‘ilo atu, neongo ‘oku te‘eki ofi;
He hoko ha fetu‘u meia Sēkope ia
Pea hake mei ‘Isileli ha sēpita;
Pea te ne taa‘i ‘a e ongo tuliki ‘o Moape,
Mo faka‘auha ‘a e hako kotoa ‘o Sete.#24.17 ‘a e hako… Seté; ‘Oku toe hiki: ‘a e hako ‘o maveuveu.
18Pea ‘e hoko ‘a ‘Ītomi ko e tofi‘a,
Pea tofi‘a ‘aki mo Seia; Ko hono ongo fili ia;
Ka ko ‘Isileli ‘e fai fita.
19Pea ‘e tupu ha hau meia Sēkope,
Pea ko e toe ‘o e kolo te ne faka‘osi kotoa pē.
20Pea ne vakai ‘a ‘Amaleki, ‘o ne ofa‘aki ‘ene ta‘anga ‘o pehē,
Ko ‘Amaleki ko e ‘uluaki ‘i he ngaahi pule‘anga,
Ka ko e ‘auha hono iku‘anga.
21Pea ne sio ki ha‘a Keini,
‘O ne ofa‘aki ‘ene ta‘anga ‘o pehē,
‘Oku tolonga ho nofo‘anga,
Kuo ‘ai makatu‘u ho pununga.
22He ‘auha koā ‘a Keini ia?
‘Oua ke taki pōpula koe ‘e ‘Āsilia.#24.22 ‘Oku ‘ikai ke mahino ‘a e faka-Hepelū ‘o e veesi 22.
23Pea ne ofa‘aki ‘ene ta‘anga ‘o pehē,
‘Oi! Ko hai ‘e mo‘ui ē,
‘Oka fai ‘e ‘Ela ‘a e me‘a ko ē?#24.23 ‘Oi… ko eé; Ko hono ‘uhinga totonú nai ko e: Ko hai e kakai ko ena ‘oku fakapupunga mei he tokelaú? ka ‘oku ‘ikai ke mahino ‘a hono faka-Hepeluú.
24Ka ko e ngaahi vaka ē mei ‘apataki Kītimi,
Pea ko ‘Āsilia te nau fakavaivai‘i mo Hepelū te nau fakavaivai‘i,
Kae iku pē ki he ‘auha mo ia foki.
25Pea tu‘u ‘a Pēlami, ‘o ne ‘alu ‘o foki ki hono feitu‘u: ko Pēlaki foki na‘a ne fou ‘i hono hala.
Currently Selected:
NŌMIPA 24: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
